கருந்தேள் கண்ணாயிரம்

மௌனகுரு (2011) - Tamil

2012-02-19T00:16:00.001+05:30

விறுவிறுப்பான ஒரு த்ரில்லர் தமிழில் பார்த்து சில மாதங்கள் ஆகிவிட்டன. கடைசியாக அப்படிப் பார்த்திருந்த படம், ’யுத்தம் செய்’. இப்போது மௌனகுரு. ஒரு த்ரில்லருக்கான அத்தனை அம்சங்களும் அட்டகாசமாகப் பொருந்தி, பார்ப்பவர்களை படத்தில் ஒன்ற வைக்கிறது. எனக்கு மிகவும் பிடித்தது. ஆனால், போதிய விளம்பரம் இல்லாமல், சில திரையரங்குகளில் மட்டும் ஓடிக்கொண்டிருக்கிறது என்று நினைக்கிறேன். இதுபோன்ற படங்களைப் பார்த்து, அவசியம் நல்லவிதமான விமர்சனத்தை நண்பர்களிடையே, மக்களிடையே பரப்பவேண்டிய கடமை நமக்கு இருக்கிறது. இப்படிப்பட்ட படங்கள்தான் தற்போதைய தமிழ்த்திரையுலகுக்கு அவசியம் தேவையான படங்கள்.

ஆரம்பத்தில் இருந்து, இறுதிவரை படம்பார்க்கும் ஆடியன்ஸை ஒருவித பரபரப்பு கொள்ளச் செய்து படத்தில் கவனம் குன்றாமல் வைத்திருப்பது ஒரு கலை. இப்படத்தின் இயக்குநர் சாந்தகுமாருக்கு அது கைகூடி வந்திருக்கிறது. படத்தில் நடித்திருக்கும் அத்தனை பேருமே தங்களது கதாபாத்திரங்களை நன்றாகவே செய்திருக்கின்றனர். குறிப்பாக, Fargo படத்தில் கர்ப்பத்துடன் துப்பறியும் பெண் போலீஸ் இன்ஸ்பெக்டர் கதாபாத்திரத்தில் நடித்த ஃப்ரான்ஸெஸ் மெக்டோர்மாண்ட் சாயலில் தமிழில் நடித்திருக்கும் உமா ரியாஸ்,வில்லன் ஜான் விஜய்,கிருஷ்ணமூர்த்தி ஆகியவர்களைச் சொல்லலாம். எனக்கு ஒரு சந்தேகம். படத்தில் அருள்நிதியின் கதாபாத்திரம், அருள்நிதியை ஸ்டடி செய்து எழுதப்பட்டதா அல்லது அந்தக் கதாபாத்திரத்தை அருள்நிதி அப்படி நடித்திருக்கிறாரா? எது எப்படி இருப்பினும், ஒரு ஸீனில் கூட சிரிக்காமல் கடுமையாகவே முகத்தை வைத்துக்கொண்டு நடித்திருக்கும் அருள்நிதியும் ஸ்கோர் செய்கிறார். இன்னும் ஓரிரண்டு படங்களில் அவரது நடிப்பைப் பார்த்தபின்னர்தான் மேற்கொண்டு கமெண்ட் செய்ய முடியும். அழகிய கதாநாயகியின் ரோலை அழகாகச் செய்திருக்கிறார் இனியா.

படத்தின் மிகச்சிறிய ஸ்பீட்ப்ரேக்கர்களாக அமைந்துள்ளன பாடல்கள். இப்படத்துக்குப் பாடல்களே தேவையில்லை என்பது என் தாழ்மையான கருத்து.

எப்போது பார்த்தாலும் கலைப்படம் எடுக்கிறேன் பேர்வழி என்று ஆடியன்ஸை கொலைவெறி கொள்ளவைக்கும் படங்களை விட, மௌனகுருவைப்போன்ற தரமான த்ரில்லர்கள் தமிழுக்குக் கட்டாயம் அவ்வப்போது தேவை. ஆகவே, மௌனகுரு டீமுக்கு எனது மனமார்ந்த பாராட்டுக்கள்.

இதுவரை மௌனகுருவைப் பார்க்கவில்லை என்றால், எப்படியாவது பார்த்துவிடுங்கள் நண்பர்களே.

கடைசியாக, இன்னொரு டவுட். இவ்வளவு நல்ல ஒரு படத்துக்கு ஏன் அவ்வளவு மொக்கையாக ஒரு ட்ரெய்லர்?அந்த ட்ரெய்லரைப் பார்த்தபின்னர்தான் இப்படத்தைப் பார்க்கவே கூடாது என்று முடிவு செய்திருந்தேன்.

The Descendants (2011) - English

2012-02-16T00:24:00.000+05:30

மேட் (Matt), தனது மனைவி படுத்திருக்கும் அறைக்குள் வருகிறான். கட்டிலில் படுத்திருக்கும் மனைவியைப் பார்க்கிறான்.

“என்னிடம் டைவர்ஸ் கேட்கலாம் என்றா நினைத்தாய்? எவனோ ஒருத்தனுடன் நீ சுற்றவேண்டும் என்றால் அதற்கு நானா கிடைத்தேன்?என்ன விளையாடுகிறாயா? யார் நீ? உன்னைப்பற்றிய பிம்பம் உடைந்து நொறுங்கிவிட்டது. என்னைப்பொறுத்தவரை, இனிமேல் நீ வெறும் பொய்களால் நிரம்பிய ஒரு உருவம். அவ்வளவுதான்! எங்கே.... வழக்கமாக சிரித்து பசப்புவாயே.... அதைச் செய் பார்க்கலாம்... உன்னுடன் வாழ்வது எப்போதுமே பிரச்னையாகவே இருந்து வந்திருக்கிறது எனக்கு. உண்மையைச் சொல்கிறேன். நானே உன்னை டைவர்ஸ் செய்யவேண்டும் என்று நினைத்தேன்!”

அங்கேயிருக்கும் ஒரு கரடி பொம்மையைக் கோபத்துடன் தூக்கி வீசுகிறான். சுவற்றில் அந்தப் பொம்மை ஏற்படுத்திய சத்தம், அந்த அமைதியான அறையில் பெரிதாகக் கேட்கிறது.

”கோமாவில் படுத்திருக்கும்போதும் ஏன் என்னை இப்படி வதைக்கிறாய்?” - மேட்டின் குரல் உடைகிறது. கண்களில் கண்ணீர் தளும்புகிறது.

"ஹாய் ப்ரயன்... நான் மேட். எலிஸபெத்தின் கணவன். அவளை உனக்கு நன்றாகத் தெரியும் என்பது எனக்குத் தெரியும்”.

ப்ரயனின் புன்னகை ஒரே நொடியில் மறைகிறது. அவனுக்குப் பக்கத்தில் அவனது மனைவி. ஆகவே, புன்னகை ஒன்றை வலிய வரவழைத்துக்கொள்கிறான்.

இருவரும் வீட்டினுள் செல்கிறார்கள்.

”எலிஸபெத் இறந்துகொண்டிருக்கிறாள். ஃபக் யூ. இன்று காலையில்தான் அவளை இன்ஹேலரில் இருந்து அகற்றியிருக்கிறோம். எந்நேரமும் அவள் இனி இறக்கக்கூடும்”

”....................”

”எலிஸபெத் உன்னை விரும்பினாளா?”

“ஆம்”

“நீ அவளை விரும்பினாயா?”

“........”

”ம்ம்ம்.. அவளை நீ விரும்பவே இல்லை. வெறும் உடல் சுகத்துக்கு அவளை உபயோகித்துக்கொண்டாய். ஆனால் என் மனைவியோ, உன்னை மிகவும் விரும்பினாள்.. ச்சே... எப்படிப்பட்ட மனிதன் நீ”

“இல்லை. இது வெறும் செக்ஸ். ஈர்ப்பு. அவ்வளவுதான். அவள் இப்படியெல்லாம் நினைத்துக்கொண்டால் அதற்கு நான் பொறுப்பாகிவிடமுடியாது. என் மனைவியை நான் விரும்புகிறேன். தயவுசெய்து வெளியே இருக்கும் என் மனைவியிடம் இந்த விஷயத்தை சொல்லிவிடாதே. என் வாழ்வே நாசமாகி விடும்”

”அவள் க்வீன்ஸ் ஹாஸ்பிடலில் இருக்கிறாள். இறப்பதற்கு முன்னர் நீ ஒருவேளை அவளைப் பார்க்க விரும்பினால் அங்கே வரலாம். அதைச் சொல்லத்தான் உன்னைத் தேடிக் கண்டுபிடித்தேன்”

“................”

உலகின் செக்ஸியான ஆண்களில் ஒருவர் என்று இரண்டுமுறைகள் இதுவரை தேர்ந்தெடுக்கப்பட்ட நடிகர் ஒருவர், கிட்டத்தட்டத் தோல்வியின் விளிம்பில் இருக்கக்கூடிய மனிதனின் கதாபாத்திரத்தில் நடிக்கச் சம்மதிப்பாரா? அல்லது பொருத்தமில்லாத வயதில்,இளம்வயது கதாநாயகியைக் காதலித்து, ஃபைட்கள், இரட்டை அர்த்த வசனங்கள் ஆகியவற்றோடு ஆபாச அசைவுப் பாடல்களில் ஆடி நடிப்பாரா?

முதல் உதாரணத்தில் சொல்லப்பட்ட நபர் ஜார்ஜ் க்ளூனி (இவருக்கு தமிழ்ப் பதிவுலகில் பலவிதமான பெயர்கள் உண்டு. உதா: ஜாரஜ் குலுனி, சார்ஜ் குலூனி, ஜர்ஜ் குலூனி முதலியன. ஓசியன்ஸ் லெவன் என்ற ஹிந்திப் படத்தில் வேறு இவர் நடித்திருக்கிறாராம்)என்பது நண்பர்களுக்குத் தெரிந்திருக்கும். கடந்த சில வருடங்களாக, நடிப்பை வெளிக்காட்டும் படங்களில் அதிகம் நடித்துவரும் இவர், இதிலும் நன்றாக நடித்திருக்கிறார். இரண்டு மகள்களை வைத்துக்கொண்டு, மனைவியும் இல்லாமல், அவர்களுடன் பேச, நெருக்கமாக முயற்சிக்கும் தந்தை. இரண்டு மகள்களும் இரண்டு துருவங்களில் வாழ்கிறார்கள். அவர்களுடன் கம்யூனிகேட் செய்வதே கடினம். இருப்பினும் மெல்ல மெல்ல எப்படி உறவு மலர்கிறது என்பது அழகாகச் சொல்லப்பட்டிருக்கிறது (இதுவும் ஒரு ஹாலிவுட் டெம்ப்ளேட்தான். ஆனாலும் அந்த டெம்ப்ளேட்டை ரசிக்கும்படி கொடுத்திருப்பதே இப்படத்தின் வெற்றி).

படத்தில் ஜார்ஜ் க்ளூனி என்ற சூப்பர்ஸ்டார் மாயமாக மறைந்து, நடுத்தர வயது மனிதன் ஒருவனே தெரிவது, குலூனி ச்சே... க்ளூனியின் வெற்றி.

படத்தைப் பற்றி எதுவுமே சொல்லப்போவதில்லை. மேலே விவரித்துள்ள இரண்டு காட்சிகளே படத்தைப் பற்றி நிறைய சொல்கின்றன. இந்த ஆண்டு ஆஸ்கரில் ஐந்து பிரிவுகளுக்கு நாமிநேட் செய்யப்பட்டிருக்கிறது இப்படம். ஏற்கெனவே இரண்டு கோல்டன் க்ளோப்களை வாங்கிவிட்டது.

இப்படத்தின் திரைக்கதை எனக்குப் பிடித்தது. படம் தொடங்கும்போது ஒரு சம்பவம். அதனை வைத்துதான் படமே நகரப்போகிறது என்று நினைக்கையில், டக்கென்று இன்னொரு சம்பவம். அதிலிருந்து கதை பிரியப்போகிறது என்று நினைக்கையில், இன்னொரு சம்பவம். இப்படி சுவாரஸ்யமாக எழுதப்பட்டிருக்கிறது இந்தத் திரைக்கதை.

படத்தின் முதல் ப்ளாட் பாயிண்ட்டை வைத்து வரும் சம்பவங்களில் ஒன்றுதான் நான் மேலே கொடுத்த முதல் காட்சி. அடிப்படை திரைக்கதை விதிகளை மீறாமல், அதே சமயம் மிக சுவாரஸ்யமாக, அழகாக, உருக்கமாக, நகைச்சுவையாக எடுக்கப்படும் அதே டெம்ப்ளேட். படத்தைப் பற்றி ஆரம்பத்திலேயே முழுதாகத் தெரிந்திருந்தாலும், பார்க்காமல் இருக்க முடியாது.

இம்முறை ஆஸ்கரில், இதைப்போலவே இதே டெம்ப்ளேட்டில் எடுக்கப்பட்டிருக்கும் வூடி ஆலனின் ‘Midnight in Paris' (எனது ஆங்கில விமர்சனத்தைக் க்ளிக் செய்து படிக்கலாம்) படமும் போட்டியில் உள்ளது. ஆனால், ஸ்பீல்பெர்க்கின் 'WarHorse' படமும், ’The Artist' படமும் இப்படங்களை மிஞ்சக்கூடும் என்று நினைக்கிறேன். Tree of Life படம் எனக்கு சுத்தமாகவே பிடிக்கவில்லை. ஒரு நிமிடம் கூட. 'The Help' படம், நல்ல படமாகவே இருந்தால்கூட, இம்முறை விருது வாங்குவது கடினம்.

அலெக்ஸாண்டர் பேய்ன் (பேயோன் அல்ல), ஏற்கெனவே திரைக்கதைக்காக ஆஸ்கர் வாங்கியவர் (Sideways). இம்முறை, கொஞ்சம் கடினம் என்று தோன்றுகிறது. லிஸ்ட்டில் ஹெவிவெய்ட்கள் உள்ளனவே?

தவறாமல் இப்படத்தைப் பார்க்க முயற்சி செய்யும்படி நண்பர்களைக் கேட்டுக்கொள்கிறேன்.

The Descendants படத்தின் ட்ரெய்லர் இங்கே.

பி.கு - இப்படத்தின் பெயருக்கும் இக்கதைக்கும் உள்ள தொடர்பையும் படத்தில் காண்பீர்கள்.

Princess: சவூதி அரேபிய இரும்புத்திரையும் ஒரு இளவரசியும்

2012-02-14T23:45:00.000+05:30

சவூதி அரேபியா பற்றி நமக்கு என்ன தெரியும்? பேச்சு வழக்கில் பரவும் சில செய்திகள் மட்டுமே இதுவரை நமக்குத் தெரியும். அவை என்னென்ன? முதலாவது, திருட்டுக்குக்கூட வழங்கப்படும் மரணதண்டனை. இரண்டாவது, எந்தவித கொண்டாட்டத்துக்கும் வழியில்லாத ஊர் அது. மூன்று. அரேபியர்கள், வட இந்தியர்களை விட மோசமான ஆணாதிக்கவாதிகள். இதுதவிர, ஓரிரண்டு சிறுவிஷயங்கள் ஏதாவது தெரிந்திருக்கலாம். என்னளவில், அங்கே வேலை கிடைத்தும் போக மறுத்த சில நண்பர்களைத் தெரியும். அதே சமயம், அங்கேயே தங்கிப் பணிபுரியும் சில நெருங்கிய நண்பர்களும் உண்டு. அங்கே நான் சென்றதில்லை என்பதால் என்னால் சவூதி அரேபியாவைப் பற்றிக் கருத்துக் கூற இயலாது. ஆனால், நான் சமீபத்தில் படித்த புத்தகம் ஒன்று, சவூதி அரேபியா பற்றி இணையத்தில் பல தகவல்களைத் தேட வைத்தது. படிக்கப்படிக்க என்னுள் இனம்புரியாத கோபத்தை உண்டுபண்ணிய புத்தகம் இது. கோபம் ஏன் என்று கட்டுரையின் உள்ளே படித்தால் புரியும்.

சவூதி அரேபியாவின் அரச குடும்பத்தில் இருக்கும் ஒரு பெண் - ஒரு இளவரசி. இந்த இளவரசியுடன் நெருங்கிப் பழகிய ஒரு அமெரிக்க எழுத்தாளர். பல வருடங்களாக இருவரும் நெருங்கிய நட்புடன் விளங்கியதால், அந்த இளவரசி, அப்பெண்ணிடம் தனது குடும்பத்தைப் பற்றியும், ஒரு இளவரசியாக வாழ்ந்து வருவதன் பிரச்னைகள் பற்றியும், ஒரு பெண்ணாக அவர் நடத்தப்படும் முறையையும், இன்னும் பல விஷயங்களைப் பற்றியும் இந்த அமெரிக்க எழுத்தாளரிடம் விரிவாகப் பகிர்ந்துகொள்கிறார். பகிர்வது மட்டுமல்லாமல், இந்த விஷயங்களை எழுதவும் சொல்கிறார். இவை எழுத்தில் பதிவுசெய்யப்பட்டால்தான் வெளியுலகுக்கு சவூதி அரேபியாவின் இரும்புத்திரைக்குப் பின்னால் நடக்கும் அசிங்கங்கள் தெரியவரும் என்பது அந்த இளவரசியின் கூற்று. உண்மை வெளியே வந்தால், அவரது உயிருக்கே ஆபத்து என்பதும் அந்த இளவரசிக்குத் தெரியாமலில்லை. இருந்தும், இத்தனை வருடங்கள் அனுபவித்த துயரங்களும் மன உளைச்சல்களும் அவரை இந்த முடிவுக்குத் தள்ளுகின்றன. இந்தப் புத்தகம் வெளிவந்தாலாவது தன்னைப்போன்ற பெண்களின் நிலைமை வெளியுலகுக்குத் தெரிந்து, பிற நாடுகளால் சவூதி அரேபியா நிர்ப்பந்திக்கப்படலாம் என்பது அந்த இளவரசியின் நோக்கம்.

அந்த எழுத்தாளரும், இந்த இளவரசியின் பெயரை மாற்றுகிறார். இளவரசியின் மற்ற விபரங்களையும் சற்றே மாற்றுகிறார். அதன்பின் ஒரு புத்தகத்தை அவர் எழுதி வெளியிட, புத்தகம் இன்ஸ்டன்ட் ஹிட் ஆகிறது. இப்படியுமா பெண்களை ஆடுமாடுகளைப்போல் அடிமைகளாக நடத்துவார்கள் என்று இப்புத்தகத்தைப் படிப்பவர்கள் எல்லாம் அதிர்ச்சிக்கு உள்ளாகிறார்கள். இந்தப் புத்தகம் சவூதி அரேபியாவில் தடை செய்யப்படுகிறது. உலகெங்கும் விற்பனையில் சக்கைப்போடு போடுகிறது. இதனைத்தொடர்ந்து, இதே இளவரசியைப் பற்றி இன்னும் இரண்டு புத்தகங்கள் எழுதி வெளியிடுகிறார் அந்த எழுத்தாளர். அவையுமே பெஸ்ட் செல்லர்கள் தான்.

புத்தகங்கள் வெளிவந்தபின், அவைகளைப் படிக்க நேர்ந்த சவூதி அரச பரம்பரையினரால் அந்த இளவரசி கண்டுபிடிக்கப்பட்டாரா என்றால், இல்லை என்ற பதில் வருகிறது. காரணம், சவூதி அரச பரம்பரையில் இருக்கும் மொத்த நபர்களின் எண்ணிக்கை, 21,000. இவர்களில், அரச பரம்பரையினரின் உறவினர்களும் உண்டு. இந்த உறவினர்களைக் கணக்கெடுக்காமல், இந்த அரச பரம்பரை உருவான மன்னரின் வாரிசுகளையும், அவர்களது வாரிசுகளையும் மட்டுமே கணக்கெடுத்தாலும், மொத்தம் ஆயிரம் பேர் இருக்கிறார்கள். ஆகவே, அந்தக் குறிப்பிட்ட பெண்மணியைக் கண்டுபிடிப்பது மிகக்கடினம் என்ற பதில் இவற்றை எழுதிய எழுத்தாளரிடமிருந்து வருகிறது.

இந்தப் புத்தகம் 1995ல் வெளிவந்தவுடன், மோனிகா அல் அமஹானி (Monica Al Amahani) என்ற இன்னொரு பெண்மணி, இந்த ஆசிரியரின் மீது வழக்குத் தொடர்ந்தார். காரணம், அவர் எழுதிய 'Cinderella in Arabia' என்ற புத்தகத்தைத் திருடியே இந்த princess புத்தகம் எழுதப்பட்டிருக்கிறது என்பது. ஆனால், இந்த வழக்கு தள்ளுபடி செய்யப்பட்டுவிட்டது. இந்த வழக்கைத் தொடர்ந்த மோனிகா அல் அமஹானி, இன்றுவரை இவரது புத்தகத்தைத் திருடியே Princess புத்தகம் உருவாகியிருக்கிறது என்றும், உண்மையில் அப்படி ஒரு இளவரசி இல்லவே இல்லை என்றும், இதெல்லாம் அப்புத்தகத்தை எழுதிய எழுத்தாளர் பணம் சம்பாதிப்பதற்காகச் செய்த திருட்டு வேலை என்றும் சொல்லிவருகிறார்.

இந்தப் புத்தகத்தில் சொல்லப்படும் சம்பவங்களின் நம்பகத்தன்மையைக் குறித்தும் சில விவாதங்கள் இணையத்தில் நடைபெற்று வருகின்றன.

சரி. பீடிகை போதும். இப்புத்தகத்தை எழுதிய பெண் எழுத்தாளரின் பெயர், ஜீன் சாஸ்ஸன் (Jean Sasson). புத்தகத்தைப் பற்றிக் கொஞ்சம் பார்ப்போம்.

மகாராஜா அப்துல் அஸீஸ் (Abdul-Aziz). சவூதி அரேபியாவை ஸ்தாபித்த மனிதர். 1932ல், பிரிந்து கிடந்த நஜ்த் (Najd) மற்றும் ஹெஜாஸ் (Hejaz) பிராந்தியங்களை மீட்டு, ஒருங்கிணைத்து, அப்துல் அஜீஸ் உருவாக்கிய நாடே சவூதி அரேபியா. இவரது பிரதான எதிரிகளான அல் ரஷீத் என்ற குழு, இவரது சிறு பிராயத்தில், இந்தப் பிராந்தியங்களை சிறைபிடித்திருந்தது. அப்போது நாட்டை விட்டு அப்துல் அஸீஸ் விரட்டப்பட்டார். அதன்பின் சில ஆண்டுகள் கழித்து ஒரு படையைத் திரட்டி, இழந்த நாட்டைப் படிப்படியாக மீட்டார் (முதலில் ரியாத் - 1902ல்; அதன்பின் நஜ்த் - 1922ல்; கடைசியாக ஹிஜாஸ் - 1925).

இவர் போர்தொடுத்து மீட்டிருந்த பிராந்தியங்களில் உள்ள மக்களின் நம்பிக்கையைப் பெற (அக்பரின் வழியில்) பல பெண்களைத் திருமணம் செய்துகொண்டார் அப்துல் அஸீஸ். இந்தப் புத்தகத்தின்படி, மொத்தம் 300 மனைவிகள் இவருக்கு உண்டு என்று தெரிகிறது (ஆனால், இணையத்தில் எவ்வளவு தேடிப்பார்த்தும், அதிகாரபூர்வமான எண்ணிக்கை 22 என்றே இருக்கிறது. ஒருவேளை மற்ற மனைவியர் அதிகாரபூர்வ பட்டியலில் இல்லாமல் இருந்திருக்கலாம்). இந்த மனைவியரின் மூலம் இவருக்குப் பிறந்த குழந்தைகள் மொத்தம் ஐம்பது ஆண்கள் மற்றும் எண்பது பெண்கள் (புத்தகத்தின்படி). இவர்களில், அப்துல் அஸீஸின் மனம்கவர்ந்த மனைவியான ஹஸ்ஸா ஸுதைரி (Hassa Sudairi) என்ற அரசிக்குப் பிறந்த மகன்களே அப்துல் அஸீஸின்அதிகாரபூர்வமான வாரிசுகள். அவர்களே சவூதி அரேபியாவின் ஆட்சியில் நேரடிப் பங்கு வகிக்கிறார்கள்.

இந்த மகன்களில், ஃபாஹ்த் என்று அழைக்கப்பட்ட மன்னரான ஃபாஹ்த் பின் அப்துல் அஸீஸ் அல் சௌத் (சௌத் பரம்பரையைச் சேர்ந்த அப்துல் அஸீஸின் மகனான ஃபாஹ்த்) என்பவர் மன்னராக இருந்த காலத்தில் (1995) இக்கதை எழுதப்பட்டிருக்கிறது.

(சவூதி அரேபியாவின் மன்னர்கள், இதுவரையில் அப்துல் அஸீஸின் பிள்ளைகளாகவே இருந்துவந்திருக்கிறார்கள் என்பது குறிப்பிடத்தக்கது. பிற நாடுகளைப்போல் ஒரு மன்னர், அதன்பின் அவரது மகன், அதன்பின் அந்த மகனின் மகன் என்று இல்லாமல், ஒரு மன்னரின் மகன்கள் ஒவ்வொருவராக மன்னர்களாக ஆனதே சவூதி அரேபியாவின் மன்னராட்சி முறை. ஆனால் இதிலிருந்த பிரச்னை என்னவெனில், அண்ணன் இறக்கும்வரை தம்பி காத்திருக்க நேர்வதே. இந்த முறையின்படி, தற்போதைய மன்னரான அப்துல்லாஹ், 1924 ல் பிறந்தும், 2005ல், அவரது எண்பத்தி ஓராம் வயதில்தான் மன்னராக முடிந்தது. தற்போது அவருக்கு 87 வயது. 81ம் வயதுவரை இளவரசராகவே வாழ்ந்துவந்திருக்கிறார் இவர்).

இப்படி, முதல் மன்னரான அப்துல் அஸீஸின் நேரடிப் பரம்பரையில் வந்த ஒரு இளவரசியே இக்கதையின் நாயகி. அவரது பெயர், சுல்தானா என்று இப்புத்தகத்தில் கொடுக்கப்பட்டிருகிறது. சுல்தானாவின் சிறுவயது நினைவுகள், புத்தகத்தின் முதல் அத்தியாயத்தில் விளக்கப்பட்டிருக்கின்றன. சுல்தானாவின் உடன்பிறந்தவர்களின் எண்ணிக்கை, மொத்தம் பதினொன்று. அவர்களில், பத்து மகள்கள் மற்றும் ஒரே ஒரு மகன். சுல்தானாவின் தந்தைக்கு மொத்தம் நான்கு மனைவிகள்.

இதன் காரணமாகவும், சவூதி அரேபியாவில் ஆண்பிள்ளைகளுக்குக் கொடுக்கப்பட்டுவந்த முக்கியத்துவம் காரணமாகவும், சுல்தானாவுடன் பிறந்த இளவரசனான அலிக்கு முக்கியத்துவம் கொடுக்கப்பட்டு வந்தது. அலியும், தனது தந்தையைப்போல், பிற பெண்களைக் குப்பைக்கு சமமாக நடத்தி வந்தான். பெண்கள் என்ன ஆசைப்பட்டாலும் அது அங்கே நடக்காது என்பதால், சவூதியில் பெண்கள் வாயே திறக்காமல் வாழ்ந்து வந்திருக்கிறார்கள். அலி என்ன கேட்டாலும் கிடைக்கும். அதேசமயம், அவனுடன் பிறந்த பெண்கள் என்ன கேட்டாலும் அது கிடைக்காது. அவர்களின் தரப்பில் அவர்களது தந்தையே முடிவெடுப்பது வழக்கம். ஆகவே, தங்கக் கூண்டுக்குள் அடைபட்ட ஒரு பறவையின் வாழ்க்கையையே இளவரசி சுல்தானா வாழ்ந்துவருகிறாள்.

சிறுவயதில், மன்னர் சௌத்தின் கொடுங்கோல் ஆட்சியை எப்படி அவரது சகோதரர் ஃபைசல் முடிவுக்குக் கொண்டுவந்தார் என்பதையும், அதற்காக அவர்களது மந்திராலோசனை நடைபெற்றபோது அதனை ஒட்டுக்கேட்டதையும் சொல்கிறாள் சுல்தானா. அதுவே அவளது சிறுவயதில் நடந்த முக்கியமான சம்பவமாக இருக்கிறது. காரணம், பெண்கள் இக்கூட்டத்தைக் கவனிப்பது தெரியவந்தால், கொடும்தண்டனை கிடைக்கும்.

இதன்பின்னர், சுல்தானா மெல்ல வளர்கிறாள். தனது மூர்க்கமான சகோதரன் அலியை அவ்வப்போது சில ரசமான சம்பவங்களால் அழ வைக்கிறாள். அவளது சகோதரிக்குத் திருமணம் நடக்கிறது. யாருடன்? அறுபத்தி இரண்டு வயதான ஒரு வியாபாரியின் மூன்றாம் மனைவியாகத் திருமணம் செய்துதரப்படுகிறாள் சுல்தானாவின் சகோத்தரி ஸாரா. திருமணத்துக்குப்பின், அவனது பாலியல் சித்திரவதையின் காரணமாக ஒரு முறை தற்கொலைக்கு முயன்று, காப்பாற்றப்படுகிறாள். இதன் காரணமாக தலாக் (விவாகரத்து) நடந்து, தந்தையின் வீட்டுக்கே திரும்பிவருகிறாள். ஃப்ரான்ஸில் கலை படிக்க ஆசைப்பட்ட ஒரு இளவரசியின் கனவு இவ்வாறாக ஒரு கொடூர முடிவை அடைகிறது. அதன்பின் ஸாராவுக்குக் கிடைத்ததோ இருண்ட, தனிமையான, வெறுமையான வாழ்வுதான்.

இதன்பின் தனது சகோதரிகளுடன் ஐரோப்பா செல்கிறாள் சுல்தானா. சகோதரிகளில் ஒருவரின் புதிய வீட்டை அலங்கரிக்க சில பொருட்கள் வாங்கும் பொருட்டு (என்னதான் துயரங்களை அனுபவித்தாலும், பணத்துக்குப் பஞ்சமே இருந்ததில்லை என்று அவ்வப்போது சொல்கிறாள் சுல்தானா. ஆனால், எங்கும் நிறைந்திருந்த பணத்தாலும் வசதிகளாலும் அவளுக்கு எந்த சந்தோஷமும் கிடைத்திருக்கவில்லை). அப்போது அவளது சகோதரனாலும் அவனது நண்பனாலும் எப்போது பார்த்தாலும் மூர்க்கமாகக் கையாளப்படுகிறாள். அதனை எதிர்க்கவும் செய்கிறாள்.

ஐரோப்பாவில் இருந்து வந்ததும், அவளது தாயாரின் மரணம். அதனைத்தொடர்ந்து, உடனடியாக ஒரு பதினாறு வயதுப் பெண்ணை அவளது தந்தை மணந்து, சுல்தானாவின் வீட்டுக்கு அழைத்துவந்து, அவளது தாயின் இடத்தில் வைக்கிறார். அந்தப் பெண்ணை விட ஓரிரு வயதே குறைவாக இருக்கும் சுல்தானாவுக்கு இது கடும் துயரத்தை ஏற்படுத்துகிறது. சாகும்வரை தந்தையின் கோபத்துக்கு ஆளாகிப் பரிதாபகரமாக இறந்த தாய்க்கு எந்த மரியாதையும் கொடுக்காமல், உடலின்பத்துக்காக இப்படி ஒரு திருமணத்தைச் செய்துகொண்ட தந்தையை அடியோடு வெறுக்கிறாள் சுல்தானா.

இளவரசி சுல்தானாவின் தோழிகள் இருவர் அறிமுகம் ஆகிறார்கள். சவூதியில் பெண்களின் அடிமை வாழ்வில் அலுப்படைந்து, பிற ஆண்கள் சிலருடன் ஊர்சுற்றும் இவர்கள், இந்தக் குற்றம் நிரூபிக்கப்பட்டதால் பிடிபட்டு, அவர்களில் ஒரு பெண், அவளது தந்தையால், உறவினர்கள் அத்தனை பேரின் முன்னிலையில் ஒரு கொடூரமான தண்டனைக்கு ஆளாகி இறக்கிறாள். இந்தத் தோழிகளுடன் ஓரிரு நாட்கள் வெளியே சென்ற குற்றத்துக்காக, அந்த இளம் மனைவி உடனடியாக விவாகரத்து செய்யப்பட்டு அவளது இடத்துக்கே திரும்பி அனுப்பப்படுகிறாள். இதுவும் சுல்தானாவின் இயலாமையையும் கோபத்தையும் அதிகப்படுத்துகிறது.

சுல்தானாவின் மாளிகையில் பணிபுரியும் மார்ஸி என்ற பிலிப்பினோ பெண்ணின் கதை அடுத்து வருகிறது. மார்ஸியும் அவளது தோழியும் பணிபுரிய சவூதி அரேபியா வருகிறார்கள். அங்கே, பெண்களுக்கு நிலவும் கடுமையான கட்டுப்பாடுகள் காரணமாக, தனது தோழி எங்கிருக்கிறாள் என்பதே மார்ஸிக்குத் தெரிவதில்லை. கஷ்டப்பட்டு அவளைக் கண்டுபிடிக்கும் மார்ஸிக்கு பேரதிர்ச்சி காத்திருக்கிறது. அவளது தோழி பணிபுரியும் வீட்டில் உள்ள எஜமானரின் இரண்டு மகன்களின் பாலியல் தேவையைப் பூர்த்தி செய்வதற்குத்தான் அந்தத்தோழி அலைத்துவரப்பட்டிருக்கிறாள் என்பதை மார்ஸி தெரிந்துகொள்கிறாள். சவூதியின் கடுமையான சட்டங்களில், பெண்களுடன் பழகுவதோ காதலோ உறவு கொள்வதோ மரண தண்டனைக் குற்றங்கள். ஆகவே, இப்படிப்பட்ட வெளிநாட்டுப்பெண்கள் சவூதி ஆண்களின் பாலியல் தேவையைப் பூர்த்தி செய்யப் பயன்படுகிறார்கள் என்று தெரிந்துகொள்கிறோம். மார்ஸியின் தோழியோடு சேர்த்து, இலங்கையைச் சேர்ந்த ஒரு பெண்ணும் அந்த வீட்டில் இதற்காகவே அமர்த்தப்பட்டிருக்கிறாள். இரண்டு வருட ஒப்பந்தம் முடிந்து, உடைந்த மனதோடு மார்ஸியின் தோழி பிலிப்பைன்ஸ் செல்கிறாள்.

இதன்பின்னர், சுல்தானாவுக்கும் திருமணம் நிச்சயிக்கிறார் தந்தை.

இதற்குப்பின் என்ன ஆனது? புத்தகத்தைப் படித்துத் தெரிந்துகொள்ளுங்கள்.

உலகெங்கும் பெரும் வரவேற்பு பெற்ற ஒரு புத்தகம் இது. இப்புத்தகத்துக்குப் பின்னர், சுல்தானாவுக்குப் பிறந்த மகள்களைப் பற்றி 'Daughters of Arabia' என்று ஒரு புத்தகமும், அதன்பின் மறுபடி சுல்தானாவைப் பற்றி 'Desert Royal' என்று மற்றொரு புத்தகமும் எழுதியிருக்கிறார் ஜீன் சாஸ்ஸன். அவையுமே வெற்றிகரமாக விற்பனையான புத்தகங்கள்தான்.

சவூதி அரேபியாவில் பெண்கள் அனுபவிக்கும் துயரங்களைப் பற்றி சுல்தானா விரிவாகச் சொல்லியிருந்தாலும், குர்ஆனில் அப்படி விளக்கப்பட்டிருக்கவில்லை என்றும், இது, பெண்களை அடிமைப்பொருளாக வைத்துக்கொள்ள ஆண்கள் செய்த சதி என்றும் விரிவாக விளக்குகிறாள். குர் ஆனில் இருந்து அங்கங்கே உதாரணங்களும் கொடுக்கிறாள். எப்படி அவை சவூதி ஆண்களால் தவறாக அர்த்தம் செய்யப்பட்டு அதனால் பெண்கள் துன்புற நேர்கிறது என்பதும் இப்புத்தகத்தில் சுல்தானாவால் சொல்லப்பட்டிருக்கிறது.

சுல்தானா யார்? அவளது நிஜப்பெயர் என்ன? என்பது இன்று வரை விவாதிக்கப்படும் ஒரு மர்மம். ஜீன் சாஸ்ஸன் இன்றுவரை சுல்தானாவின் அடையாளத்தைப் பகிரங்கப்படுத்தவில்லை. காரணம், அடையாளம் தெரிந்தால் சுல்தானாவுக்கு மரணதண்டனை நிச்சயம் என்று அவர் சொல்லிவருகிறார். அதேசமயம், இப்புத்தகத்தில் உள்ள நிகழ்வுகள் உண்மையில் நடந்திருக்கவில்லை; அவையெல்லாம் சாஸ்ஸனின் கற்பனை மட்டுமே; சவூதி அந்த அளவு கொடூர நாடு இல்லை என்றும் சிலர் சொல்லிவருகிறார்கள். முடிவெடுக்கும் பொறுப்பை இதைப்படிக்கப்போகும் நீங்களே எடுத்துக்கொள்ளுங்கள்.

சவூதி அரேபியாவில் வாழ்ந்திருக்கும் நண்பர்கள் (செ.சரவணக்குமார் கவனிக்கவும்) இந்தக் கட்டுரையில் உள்ளவற்றைப் பற்றி அவர்களுடைய கருத்தை தெரிவித்தால் மகிழ்வேன்.

பி.கு - இப்புத்தகம் தமிழில் வந்திருக்கிறதா என்று தெரியவில்லை. தமிழில் இது வரை இப்புத்தகம் மொழிபெயர்க்கப்படவில்லை என்றால், நான் இந்தப் புத்தகத்தை தமிழில் மொழிபெயர்க்க விரும்புகிறேன்.

Abdul Aziz Picture taken from http://www.globalsecurity.org/military/world/gulf/abdulaziz.htm

திரைக்கதை எழுதுவது 'இப்படி' - 14

2012-02-13T23:55:00.000+05:30

சென்ற கட்டுரையில், Inciting Incident மற்றும் Key Incident ஆகிய இரண்டு திரைக்கதையின் பிரிவுகளைப் பற்றிப் பார்த்தோம். அதில், இந்த இரண்டு விஷயங்களைப் பற்றிச் சரியாக விளக்கவில்லை என்பது தெரிந்தது. அதாவது, இந்த இரண்டு 'சம்பவங்களைப்' பற்றி சில கேள்விகள் எழுகின்றன.

1. Inciting Incident என்பது ஒரு குறிப்பிட்ட காட்சி. திரைக்கதையில் ஒரு சுவாரஸ்யமான ஓபனிங் கொடுப்பது. இந்தக் காட்சிக்குப் பின், அடுத்து என்ன நடக்கப்போகிறது என்ற எதிர்பார்ப்பு ஆடியன்ஸுக்கு எழவேண்டும். அத்தகைய ஒரு thumping ஸீனே Inciting Incident என்று அழைக்கப்படுகிறது. அதுவரை ஒகே. ஆனால், அது படத்தின் ஆரம்பத்தில் மட்டும்தான் வரவேண்டுமா? நான் லீனியர் முறையில் - அதாவது, திரைக்கதையின் ஆரம்பம், நடுப்பகுதி மற்றும் முடிவு ஆகியன வரிசையாக எழுதப்படாமல் மாற்றி மாற்றி எழுதப்பட்டிருந்தால், அப்போது எந்த இடத்தில் Inciting Incident வரவேண்டும்?

2. Key Incident என்பது, இன்ஸைட்டிங் இன்ஸிடென்ட்டுக்குப் பின்னால் வருவது. அதாவது, கதையில் இன்ஸைட்டிங் இன்ஸிடென்ட் (சுவாரஸ்யமான ஓபனிங்) என்ற ஒரு ஸீன் நிகழ்ந்தபின், அதற்குப் பிறகு என்ன ஆகிறது என்பதே Key Incident. அப்படியென்றால், இன்ஸைட்டிங் இன்ஸிடென்ட்டுக்குப் பிறகு வரும் திரைக்கதையின் முழுப்பகுதியுமே Key Incident ஆகிவிடுமா? அல்லது Key Incident என்பது இன்ஸைட்டிங் இன்ஸிடென்ட் போல ஒரு குறிப்பிட்ட ஸீன் மட்டுமா?

3. திரைக்கதை எதனைப்பற்றி என்பதைப் புரியவைப்பது என்றால், அப்போது திரைக்கதையின் முதல் Plot Point அல்லவா நினைவு வருகிறது? Key Incident மற்றும் இந்த Plot Point 1 என்பது இரண்டுமே ஒன்றுதானா?

இவற்றைப் பற்றியும் சிட் ஃபீல்ட் பிரித்து மேய்ந்திருக்கிறார். வாருங்கள். இந்தக் கேள்விகளுக்கு விடையைத் தேடுவோம்.

Chapter 8 - The Two Incidents(தொடர்ச்சி)

இந்த இரண்டு சம்பவங்களைப் பற்றி மேலும் சில உதாரணங்கள் கொடுக்கிறார் சிட் ஃபீல்ட். அவைகளைப் பார்ப்போம்.

Bridges of Madison County - க்ளிண்ட் ஈஸ்ட்வுட்டின் இந்த அழகான படத்தில், தொடக்கத்தில், கதாநாயகி ஃப்ரான்செஸ்கா இறப்பது காட்டப்படுகிறது. அவளது மகனும் மகளும், தாயாரின் பொருட்களை அடுக்கிக்கொண்டிருக்கையில், அவளது நாட்குறிப்புகளைப் பார்க்கிறார்கள். அவற்றைப் படிக்கவும் துவங்குகிறார்கள். நாட்குறிப்புகளைக் கண்டுபிடிக்கும் இந்தக் காட்சிதான் இப்படத்தின் Inciting Incident. காரணம், அதிலிருந்துதான் கதை துவங்குகிறது.

Pulp Fiction - ஹனி பன்னியும் அவளது காதலன் பம்ப்கின்னும் ரெஸ்டாரெண்ட்டில் விவாதிக்கும் ஆரம்பக் காட்சி நினைவிருக்கிறதா? இந்தக் காட்சியின் முடிவில், தங்களது துப்பாக்கிகளை உருவி எடுக்கும் இருவரும், அந்த ரெஸ்டாரெண்ட்டைக் கொள்ளையடிக்கும் முயற்சியில் ஈடுபடுகிறார்கள். துப்பாக்கிகளை உருவதோடு காட்சி ஃப்ரீஸ் ஆகி, ஜான் ட்ரவோல்டாவும் ஸாமுவேல் ஜாக்ஸனும் பேசிக்கொண்டிருக்கும் காட்சி தொடங்குகிறது. இந்த சீக்வென்ஸில், இருவரும் துப்பாக்கியை உருவும் காட்சிதான் படத்தின் Inciting Incident.

Lord of the Rings - இப்படத்தின் படத்தின் Inciting Incident என்ன? மோதிரத்தின் கதை விவரிக்கப்படும் ஆரம்பக் காட்சியில், பில்போவிடம் மோதிரம் சிக்கும் காட்சி நினைவிருக்கிறதா? அதுதான். இக்காட்சிக்குப் பின்னர், பில்போவிடம் மோதிரம் வந்தபின்தானே படத்தின் கதை துவங்குகிறது? ஆகவே, இந்த மோதிரத்தின் கதையே படத்தின் Inciting Incident.

இந்த இடத்தில், ஒரு விஷயம். இன்ஸைட்டிங் இன்ஸிடென்ட் என்பது ஒரு ஸீன். அதாவது, சில ஷாட்களின் கலவை. ஒரு சம்பவம். ஆனால், அட்டகாசமான ஜீனியஸ்களின் திரைப்படங்களில், அது ஒரு ஷாட்டாகக் கூட இருக்கலாம். திரைக்கதையில் எது வேண்டுமானாலும் எப்படி வேண்டுமானாலும் இருக்கலாம். 'திரைக்கதையில் விதிகளே இல்லை' என்னும் பிரதான விதியை நினைவுபடுத்திக் கொள்ளுங்கள். ஆனால், இவை எல்லாவற்றுக்கும் ஏதோ ஒரு தொடர்பு இருக்க வேண்டும். மனம்போன போக்கில் அமைந்துவிடக்கூடாது.

Inciting Incident என்பது வேகமான action காட்சிகளைக் கொண்டோ, அல்லது தீவிரமான உணர்ச்சிகளோடு கூடிய காட்சிகளுடனோ இருக்கலாம். உதாரணத்துக்கு, சைனாடவுன் படத்தைப் பற்றி விளக்குகிறார் சிட் ஃபீல்ட். படம் தொடங்கும்போது, துப்பறிவாளர் ஜாக் நிகல்ஸனை, தனது கணவன் இன்னொரு பெண்ணுடன் தொடர்பு கொண்டுள்ளதாகவும், அதனைத் துப்பறியவேண்டும் என்றும் சொல்லி, ஒப்பந்தம் செய்கிறார் ஒரு பெண்மணி. இதுதான் Inciting Incident. அதன்பின், படத்தின் பாதியில், அப்பெண் போலி என்று கதாநாயகன் அறிந்துகொள்கிறான். ஏனெனில், அவன்முன்னர் ஒரிஜினல் பெண்மணி நின்றுகொண்டிருக்கிறாள். இந்தக் காட்சியே Key Incident. அதாவது, படத்தின் திரைக்கதைக்கு சுவாரஸ்யமான துவக்கம் கொடுத்த காட்சி Inciting Incident. அந்தக் காட்சிக்குப் பின்னர் என்ன நடக்கிறது? கதை எப்படி நகர்கிறது? என்பதற்கு ஒரு துவக்கமாக இருக்கும் காட்சி, Key Incident.

Inciting Incident மற்றும் Key Incident ஆகிய இரண்டு காட்சிகளும், ஒன்றோடொன்று தொடர்பு உடையவையாக இருக்கவேண்டும். மேலே சொன்ன உதாரணத்தில், தன்னை ஒரு பெண் ஒப்பந்தம் செய்வதால்தான் அப்பெண்ணின் கணவனைத் துப்பறிய ஆரம்பிக்கிறான் கதாநாயகன். அதனால்தான் அப்பெண் போலி என்றும் அவனுக்குத் தெரிய வருகிறது. ஆகவே, Inciting Incident, திரைக்கதையின் Key Incidentடுக்கு நம்மை இட்டுச் செல்கிறது.

Inciting Incident ---> Key Incident என்பதே தாரக மந்திரம்.

Key Incidentட்டாக இருக்கும் காட்சியைப் படித்தால், கதை எதைப்பற்றி இருக்கிறது என்பது நமக்குத் தெரியவேண்டும். தன்னை அமர்த்திய பெண் ஒரு போலி என்பதைத் தெரிந்துகொண்ட கதாநாயகன், என்ன செய்யப்போகிறான்? அதனைப் பொறுத்தே திரைக்கதை முடிவு அடைகிறது. ஆகவே, Key Incident என்பது, திரைக்கதை என்ன சொல்லப்போகிறது என்பதன் துவக்கமாக இருக்கவேண்டும்.

எந்தத் திரைப்படமாக இருந்தாலும், இந்த இரண்டு காட்சிகளைத் தெரிந்துகொள்வது ஓரளவு சுலபம் என்கிறார் சிட் ஃபீல்ட். லார்ட் ஆஃப் த ரிங்ஸ் படத்தையே மறுபடி எடுத்துக்கொள்வோம். படத்தின் Inciting Incident என்பது, மோதிரத்தின் கதை விவரிக்கப்படும் ஆரம்பக் காட்சி. அப்படியென்றால், படத்தின் Key Incident என்பது எது? Key Incidentடின் வேலை என்ன என்பதை மறுபடி நினைவு கொள்வோம். படத்தின் கதை என்னவாக இருக்கப்போகிறது என்பதற்கு ஒரு துவக்கமாக அமையும் காட்சியே Key Incident அல்லவா? அப்படி, லார்ட் ஆஃப் த ரிங்ஸ் படத்தின் கதை இப்படித்தான் இனி இருக்கப்போகிறது என்பதை நமக்கு உணர்த்தும் காட்சி எது? எந்தக் காட்சியைப் பார்த்தபின், 'ஓஹோ... ரைட். எனக்குப் புரிந்துவிட்டது. இனிமேல் இப்படத்தின் கதை இதுதான்' என்பது நமக்குப் புரிகிறது?

பில்போவின் மோதிரத்தை ஃப்ரோடோ எடுத்துக்கொள்ளும் காட்சி.

மோதிரம் ஃப்ரோடோவின் பொறுப்பில் வந்தபின்னர்தான் படத்தின் போக்கு புரிகிறது அல்லவா? மோதிரம் அழிக்கப்படவேண்டும்; அதனை ஃப்ரோடோதான் செய்ய வேண்டும்; அதற்கு ஃபெலோஷிப் துணை நிற்கும் என்ற அத்தனை நிகழ்ச்சிகளுக்கும் ஆரம்பமாக இருப்பது, ஃப்ரோடோவின் வசம் மோதிரம் வந்தபின்னர்தான் இல்லையா? ஆகவே, அந்தக் காட்சி தான் படத்தின் Key Incident.

இத்திரைக்கதையிலும், இந்த இரண்டு சம்பவங்களும் ஒன்றோடொன்று இணைக்கப்பட்டிருக்கின்றன. மோதிரத்தைப் பற்றி முதலில் நாம் Inciting Incident மூலம் அறிந்துகொள்கிறோம். அதன்பின் அம்மோதிரத்தை ஃப்ரோடோ தனது பொறுப்பில் எடுத்துக்கொண்டு (Key Incident) அதனை அழிப்பதையே ஒரு பயணமாக மேற்கொள்வதையும் அறிந்துகொள்கிறோம். ஆக, இரண்டு நிகழ்ச்சிகளும் ஒன்றோடொன்று சம்மந்தப்பட்டவை.

Key Incident மற்றும் Plot Point 1 ஆகியவை பெரும்பாலும் ஒன்றாகவே இருக்க வாய்ப்புகள் உண்டு என்று சொல்கிறார் சிட் ஃபீல்ட். முதல் ப்ளாட் பாயின்ட் என்பது என்ன? திரைக்கதையின் முதல் பகுதி(முதல் முப்பது பக்கங்கள்)யின் முடிவில், கதையை நோக்கித் திரைக்கதையின் போக்கைத் திருப்பும் ஒரு சம்பவமே முதல் ப்ளாட் பாயின்ட் என்பது நினைவிருக்கிறதல்லவா? அதைத்தானே Key Incidentட்டும் செய்கிறது? ஆனால், இந்த இரண்டும் வேறுவேறாகவும் இருக்கலாம். அது, திரைக்கதையைப் பொறுத்து முடிவு செய்யப்படும் விஷயம்.

இப்போது, இக்கட்டுரையின் ஆரம்பத்தில் கேட்கப்பட்டுள்ள கேள்விகளுக்கு விடை காண முயலலாம். கேள்விகளை ஒருமுறை படித்துக்கொள்ளுங்கள்.

பதில்கள்:

1. நான் லீனியராகத் திரைக்கதை எழுதப்பட்டிருந்தாலும், எப்படியும் அத்திரைக்கதையின் ஆரம்பத்தில் - அதாவது, படத்தின் துவக்கத்தில் Inciting Incident வந்தால்தான் ஆடியன்ஸுக்கு அப்படத்தில் ஒரு சுவாரஸ்யம் ஏற்படும். Inciting Incident திரைக்கதையின் பாதியிலோ அல்லது கடைசியிலோ வருவதால் திரைக்கதைக்கு எந்தப் பயனும் இல்லையல்லவா? Pulp Fiction படத்தை உதாரணமாக எடுத்துக்கொள்ளுங்கள். நான் லீனியர் திரைக்கதைக்கு ஒரு அருமையான உதாரணம் அது. அதில்கூட, ரெஸ்டாரெண்ட்டைக் கொள்ளையடிக்கும் காட்சி, முதலில்தானே வருகிறது?

2. திரைக்கதையின் போக்கைப் புரியவைக்கும் Key Incidentட்டும், படத்தின் ஆரம்பத்தில் வரும் Inciting Incidentட்டுக்குப் பின்னர் அமைந்துள்ள திரைக்கதையின் மீதியும் ஒன்றுதானா? இல்லை. இரண்டும் வேறானவை. Key Incident என்பது ஒரு குறிப்பிட்ட ஸீன் என்பது நண்பர்களுக்குப் புரிந்திருக்கும். திரைக்கதை எதை நோக்கிச் செல்கிறது என்று நமக்குப் புரியும் அந்த ஒரு காட்சி - அதுதான் Key Incident. ஆகவே, திரைக்கதையில் உள்ள ஒரு காட்சியே Key Incident. அதுவே முழுத் திரைக்கதையுமாக ஆகிவிடாது.

3. இதற்கான விடையைக் கொஞ்சம் முன்னர்தான் பார்த்தோம். Key Incident மற்றும் Plot Point 1 ஆகியவை பெரும்பாலும் ஒன்றாகவே இருக்க வாய்ப்புகள் உண்டு என்று சொல்கிறார் சிட் ஃபீல்ட். ஆனால், இந்த இரண்டும் வேறுவேறாகவும் இருக்கலாம். அது, திரைக்கதையைப் பொறுத்து முடிவு செய்யப்படும் விஷயம்.

Inciting Incident, Key Incident ஆகிய இரண்டையும் குழப்பிக்கொண்டுவிடவேண்டாம். இந்தக் கட்டுரையைப் பொறுமையாக இன்னொரு முறை படித்துப் பாருங்கள். அதன்பின், அடுத்த கட்டுரையில், ஒரு டக்கரான படத்தை உதாரணமாக வைத்து, இந்த இரண்டு விஷயங்களைப் பற்றியும் புரிந்து கொள்ள முயற்சிக்கலாம்.

திரைக்கதை என்பதன் அடிப்படை வடிவத்தையே காலி செய்து, படம் பார்ப்பவர்கள் அனைவரையும் மூக்கின்மேல் விரல் மட்டுமல்லாமல் மொத்த கையையும் வைத்து குத்திக்கொள்ள வைத்த அந்தப் படம்.......?

தொடரும் . . . . .

வேற்றுக்கிரகவாசிகளும் பூமியும் - 4

2012-02-10T23:45:00.000+05:30

விண்கலத்திலிருந்து இறங்கிவந்த அந்த 'மனிதர்', க்ளாடிடம் என்ன பேசினார்?

இதைப்பற்றிக் க்ளாட் ஒரு முழு புத்தகமே எழுதியிருக்கிறார். 'Intelligent Design' என்ற அந்தப் புத்தகம், அவரது தளத்தில் இலவசமாகக் கிடைக்கிறது. அப்புத்தகத்தை இங்கே தரவிறக்கிக்கொள்ளலாம்.

அதில் அவர் எழுதியுள்ளதைச் சுருக்கமாகச் சொல்லவேண்டும் என்றால், பூமிக்கு வெகு தொலைவில் இருக்கக்கூடிய ஒரு கிரகம். அதில், மொத்தம் ஏழு பில்லியன் மாந்தர்கள் வசிக்கிறார்கள். பல்லாயிரம் ஆண்டுகளுக்கு முன்னர் - சரியாகச் சொல்லவேண்டும் என்றால் 25,000 ஆண்டுகளுக்கு முன் - தொழில்நுட்பத்தில் வெகுவாக முன்னேறியிருந்த அவர்களுக்கு, அவர்களது விஞ்ஞானப் பரிசோதனைகளை நிகழ்த்த ஒரு களம் வேண்டியிருந்ததால் (உள்நாட்டில் அவைகளை நிகழ்த்தத் தடை இருந்ததாம்), அவர்கள் விண்வெளியெங்கும் தேடிக் கண்டுபிடித்த ஒரு கிரகமே நமது பூமி. இங்கே வந்து இறங்கிய அவர்களது விஞ்ஞானிகள், பல குழுக்களாகப் பிரிந்து பூமியெங்கும் சென்று, ஒவ்வொரு இடத்திலும் நிகழ்த்திய பல பரிசோதனைகளின் விளைவே மனிதர்கள். ஒவ்வொரு குழுவும் ஒவ்வொருவகையில் தங்களது சிருஷ்டிக்கும் திறனைத் திறம்பட நிகழ்த்தியது. மனிதர்களை மட்டுமல்லாமல், அதற்கு முன்னரே பல்வேறு செடிகொடிகளைப் படைத்து, அதன்பின் பல மிருகங்கள், பறவைகள் முதலிய உயிரினங்களைப் படைத்தனர். அதில் திருப்தி அடையாமல், தங்களைப்போலவே சில உயிரினங்களைப் படைக்க முயன்றதன் பலனே மனிதனின் பிறப்பு.

இப்படிப் பல ஆண்டு காலம் அவர்கள் நமது பூமியில் தங்கியிருந்து, பூமியை உயிர்ப்பித்தனர். மனிதன் பிறந்து, பல்கிப் பெருகும் வரை அந்த விஞ்ஞானிகள் இங்கேயே தங்கியிருந்தனர். அந்த மனிதக் கூட்டங்களில், இந்த விஞ்ஞானிகளின் அறிவுத்திறனுக்கு ஏற்ப வளர்ந்திருந்த ஒரு குழு, இப்போது இஸ்ரேல் என்று அழைக்கப்படும் இடத்தில் இருந்தது. இந்த விஞ்ஞானிகளின் தொழில்நுட்பத்தை அறிய அவர்கள் முயன்றனர். அவர்கள் மேல் கருணை கொண்ட சில விஞ்ஞானிகள், படைப்பின் ரகசியத்தை - அதாவது, இவர்கள் மேற்கொண்ட விஞ்ஞானப் பரிசோதனைகளை - அந்த மனிதர்களுக்கு சொல்லிக்கொடுக்கத் தலைப்பட்டனர். எங்கே தாங்கள் படைத்த உயிர்கள் தங்களது தொழில்நுட்பத்தை அறிந்துகொண்டு தங்களுக்கே எமனாகிவிடுவார்களோ என்று பயந்த பிற விஞ்ஞானிகள், அவர்களது கிரகத்தில் இருக்கும் அரசுக்குத் தகவல் கொடுக்க, இந்த குறிப்பிட்ட சில 'துரோகி' விஞ்ஞானிகளை மட்டும் பூமியிலேயே விட்டுவிட்டு, பிறரை உடனடியாகக் கிளம்பி வரச்சொல்லிவிட்டது அவர்களது அரசு. இதனால் பூமியின் அத்தனை பகுதிகளிலும் இருந்த விஞ்ஞானிகள் அத்தனைபேரும் அவர்களது கிரகத்துக்குக் கிளம்பிவிட்டனர். இஸ்ரேல் பகுதியில் இருந்த விஞ்ஞானிகள் மட்டும் மாட்டிக்கொண்டுவிட்டனர். அவர்கள், ஒரு குகையில் சிறைவைக்கப்பட்டனர். மனிதர்கள் அவர்களை அணுகமுடியாதவாறு, சக்திவாய்ந்த ஆயுதங்கள் மூலம் அவர்கள் பாதுகாக்கப்பட்டனர்.

இப்படி இருந்துகொண்டிருந்தபோது, என்ன இருந்தாலும் மனிதர்கள் எப்படியும் ஒருநாள் தங்களது ரகசியங்களை அறியமுற்படுவார்கள் என்று அஞ்சிய வேற்றுக்கிரக அரசு, உலகில் இருக்கும் அத்தனை உயிர்களையும் அழித்துவிட்டு, உலகைப் பழையபடி வெற்று நிலமாக ஆக்கிவிடலாம் என்று முடிவு செய்தது. இந்த முடிவை அறிந்துகொண்ட சிறைப்பட்ட விஞ்ஞானிகள், நோவா (Noah) என்று அழைக்கப்பட்ட மனிதர்களின் தலைவர்களில் ஒருவரை அழைத்து, ஒரு விண்கலம் கட்டும்படியும், வருங்கால உலகத்துக்குத் தேவையான பல உயிரினங்களில் ஒவ்வொரு ஜோடியை அதில் வைத்துக்கொண்டு, பூமியிலிருந்து தப்பித்து, பூமியை விண்வெளியில் சுற்றிவரவேண்டும் என்றும் அவனிடம் கூறினர், தங்களின் படைப்பாளர்களின் ஆணையை ஏற்றுக்கொண்ட நோவா, அவர்களது மேற்பார்வையில் ஒரு விண்கலத்தை உருவாக்கினார். அப்படி உருவாக்கப்பட்ட விண்கலத்தில், ஒவ்வொரு உயிரினத்தின் ஒவ்வொரு செல் மட்டும் பாதுகாக்கப்பட்டது. அதன்பின் அந்த விண்கலம், பூமிக்கு மேல் பறக்கத்துவங்கியது. இதை அறியாத வேற்றுக்கிரக அரசு, ஒரு மிகப்பெரிய கடல் கொந்தளிப்பின் மூலம் உலகை அழித்தது. பூமியில் இருந்த அத்தனை உயிர்களும் அழிந்தன. பெரும் பிரளயம் நிகழ்ந்தது.

சில காலத்துக்குப் பிறகு, இந்த அழிவின் கதிரியக்கம் முற்றிலும் செயலிழந்த பிறகு, நோவாவின் விண்கலம் பூமியில் மறுபடி இறங்கியது. அதில் காப்பாற்றப்பட்டுவந்த செல்களை வைத்து, மறுபடியும் உயிர்கள் படைக்கப்பட்டன.

இதன்பின், இஸ்ரேல் பகுதியில் வாழ்ந்துவந்த மனிதர்கள், ஒரு மிகப்பெரிய ராக்கெட்டை உறுவாக்கினர். இது ஏனெனில், வேற்றுக்கிரகத்துக்கே சென்று, அவர்களின் மன்னிப்பைப் பெற்றுத் திரும்பவே. அதுதான் பைபிளில் சொல்லப்பட்டிருக்கும் பேபல் டவர் (Tower of Babel). ஆனால், இது தெரிந்த வேற்றுக்கிரக அரசு, மறுபடியும் பயந்து, இந்த இஸ்ரேல் பகுதி மனிதர்களை சிறைப்படுத்தி, உலகின் பல்வேறு பகுதியில் வாழ்ந்துவந்த அறிவு குறைந்த மனிதர்களிடையே விட்டுவிட்டது. இதனால், அம்மனிதர்கள் தொழில்நுட்பமே தெரியாத பிற மனிதர்களிடம் எதையும் சொல்ல முடியாமல், அவர்களோடு சேர்ந்து வாழத் துவங்கினர்.

இதுதான் கதைச்சுருக்கம். இன்னும் எக்கச்சக்கமான விஷயங்களை அப்புத்தகத்தில் கிளாட் எழுதியிருக்கிறார்.

இந்தத் தகவல்களை க்ளாடிடம் சொன்ன அந்த வேற்றுக்கிரக மனிதர், க்ளாடை ஒரு இயக்கம் ஆரம்பிக்கச் சொல்கிறார். அதன்படி, உலகம் முழுவதும் இத்தகவல்கள் பரப்பப்படவேண்டும் என்று சொல்லி, உலக மாந்தர்கள் அனைவருக்கும் தங்களது படைப்பாளர்களைப் பற்றிய தகவல்கள் போய்ச்சேர்ந்தால்தான் உலகம் இனிமேல் சண்டை சச்சரவு இல்லாமல் அமைதியாக இருக்கும் என்றும் சொல்கிறார். சொல்லிவிட்டு, அவ்வப்போது க்ளாடிடம் பேசப்போவதாகச் சொல்லிவிட்டு, பைபிளில் இருக்கும் பல அத்தியாயங்களின் பின்னால் இருக்கும் 'உண்மைகளை' டிக்டேட்டும் செய்துவிட்டு, மறைந்துவிடுகிறார்.

இதன்பின் கிளாட் ஆரம்பித்த இயக்கமே 'Raelism'. இந்த இயக்கத்துக்குத் தற்போது ஒரு லட்சத்துக்கும் மேற்பட்ட உறுப்பினர்கள் உண்டு. இந்த இயக்கத்தின் பிதாமகராக விளங்குகிறார் கிளாட். தனது பெயரை 'Rael' என்று மாற்றிக்கொண்டு, உலகெங்கும் பிரசங்கங்கள் நிகழ்த்திக்கொண்டிருக்கிறார்.

இத்தோடு கதை முடியவில்லை. முதல் சந்திப்பின் பின், இரண்டு ஆண்டுகள் கழித்து, க்ளாடின் முயற்சிகளில் திருப்தியடைந்த அந்த வேற்றுக்கிரக மனிதர், க்ளாடை அவர்களது கிரகத்துக்கே அழைத்துச் சென்ற விபரங்களையும் அதே புத்தகத்தில் விலாவாரியாக எழுதிவைத்திருக்கிறார் கிளாட். அந்த கிரகத்தில், இயேசு, முகம்மது, புத்தர் ஆகிய மூவரையும் சந்தித்ததாகவும், அக்கிரகத்திலிருந்து க்ளாடுக்குக் கிடைத்த செய்திகளையும் எழுதிவைத்திருக்கிறார்.

க்ளாடின் கோட்பாடுகளின்படி, கடவுள் என்ற வஸ்து கிடையவே கிடையாது. காரணம், நம்மைப் படைத்தவர்கள் வேற்றுக்கிரக மனிதர்கள் மட்டுமே. அப்படியென்றால் அவர்களைப் படைத்தது யார் என்று அவரிடம் கேட்டால், அவர்களுக்கு முன்னர் வாழ்ந்த இன்னொரு இனம் என்று பதில் அளிக்கிறார். இப்படி அது ஒரு Chain Reaction போலவே செல்கிறது.

இப்படிப்பட்ட கோட்பாடுகளில் இருந்து உருவாக்கப்பட்ட புதிய உலகுக்கான சட்டங்கள் எல்லாவற்றையும் தனது புத்தகத்தில் எழுதியும் வைத்திருக்கிறார். உலகில் ஒரே ஒரு அரசுதான் இருக்கவேண்டும்; அத்தனை மக்களும் ஒருங்கிணைந்து தங்களைப் படைத்த வேற்றுக்கிரக மக்களை டெலிபதியின் மூலம் அழைக்க வேண்டும். அப்போதுதான் அவர்களது வருகை நிகழும். அதன்பின் உலகம் அமைதிப்பூங்காவாக மாறிவிடும். இதுதான் க்ளாடின் கோட்பாடு.

இதில் கவனிக்கத்தக்க விஷயம் என்னவென்றால், இப்படிப்பட்ட ஒரு லட்சம் உறுப்பினர்களிடம் இருந்து பெறப்பட்ட எக்கச்சக்கப் பணத்தில் ஒரு பெரிய மாளிகை கட்டிக்கொண்டு (ஏலியன்கள் வருகைதந்தால் இங்கே தங்குவார்கள்) அதில் சொகுசாக வாழ்ந்துவருகிறார் கிளாட்.

சுருக்கமாக நம்மூர் கார்ப்பரேட் சாமியார்களின் வாழ்வு முறையை வரிக்கு வரி கடைப்பிடித்து வாழ்கிறார் கிளாட். இவரது கோட்பாடு உண்மையா? இவர் உண்மையிலேயே ஏலியன்களின் கிரகத்துக்கு சென்று வந்தாரா? இதுவரை ஒரு ஆதாரத்தையும் இந்த ரீதியாக அவர் காட்டியிருக்கவில்லை. கேட்டால், ஆதாரம் இல்லாமல் ஏலியன்களின் கோட்பாட்டை நாம் நம்ப வேண்டும் என்கிறார்.

க்ளாடின் புத்தகத்தைத் தரவிறக்கி, நேரம் கிடைக்கையில் மேய்ந்துபாருங்கள். நான் ஏற்கெனவே சொல்லியிருந்தபடி, படுசுவாரஸ்யமான திரைக்கதையை இதிலிருந்து உருவாக்கிவிட முடியும்.

அதேபோல், இதோ க்ளாடின் வீடியோ பேட்டி. இதில், அவர் ஏலியனை சந்தித்ததைப் பற்றி விளக்குகிறார்.

யோசித்துப் பார்த்தால், க்ளாடின் கருத்து வசீகரமானது. நம்மைப் படைத்தவர்களையும் வேறு யாரோ படைத்திருக்கிறார்கள் என்பதே அவரது கூற்று. இது ஒரு முடிவில்லாத சுழல் போல. எப்படி இருந்தாலும், இந்த சங்கிலியின் ஆரம்பம் என்று ஒன்று இருக்கவேண்டும் அல்லவா? அது என்ன? என்ற கேள்விக்கு இதுவரை க்ளாடிடம் இருந்து பதிலில்லை.

இவரது ஒரு நிறுவனத்தின் மூலம் (Clonaid), 2002ல் முதல் மனித க்ளோனிங் நடைபெற்றுவிட்டது என்று இன்றுவரை சொல்லிக்கொண்டும் இருக்கிறார். ஆனால் அதற்கும் ஆதாரத்தைத் தரமறுக்கிறார்.

இவரது தகவல்களைக் கொஞ்சம் அலசினாலே அவை ஆதாரமற்ற கூற்றுகள் என்று புரிந்துவிடும். ஆனால், க்ளாடின் சிஷ்யர்களுக்கோ, அவர் சொல்வதே வேதம். ஆகவே, தங்களைப் படைத்த ஏலியன்களை எதிர்நோக்கி வாழ்ந்துவருகிறார்கள் இவரது குழுமத்தினர்.

க்ளாடைப் பற்றிய தகவல்கள், நவீன கால ஏலியன் நம்பிக்கைகளைப் பற்றியது. ஆனால், பண்டைய காலத்திலிருந்து பல புரிபடாத மர்மங்கள் இருக்கின்றனவே? இன்றுவரை எந்த விளக்கமும் இல்லாத, சில்லிட வைக்கும் மர்மங்கள் அவை. அவற்றைப் பற்றி இனி வரும் கட்டுரைகளில் விவாதிக்கலாம்.

இந்த மர்மங்களுக்கு ஏதேனும் ஏலியன் தொடர்புகள் இருக்கின்றனவா?

தொடரும் . . .

வேற்றுக்கிரகவாசிகளும் பூமியும் - 3

2012-02-08T22:47:00.000+05:30

'அளப்பரிய அண்டவெளியில், பூமியில் மட்டுமே உயிர்கள் இருக்கின்றன என்று சொல்வது எப்படியிருக்கிறது என்றால், தானியங்கள் விதைக்கப்பட்ட ஒரு மிகப்பெரிய வயல்வெளியில், ஒரே ஒரு நெல் மட்டுமே விளையும் என்று சொல்வது போல இருக்கிறது' - Metrodorus of Chios 4th century B.C

சென்ற கட்டுரையில் விமானங்களைப் பற்றிய புராண விளக்கங்களைப் பார்த்தோம். இப்போது, ஓரிரு கேள்விகளைப் பார்த்துவிட்டு மேலே செல்லலாம்.

முதலில், புராணம் என்ற கற்பனைக்கதையை நாம் ஏன் மதிக்கவேண்டும்? தற்காலத்தில் நாம் எழுதுவதே வருங்காலத்தில் புராணங்கள் ஆகின்றன அல்லவா? அதில் எழுதப்பட்டிருக்கும் விஷயங்களுக்கு ஏன் மதிப்பைக் கொடுத்து ஆராய வேண்டும்?

இந்தியப் புராணங்களில் மட்டும் இந்த பறக்கும் தட்டுகள் கொடுக்கப்படவில்லை; மாறாக உலகின் வேறு பல புராணங்களிலும் அவைகளைப்பற்றிய செய்திகள் இடம்பெற்றிருக்கின்றன என்று ஏலியன் ஆராய்ச்சியாளர்கள் சொல்லிவருகின்றனர். அவற்றைப் பற்றி விரிவாகப் பார்க்க ஆரம்பிக்கலாம்.

இந்த இடத்தில், இந்தக் கட்டுரையின் ஆரம்பத்தில் கொடுக்கப்பட்டிருக்கும் பண்டையகால கிரேக்கப் பழமொழியை நினைவுகூர்வது பொருத்தமாக இருக்கும் என்று நினைக்கிறேன்.

இப்போது ஒரு சிறிய கற்பனை. இது, எரிக் வான் டேனிக்கென் சொன்னது.

தற்காலத்தில், அண்டவெளியின் எந்த மூலைக்கும் சென்றுவரக்கூடிய அதிவேக ராக்கெட் ஒன்றைக் கண்டுபிடிக்கிறோம் என்று வைத்துக்கொள்ளுங்கள். நமது முதல் நோக்கம் என்னவாக இருக்கும்? நமது பால்வீதிக்கு மிகப் பக்கலில் இருக்கும் ஏதாவது ஒரு பால்வீதிக்குச் சென்று ஆராய வேண்டும் என்பதே நமது நோக்கமாக இருக்கும் அல்லவா? அப்படி ஒரு பால்வீதிக்குள் இருக்கும் ஒரு நட்சத்திரத்தையோ அல்லது கிரகத்தையோ குறி வைத்து அந்த ராக்கெட்டில் நாம் பயணிக்கிறோம். ராக்கெட் அதிவேகத்தில் செல்வதால், சில வருடங்களில் அந்த கிரகத்தை அடைகிறோம்.அங்கே தரையிறங்கும்போது, அந்த கிரகத்தில் வாழ்ந்துகொண்டிருக்கும் உயிர்கள் - நமது நாகரிகத்தை விடப் பன்மடங்கு பின்தங்கியிருக்கும் உயிர்கள் இவை - நமது ராக்கெட்டைப் பார்த்து மிரட்சியடைந்து ஓடி ஒளிகின்றன. நாம் அங்கே இறங்கி, நமது ஆராய்ச்சியை ஆரம்பிக்கிறோம். கொஞ்ச காலத்தில், மெதுவாக வெளியே வரும் அந்த கிரகத்தின் உயிர்களிடம் பேசும் முயற்சியை நாம் ஆரம்பிக்கிறோம். நம்மிடம் பேசுவதற்கே அவர்கள் வெகுவாக பயந்துகொள்கின்றனர். எப்படியோ நம்மிடம் தொடர்பு கொள்ள ஆரம்பிக்கும் அவர்கள், நம்மிடம் இருக்கும் கருவிகளைக் கண்டு நடுங்குகின்றனர் (நெருப்பைக் கக்கும் கை இத்யாதி). மெதுவாகத் தங்களது இனப் பெண் உயிர்களை நமக்கு அனுப்பி, அவர்களைக் காப்பாற்றச் சொல்லிக் கேட்டுக்கொள்கின்றனர். இந்தப் பெண்களுடன் நாம் உறவு கொள்வதன் மூலமாக சில புதிய, அறிவில் சற்றே மேம்பட்ட உயிர்கள் தோன்றுகின்றன. நமது ஆராய்ச்சி முடிந்ததும் அங்கிருந்து நாம் கிளம்பி விடுகிறோம். அதன்பின் வழிவழியாக வரும் அந்த கிரகத்தின் மக்கள், நம்மைப்பற்றிப் புராணங்களையும் கதைகளையும் எழுதுகின்றனர். நம்மைப் பற்றிய கோயில்கள் கட்டப்படுகின்றன. தற்காலத்தில் அங்கு சென்று பார்த்தால், நாம் தான் கடவுளர்கள் என்று நம்பி நம்மை அவர்கள் வழிபட்டுக்கொண்டிருப்பதைக் காணலாம். இன்னொரு கும்பல்,நாம் ஏலியன்கள் தான் என்று நிரூபிக்க முயற்சி செய்துகொண்டிருக்கும். ஆனால் - மைன்ட் யூ - அவர்களிடம், தற்போது (ஏலியன்களாகிய) நம்மிடம் இருப்பதைப்போல் அதிவேகமாக கிரகங்களுக்குச் செல்லும் ராக்கெட்கள் இல்லை. ஆகையால், அவர்களால் எதையும் நிரூபித்து அறிந்துகொள்ள இயலாது. அதற்கு அவர்களுக்கு ஆயிரக்கணக்கான ஆண்டுகள் ஆகும். அந்த இடைவெளியில் - அவர்கள் அறிவினால் முன்னேறும் அந்தக் காலகட்டத்தில் - நமது தொழில்நுட்பமும் எக்கச்சக்கமாக முன்னேறிவிடும். ஆகையால், எப்படியானாலும், நாம்தான் அவர்களைவிட மேம்பட்டவர்களாக இருப்போம். நாம் எப்போது நினைத்தாலும் அவர்களின் கிரகத்துக்கு விஸிட் அடிக்க முடியும். ஆனால், அவர்கள் என்னதான் முயன்றாலும், அடுத்த சில நூறு வருடங்கள் வரை அவர்களால் அவர்களது பால்வீதியையே முழுதாக சுற்ற முடியாத நிலை.

நினைத்துப் பார்ப்பதற்கு சுவாரஸ்யமாக இருக்கிறதல்லவா?

இதுதான் பூமியில் கடவுளர்கள் வந்த கதை. ஏன் இப்படி நடந்திருக்கக்கூடாது என்பது எரிக் வான் டானிக்கென் போன்ற நபர்கள் எடுத்துவைக்கும் வாதம். இது உண்மையாக இருப்பதற்கு சாத்தியக்கூறுகள் உண்டா? அல்லது இதெல்லாம் டுபாக்கூரா என்பதை, கட்டுரைகளின் போக்கில் அலசலாம்.

அத்தியாயம் 2 : Claude Vorilhon (AKA Raël)

இந்த ஏலியன் தியரிகளை உலகெங்கும் பரப்பி வரும் ஒரு நபரைப் பற்றி இப்போது பார்க்கலாம். இவர் பெயர் Claude Vorilhon. நமது வசதிக்காக, இவரை க்ளாட் என்று அழைப்போம்.

இப்போது நான் சொல்லப்போகும் விஷயங்கள், எனது சொந்த சரக்கு அல்ல. இது க்ளாட் எழுதிய புத்தகங்களிலிருந்து தொகுக்கப்பட்டது. ஒருவேளை இது எவரது நம்பிக்கையையாவது காயப்படுத்தினால், அதற்கு முழுப்பொறுப்பு வகிக்கக்கூடியவர் இந்த க்ளாட் மட்டுமே. நானல்ல. ஒரு சுவாரஸ்யமான பொழுதுபோக்கு நாவலுக்குத் தேவையான அத்தனை அம்சங்களும் இவரது புத்தகங்களில் உண்டு.

இந்தப் பீடிகையுடன், மேலே தொடருவோம்.

ஆண்டு 1973. தேதி - டிஸம்பர் 13. ஃப்ரான்ஸின் Clermont -Ferrand பகுதியில், ஒரு எரிமலை. பெயர், Puy -de -Lassolas. அதனுள் ஜாக்கிங் செய்துகொண்டிருக்கிறார் க்ளாட். அன்றைய நாள் வரை அவர் ஒரு ரேஸ் கார் டிரைவர். அவ்வப்போது அந்த எரிமலைக்கு அவரது குடும்பத்தோடு அவர் வருவதுண்டு.

வானமெங்கும் மெல்லிய பனிப்புகை படர்ந்திருக்கிறது. அங்கிருந்து அவர் கிளம்பும் நேரம். கடைசியாக ஒருமுறை, எரிமலையின் உச்சியைச் சுற்றிப் படர்ந்துள்ள பனியைப் பார்க்கிறார் க்ளாட்.

பனியின் மத்தியில் செந்நிற ஒளி. சிறிது நேரத்தில், ஒரு சிறிய ஹெலிகாப்டர் அவரைநோக்கி வருகிறது. பக்கத்தில் வந்ததும், அது ஒரு ஹெலிகாப்டர் அல்ல என்று தெரிகிறது. எங்கும் நிசப்தம். இவரைநோக்கி இறங்கி வரும் 'அதிலிருந்து' ஒரு சிறிய சத்தம் கூட வரவில்லை.

ஆம். அது ஒரு பறக்கும் தட்டு.

கூம்பு வடிவில் அமைந்திருக்கும் அந்தக் கலம், அடியில் மிகவும் தட்டையாக இருக்கிறது. அடிப்பாகத்திலிருந்துதான் அந்த செந்நிற ஒளி வந்துகொண்டிருக்கிறது. கூம்பின் உச்சியில் இருந்து கண்களைக்கூசவைக்கும் வெண்ணிற ஒளி. இவரது அருகில், தரையிலிருந்து இரண்டு மீட்டர்கள் அளவில், அந்தரத்தில் எந்தச் சத்தமும் இன்றி நிற்கிறது அந்தக் கலம். அதன் அடிப்பாகத்திலிருந்து ஒருவிதமான படி தரையை நோக்கி நீள்கிறது.

இதோ... யாரோ அதில் இருந்து இறங்கி வரப்போகிறார்கள். பயமும் எதிர்பார்ப்பும் அவரது இதயத்தைப் பிளக்கின்றன. கடைசியாக, இரண்டு பாதங்கள் அப்படிகளில் இறங்குகின்றன. பாதங்களைத் தொடர்ந்து, இரண்டு கால்கள். இப்போது, க்ளாட் சற்றே ஆசுவாசம் அடைகிறார். காரணம், ஒரு மனிதனைச் சந்திக்கப்போகிறோம் என்பதை, அக்கால்களைக் கண்டதிலிருந்து அவர் புரிந்துகொண்டதே. அதனைத் தொடர்ந்து, நான்கு அடியே உள்ள ஒரு குழந்தை - இல்லையில்லை - ஒரு மனிதன் - இவரை நோக்கி மெதுவாக நடந்துவருகிறான். கருப்பு வண்ண நீள்முடி, தாடி இவற்றோடு சேர்ந்து ஒருவிதமான பச்சை வண்ண நீளமான உடையும் அணிந்திருக்கிறான்.

க்ளாடை நோக்கி மெல்லிய புன்னகை ஒன்றை உதிர்க்கிறார் 'அம்மனிதர்'. க்ளாடின் மனதில் ஆயிரம் கேள்விகள் எழுகின்றன.

அம்மனிதனிடம் ஃப்ரெஞ்ச்சில் பேசத் தலைப்படுகிறார் க்ளாட்.

"எங்கிருந்து வருகிறீர்கள்?"

அதிசயிக்கத்தக்கவிதமாக, ஃப்ரெஞ்ச்சிலேயே பதில் வருகிறது. "மிகத்தொலைவிலிருந்து வருகிறேன்".

"உங்களுக்கு எப்படி ஃப்ரெஞ்ச் புரிகிறது?"

"எனக்கு உலகின் எல்லா மொழிகளும் தெரியும்".

இதன்பின் க்ளாட் அந்த மனிதரிடம் பேசியதாக வெளியிட்டிருக்கும் தகவல்கள் நம்மை அதிரவைக்கக்கூடியவை (என்கிறார் க்ளாட்). படுபயங்கர விறுவிறுப்பான ஒரு படத்தை, இத்தகவல்களை வைத்து எடுக்க முடியும்.

அவை.......?

தொடரும்........

Sherlock (2012): The TV Series - Season 2

2012-02-05T22:27:00.000+05:30

Every fairy tale needs a good old fashioned villain. You need me or you're nothing -because we're just alike, you and I. Except you're boring. U're on the side of the "angels."

ஹோம்ஸும் அவரது பிறவி எதிரி மோரியார்ட்டியும், ஸெய்ண்ட் பார்த்தலோமியோ ஹாஸ்பிடலின் மாடியில் நின்றுகொண்டிருக்கிறார்கள். அங்கே,இருவருக்கிமிடையில் சூடான விவாதம் நடைபெறுகிறது. விறுவிறுப்பான செஸ் விளையாட்டின் மூவ்கள். கரணம் தவறினால் மரணம். இருவரின் மூளைக்குள்ளும் மற்றொருவர் புகுந்துகொண்டு, அடுத்தவர்களின் மூவ்களை யோசித்து, கௌண்ட்டர் செய்யும் ஆபத்தான விளையாட்டு அது.

முடிவில்?

ஷெர்லக் ஹோம்ஸ் ஸ்பெஷல் ஒன்று போடும் அளவுக்கு நமது தளத்தில் எக்கச்சக்கமான ஹோம்ஸ் பற்றிய கட்டுரைகள் மலிந்து கிடக்கின்றன. காரணம், இந்த இரண்டு வருடங்களில், ஹோம்ஸ் பற்றிய பல படைப்புகள் வெளிவந்துவிட்டதுதான். திரைப்படங்களில் ஷெர்லக் ஹோம்ஸ் இரண்டு பாகங்களும், தொலைக்காட்சியிலும் ஷெர்லக் ஸீரீஸின் இரண்டு சீஸன்களும் இந்த இரண்டு வருடங்களில் வந்துவிட்டன. இவையெல்லாவற்றையும் நாம் விரிவாகப் பார்த்துவருவதால், இதோ ஷெர்லக் டிவி தொடரின் இரண்டாவது சீஸனை இப்போது அலசுவோம்.

சென்ற வருடம் ஒளிபரப்பப்பட்ட முதல் சீரீஸின் (க்ளிக்கிப் படிக்கலாம்) பிரம்மாண்டமான வெற்றியைத் தொடர்ந்து இம்முறை, இரண்டாவது சீரீஸில் பிரபலமான மூன்று ஹோம்ஸ் கதைகளைப் படமாக்க முடிவு செய்யப்பட்டது. அப்படி உருவான இரண்டாவது சீரீஸின் மூன்று கதைகளாவன: A Scandal in Belgravia, The Hounds of Baskerville மற்றும் The Reichenbach Fall. இந்த மூன்று எபிஸோட்களின் மூலக்கதைகள்: A Scandal in Bohemia, The Hound of the Baskervilles மற்றும் The Final Problem (கதைகளைக் க்ளிக்கிப் படிக்கலாம்).

ஆர்தர் கானன் டாயலின் ஒரிஜினல் கதைகளைத் தற்காலத்துக்கு ஏற்ப மாற்றி அற்புதம் செய்திருக்கிறார்கள் இதன் க்ரியேட்டர்கள். பொதுவாக இப்படி மாற்றும்போது கண்டபடி சொதப்பி ஆடியன்ஸ் எழுந்து ஓடுவதில்தான் அது முடியும்.ஆனால், இந்த சீரீஸ் அதில் வெற்றிகரமாகக் கொடி நாட்டியிருக்கிறது.

’ஐரீன் அட்லர்’ என்ற பெண்மணியை ஷெர்லக் ஹோம்ஸ் ரசிகர்கள் மறந்துவிடமுடியாது. ஹோம்ஸ் தோல்வியைத் தழுவிய ஒரே கேஸில், அவரை வென்ற பெண். ஷெர்லக் ஹோம்ஸ் திரைப்படங்களிலும் முதல் பாகத்தில் விரிவாகவும் இரண்டாம் பாகத்தில் கௌரவ வேடத்திலும் நடித்த கதாபாத்திரம். திரைப்படங்களில் அவ்வளவு சரியாக இக்கதாபாத்திரம் காட்டப்படவில்லை. இத்தொலைக்காட்சி சீரீஸில், கதைகளில் வரும் அளவு தத்ரூபமாகக் காண்பிக்கப்பட்டிருக்கிறது என்று சொல்லலாம்.

ஒரிஜினல் கதைப்படி, பொஹீமிய இளவரசர் ஒருவரின் திருமணத்தின்போது, அவரது முன்னாள் காதலியான ஐரீன் அட்லர் என்ற பெண், இவர்கள் இருவரும் இணைந்திருக்கும் ஒரு புகைப்படத்தைக் காட்டி இந்த இளவரசரை ப்ளாக்மெய்ல் செய்ய, அந்தப் பெண்ணிடம் இருக்கும் அந்தப் புகைப்படத்தை மீட்க ஹோம்ஸ் செய்யும் முயற்சிகளே மீதிச் சிறுகதை. கதையின் இறுதியில், அப்பெண் வெற்றிகரமாக ஹோம்ஸிடம் இருந்து தப்பித்துச் சென்றுவிடுவாள். புகைப்படத்தோடு. இக்கதையைக் கொஞ்சம் மாற்றி, இங்லாண்ட் அரசுக்குப் பிரச்னை விளைவிக்கக்கூடிய சில ரகசியங்கள் ஐரீன் அட்லர் என்ற பெண்ணின் செல்ஃபோனில் மாட்டிக்கொள்ள, அவற்றை மீட்க ஹோம்ஸ் செய்யும் சாகஸங்களே இரண்டாம் சீரீஸின் முதல் எபிஸோட்.

இதைத்தவிர வேறு எதுவும் நான் சொல்லப்போவதில்லை. ஆனால், இந்த எபிஸோடில் எண்ணற்ற திருப்பங்களும் சம்பவங்களும் உள்ளன. ஒரு நிமிடம் கூட அலுக்காமல் படுவேகமாகச் செல்லும் கதை இது. கதையின் க்ளைமேக்ஸ் மட்டும் எனக்கு மிகச்சிறிய அளவில் ஏமாற்றத்தை ஏற்படுத்தியது. அதற்கு ஒரே காரணம், ஒரிஜினல் கதையையும் இக்கதையும் ஒப்பிட நான் முயற்சி செய்ததே.

இரண்டாவது எபிஸோடில்தான் இதுவரை சாகாவரம் பெற்ற ஹோம்ஸின் அட்டகாசமான தலையாய சாகஸமான ‘ஹௌண்ட் ஆஃப் பாஸ்கர்வில்’ கதையின் சற்றே மாறுபட்ட வடிவம் வருகிறது. மூலக்கதையை இத்துடன் ஒப்பிட முடியாது. இரண்டுக்கும் பல்வேறு வேறுபாடுகள் உள்ளன. இருப்பினும், இக்கதையும் விறுவிறுப்புக்குப் பஞ்சமே இல்லாமல் செல்கிறது.

மூன்றாவதும், இந்த இரண்டாம் சீரிஸின் கடைசி எபிஸோடும் ஆன ’The Reichenbach Fall’ என்ற கதையே இந்த மூன்றிலும் எனக்கு மிகப்பிடித்த கதை. பொதுவாக, ஒரு கதை என்றால், கதாநாயகனுக்கு ஏற்ற வில்லன் ஒருவன் வருவான். அப்படி ஹோம்ஸின் வில்லனின் பெயர் மாரியார்ட்டி என்பது இந்தத் தளத்தில் ஹோம்ஸ் கட்டுரை படித்துவரும் நண்பர்களுக்குத் தெரிந்திருக்கும். ஹோம்ஸுக்கு இணையான மதிநுட்பம் வாய்ந்த ஒரு கதாபாத்திரம். இந்த இரண்டு ஈடிணையற்ற ஜீனியஸ்களும் பொருதிக்கொள்வதே இக்கதை.

ஒரிஜினலாக, ஆர்தர் கானன் டாயல் எழுதிய ‘The Final Problem' என்ற கதையில், ஹோம்ஸ் கதைகளை எழுதி எழுதி அலுப்படைந்திருந்த டாயல், ஹோம்ஸை மாரியார்ட்டியோடு சேர்த்துக் கொன்றுவிட்டார். இருவரும் ஒரு அருவியில் பாய்வதோடு அக்கதை முடிவடைந்திருக்கும். அதன்பின் எண்ணற்ற ஹோம்ஸ் ரசிகர்களின் கடிதங்களுக்குப் பிறகு, ஹோம்ஸை உயிர்ப்பித்தார் டாயல். ஷெர்லக் ஹோம்ஸ்: கேம் ஆஃப் ஷேடோஸ் திரைப்படத்திலும் இதனை வைத்தே எழுதப்பட்ட க்ளைமேக்ஸ் இடம்பெற்றிருக்கும். அதேபோல், ஆனால் க்ளைமேக்ஸில் ஒரு திடுக்கிடும் திருப்பத்தோடு முடிவடையும் கதையே இந்த ’The Reichenbach Fall’.

இந்தக் கதையில் மாரியார்ட்டி ஹோம்ஸுக்கு அடிக்கும் ஆப்புகள் அட்டகாசம்! ஒவ்வொரு ஆப்பிலிருந்தும் தன்னை விடுவித்துக்கொண்டு வெளிவரும் ஹோம்ஸின் முன்னால், எடுத்துச் சொருகிக்கொள்ள அடுத்த ஆப்பு தயாராக இருக்கிறது. அதனை விட்டுவிட்டுச் செல்லவும் முடியாது. ஆகவே, அந்தப் பிரச்னையில் ஹோம்ஸ் மாட்டிக்கொண்டே தீரவேண்டும் என்ற முறையில் மாரியார்ட்டி செக் வைக்கிறார். அது தெரிந்து, ஹோம்ஸ் அதனை எதிர்கொள்கிறார். இதன்பின் என்ன ஆகிறது என்பதே கதை. ஒவ்வொரு நிமிடமும் சீட் நுனியில் என்னை ஆழவைத்த எபிஸொட் இது. ஒரு வசனத்தைக்கூடத் தவறவிட வேண்டாம்.

இந்த மூன்று எபிஸோட்களிலும், ஆர்தர் கானன் டாயலின் கதைகளின் பல்வேறு தலைப்புகள் வந்துசெல்கின்றன. சற்றே மாறுபட்ட முறையில். கதைகளைப் படித்தவன் என்ற முறையில், அவை எனக்கு மகிழ்ச்சியைக் கொடுத்தன. அதேபோல், ஹோம்ஸுக்கும் வாட்ஸனுக்கும் இடையில் உள்ள உறவுமுறை, இந்த இரண்டாம் சீரிஸில் இன்னும் சற்று ஆழமாக ஆராயப்பட்டிருக்கிறது. முதல் சீரீஸில் இது இல்லை. கூடவே, மோல்லிக்கு ஹோம்ஸின் மேல் உள்ள காதல். அத்துடன், ஒரு arrogant asshole ஆக இருக்கும் ஹோம்ஸுக்கு, மற்றவர்கள் தன்னைப்பற்றி நினைப்பதில் முதன்முறையாகக் கவனம் பிறக்கிறது.

ஷெர்லக் ஹோம்ஸ் திரைப்படங்களைப்போல் அதிரடி ஜேம்ஸ்பாண்ட் ஸ்டைலில் இல்லாமல், மூளையை உபயோகிக்கும் ஹோம்ஸின் உண்மையான genreல் அமைந்திருக்கிறது இந்த சீரீஸ். அந்த வகையில், இதுவரை எவ்வகையான மீடியாவிலும் வெளிவந்த ஹோம்ஸ் சித்தரிப்புகளில், தலைசிறந்ததாக அமைந்திருக்கிறது இந்த சீரீஸ். தவறவே விட்டுவிடக்கூடாத ஒரு தொகுப்பு இது. இதனைப் பார்க்காமல் விட்டால், வாழ்வில் ஏதோ ஒரு முக்கியமான விஷயத்தை இழந்துவிட்டீர்கள் என்று பொருள்.

ஷெர்லக் இரண்டாம் சீஸனின் சில காட்சிகள் இங்கே காணலாம். ஷெர்லாக்கின் தத்ரூபமான கதாபாத்திர உருவாக்கத்துக்கு இது ஒரு சிறந்த உதாரணம்.

ஷெர்லக் ஹோம்ஸ் பற்றிய எனது பதிவுகள்:

1. Sherlock Holmes - எச்சரிக்கை - இது திரைப்பட விமர்சனம் அல்ல
2. Sherlock Holmes (2009) - English
3. Sherlock (2010) - The TV Series
4. Sherlock Holmes 2: A Game of Shadows (2011) - Part 1
5. Sherlock Holmes 2: A Game of Shadows (2011) - Part 2

வேற்றுக்கிரகவாசிகளும் பூமியும் - 2

2012-02-03T17:03:00.001+05:30

சென்ற கட்டுரையில், மஹாபாரதத்தில் ந்யூக்ளியர் குண்டுகளின் வர்ணனை வருவதைப்பற்றிப் பார்த்தோம். மேலே தொடருமுன்னர், சில சந்தேகங்களைப் பார்க்கலாம்.

யோவ். மஹாபாரதம் என்பதே ஒரு கதை. கதையில் கண்டபடி எதைவேண்டுமானாலும் எழுதலாமே? அப்படியிருக்கும்போது அதை உண்மை என்று நம்பி, ஏலியன்கள் அவர்களது ஆயுதங்களை உபயோகித்தார்கள் என்று எப்படி எடுத்துக்கொள்ளமுடியும்? இது ஒரு கோணம்.

மஹாபாரதத்தையும், மற்ற உலகின் புராணங்களையும் ஏன் கதை என்று எடுத்துக்கொள்ளவேண்டும்? உண்மையில் நடந்த நிகழ்ச்சிகளின் ஆவணங்களாகக்கூட அவை இருக்கலாமே? இது இன்னொரு கோணம்.

நம்மைப்பொறுத்தவரை, புராணங்கள் உண்மையா பொய்யா என்று அலசுவது இந்தக் கட்டுரைகளின் நோக்கம் அல்ல. அவற்றில் தரப்பட்டிருக்கும் பல்வேறு ஏலியன் சம்மந்தமான விஷயங்களை எடுத்துக்கொண்டு அவற்றை அலசுவதே நோக்கம். புராணங்கள் பொய்யாகவும் இருக்கலாம்; அல்லது அவை உண்மை என்றும் எடுத்துக்கொள்ளலாம். ஆனால், எந்த contextல் அவை இந்த extra terrestrial தகவல்களைத் தருகின்றன என்பதை மட்டுமே நோக்கப்போகிறோம்.

இன்னொரு விஷயம் - இந்தப் புராணங்கள் அடியோடு பொய் என்றோ, அல்லது அப்பட்டமான உண்மை என்றோ நூறு சதவிகிதம் நிரூபிக்கக்கூடிய எந்தத் தகவலும் இதுவரை நமக்குக் கிடைக்கவில்லை என்பதும் உண்மை. ஆகவே, எந்தப் பக்கமும் சாயாமல், இரண்டு கோணங்களிலும் இந்த சுவாரஸ்யமான விஷயங்களை நோக்கலாம்.

இந்திய புராணங்களில் விமானங்கள்

பழங்கால இந்தியாவில், விமானங்களை உருவாக்குவதற்கான அறிவும் ஆற்றலும் கட்டாயம் இருந்தது என்று சில ஆராய்ச்சியாளர்கள் கருதுகிறார்கள். அதற்குக் காரணம், புராணங்களில் குறிப்பிடப்பட்டிருக்கும் விமானங்கள் செய்யும் வழிமுறைதான். குறிப்பாக, 'வைமானிக சாஸ்த்ரம்' என்று ஒரு நூல் - மகர்ஷி பாரத்வாஜரால் செய்யப்பட்டது - இந்த ஆராய்ச்சியாளர்களுக்கு ஆதாரமாகக் கிடைத்துள்ளது. அந்த நூலைப்பற்றித்தான் இப்போது பார்க்கப்போகிறோம்.

யந்த்ர சர்வஸ்வம் என்பதுதான் பாரத்வாஜர் எழுதிய மூல நூல் என்று தெரிகிறது. அதன் ஒரு பகுதியே இந்த வைமானிக சாஸ்த்ரம்.

யந்த்ர சர்வஸ்வம் என்ற இந்த நூல், யந்திரங்கள் என்ற கருவிகள் பற்றிச் சொல்வதாகச் சொல்லப்படுகிறது. இந்த யந்திரங்கள் என்பன தகடில் கோடு கிழித்து உருவாக்கப்படும் தற்கால யந்திரங்கள் அல்ல. முற்காலத்தில், மனிதனால் ஆட்டுவிக்கப்படும் கருவிகளே யந்திரங்கள் என்று அழைக்கப்பட்டு வந்தன. அப்படிப்பட்ட யந்திரங்களைப் பற்றிச் சொல்கையில், விமானங்களைப் பற்றியும் இந்நூல் சொல்வதாகக் கருதப்படுகிறது. இந்த நூலில் இருந்து ஒரு சில எடுத்துக்காட்டுகளைப் பார்க்கலாம். அதன்பின், இந்த நூலின் நம்பகத்தன்மை குறித்தும் விவாதிக்கலாம்.

அதற்கு முன், இந்தப் புத்தகத்தின் சுலோகங்களில் இருந்தே இதைச் செய்தவர் பாரத்வாஜர் என்று தெரிகிறது. இது எந்த வருடத்தில் செய்யப்பட்டது என்றோ, இது ஒரு பழங்காலப் புத்தகம் என்றோ வேறு எந்த ஆதாரமும் இல்லை என்பதையும் நினைவில் கொள்ள வேண்டும்.

'வைமானிக சாஸ்த்ரம்' புத்தகத்தின் விபரங்களுக்கு ஏற்ப வரையப்பட்ட மாதிரி வரைபடம்

இந்த வைமானிக சாஸ்திரத்தின் முதல் அத்தியாயத்தில், பாரத்வாஜ ரிஷி, விமானம் என்ற வார்த்தைக்குப் பொருள் தருகிறார். அப்படித் தரும்போதே, அவருக்கு முன்னால் வாழ்ந்து மறைந்த ரிஷிகள், இந்த விமானம் என்ற வார்த்தையை எவ்வாறாக விளக்கியிருக்கிறார்கள் என்றே அதன் பலவிதமான அர்த்தங்களை விவரிக்கிறார்.

"தரைமேலும் கடலின்மேலும் தனது சொந்த சக்தியினால் பறவையைப்போல் காற்றில் சீறிப்பாயும் ஒன்றே விமானம் எனப்படுகிறது".

"விமான சாஸ்திரத்தை நன்கு தெரிந்தவர்கள், காற்றில் ஒரு இடத்திலிருந்து மற்றொரு இடத்துக்குச் செல்லும் ஒரு பொருளையே விமானம் என்று அழைக்கிறார்கள்"

"காற்றில் ஒரு நாட்டிலிருந்து மற்றொரு நாட்டுக்கும், ஒரு தீவிலிருந்து மற்றொரு தீவுக்கும், ஒரு உலகத்தில் இருந்து மற்றொரு உலகத்துக்கும் செல்லும் திறன் படைத்த ஒன்றையே விமானம் என்று அழைக்கிறார்கள்"

இந்த மூன்று விளக்கங்களால் விமானம் என்ற பொருளை விளக்கியபின்னர், விமானத்தை செலுத்தக்கூடிய நபர் எப்படி இருக்கவேண்டும், எந்த உடை அணிந்திருக்கவேண்டும், விமானத்தைப் பற்றி எந்தவிதமான தகவல்கள் அவனுக்குத் தெரிந்திருக்கவேண்டும் ஆகிய விஷயங்களை மிகவிளக்கமாக விவரித்திருக்கிறார் பாரத்வாஜர். ஒரு விமானிக்கு இதுவிதமாக 32 ரகசியங்கள் தெரிந்திருக்க வேண்டும் என்பது அவருடைய கூற்று. இதைத்தவிர, தனக்கு முன்னால் இருந்த ரிஷிகள் சொல்லியவற்றையும் அவர் எழுதுகிறார். இப்படிப் பல ரிஷிகளின் கூற்றாக ஒரு விமானிக்கு எவையெல்லாம் தெரிந்திருக்கவேண்டும் என்று விளக்குகிறார் பாரத்வாஜர்.

இதற்குப் பிறகு, ஒரு விமானி உண்ணக்கூடிய உணவுகளைப் பற்றிய விவரணை வருகிறது. எந்தெந்த நேரங்களில் விமானி உணவு உண்ணவேண்டும் என்பதும் சொல்லப்படுகிறது. இதற்குப்பிறகு, விமானத்தின் அங்கமாக இருக்கும் பல்வேறு உலோக வகைகளையும் விளக்குகிறார். அந்த உலோகங்களும் கனிமங்களும் பூமியில் எங்கு கிடைக்கும் என்றும் விளக்கம் வருகிறது. உலோகங்கள் இருப்பது இரண்டாம் அத்தியாயம். மூன்றாவது அத்தியாயத்தில், ஒரு விமானத்தில் எங்கெல்லாம் கண்ணாடிகள் இருக்கவேண்டும் என்பது சொல்லப்படுகிறது. அக்கண்ணாடிகளை எப்படி உருவாக்குவது, அவற்றின் பயன்கள் என்ன என்பதும் மிக விரிவாக இதில் இருக்கின்றன.

நான்காவது அத்தியாயத்தில், விமானத்திற்கு எப்படிப் பறப்பதற்கான சக்தி கிடைக்கிறது என்பது சொல்லப்படுகிறது. அச்சக்திகளை உருவாக்கத் தேவையான கருவிகளும் விவரிக்கப்படுகின்றன. ஐந்தாவது அத்தியாயத்தில் இந்தக் கருவிகளை இயக்கம் சூத்திரங்கள் உள்ளன. இந்தப் பலவிதமான கருவிகளை இணைக்கும் ரகசியமும் இதில் உள்ளது. அவை எப்படிச் செயல்படுகின்றன என்பதும் இதிலேயே வந்துவிடுகிறது. இந்த ஐந்தாவது அத்தியாயம்தான் இருப்பதிலேயே பெரிய அத்தியாயமும் கூட.

ஆறாவது அத்தியாயத்தில், பலவகையான விமானங்களைப் பற்றி இருக்கிறது. ஒவ்வொரு யுகத்துக்கும் ஒரு வகையான விமானம். முதல் யுகமான கிருத யுகத்தில் விமானங்கள் இல்லை. ஆகமொத்தம் மூன்று வகையான விமானங்கள் இருக்கின்றன என்பது இதில் உள்ளது. அதன்பிறகு, இந்த மூன்று வகைகளிலும் உள்ள எண்ணிறந்த உள்வகைகள் கொடுக்கப்பட்டிருக்கின்றன. இதன்பிறகு, விமானங்களின் பல்வேறு பாகங்கள்; அவற்றின் நீள அகலங்கள் ஆகியவை சொல்லப்பட்டிருக்கின்றன.

இப்படியாக அந்தப் புத்தகம் முடிகிறது.

விரிவாகப் பல விமானங்களைப் பற்றிச் சொல்லியிருந்தாலும், இந்த விமானங்கள் எப்படிப் பறக்கின்றன என்பது இந்தப் புத்தகத்தில் இல்லை. அதாவது, இதன் செயல்முறை விளக்கம்.

இந்தப் புத்தகத்தின் முதல் பிரதி, 1973ல் அச்சடிக்கப்பட்டிருக்கிறது. சுப்பராய சாஸ்திரி என்பவர், 1914ல் தனது நினைவில் இருந்து இந்த சமஸ்கிருத ஸ்லோகங்களைச் சொன்னதாகவும், அவற்றைப் பிரதி எடுத்து, 20 ஆண்டுகள் மொழிபெயர்க்கப்பட்டு அதன் பின்னர் பல ஆண்டுகள் கழித்து 1973ல் இப்புத்தகம் உருவாக்கப்பட்டதாக இதனைத் தொகுத்த G.R ஜோஸ்யர் என்பவர் புத்தகத்தின் முன்னுரையில் எழுதியிருக்கிறார்.

இந்த வைமானிக சாஸ்திரத்தின் சுலோகங்களை முதன்முதலில் வெளியிட்ட சுப்பராய சாஸ்திரியின் மேற்பார்வையில், ஷிவ்கர் பாபுஜி தல்படே என்ற மகராஷ்ட்ர ஆசாமி, 1895ல் ஒரு விமானத்தை உருவாக்கியதாகவும், அதில் கொஞ்ச நேரம் பறந்ததாகவும் ஒரு குறிப்பு இருக்கிறது. இதைப்பற்றி டைம்ஸ் ஆஃப் இந்தியாவில் செய்தி வந்திருக்கிறது (க்ளிக்கிப் படிக்கலாம்).

ரைட் சகோதரர்களுக்கு எட்டு வருடங்கள் முன்னரே இது நடந்துவிட்டது என்றும், ஆகையால் இவர்தான் உலகின் முதல் விமானத்தில் பறந்தவர் என்றும் இந்தச் செய்தி சொல்கிறது. ஆனால் இதைப்பற்றிய எந்த ஆவணமும் இதுவரை கிடைக்கவில்லை. தல்படே உருவாக்கிய விமானத்தின் பெயர் 'மாருத்சஹா'. இந்த விமானத்தின் மாடல், பெங்களூர் HALல் இருக்கிறது என்றும் இன்னொரு செய்தி உலவிக்கொண்டிருக்கிறது.

இந்த வைமானிக சாஸ்த்ரம் உண்மையா? அல்லது பொய்யா?

ஒருவேளை இது உண்மை என்றே வைத்துக்கொள்ளலாம். அப்படியென்றால், பழங்கால மக்களுக்கு விமானங்கள் செய்யக் கற்றுக்கொடுத்தது யார்? வேற்றுக்கிரகங்களிலிருந்து பூமிக்கு வந்த மனிதர்களா?

பழங்கால இந்திய புராணங்களில், பூமியிலிருந்து வேறு உலகங்களுக்குச் சென்ற மனிதர்களைப் பற்றிப் பல கதைகள் இருக்கின்றன. நமது ஔவையாரே பூமியில் இருந்து சுயநினைவுடன் கைலாசத்துக்கு ஒரே ஜம்ப்பில் சென்று அடைந்ததாக ஒரு கதை இருக்கிறதே? அவரை அப்படித் தூக்கிவிட்டவர் பிள்ளையார் என்றும் அதே கதை சொல்கிறது.

ஒருவேளை இந்த வைமானிக சாஸ்த்ரம் பொய் என்று வைத்துக்கொண்டால்? அதையும் விபரமாகப் பார்க்கத்தான் போகிறோம்.

தொடரும் . . .

Vymanik Sasthra Photo Courtesy - http://www.hinduwisdom.info/Vimanas3.htm

வேற்றுக்கிரகவாசிகளும் பூமியும்

2012-02-02T15:01:00.001+05:30

'If, in fact, we are able to find life or to answer the question 'Are we alone?' then that certainly is grand enough and noble enough to be the enduring legacy of our civilization - NASA'
'We have no proof, But if we extrapolate, based on the best information we have available to us, we have to come to the conclusion that ... other life probably exists out there and perhaps in many places - Neil Armstrong, Oct 21, 1999'
'We all know UFOs are real. All we need to ask is where are they from - Dr. Edgar Mitchell, 1971'

இந்த அண்டவெளியில், நாம் தனியாக இருக்கிறோமா? அதாவது, நமது பூமியைத் தவிர வேறு எங்காவது உயிரினங்கள் வாழ்ந்துகொண்டிருக்கின்றனவா?

பில்லியன் டாலர் மதிப்புடைய கேள்வி. இந்தப் பூமியில் உள்ள ஒவ்வொரு மனிதனின் மனத்திலும் எப்போதாவது, ஏதோ ஒரு வடிவத்தில் எழும் கேள்வி இது. இதற்கு விடை, அவ்வளவு சுலபத்தில் கண்டுபிடித்துவிடக்கூடிய அளவு சுலபம் அல்ல என்பது இந்தக் கேள்வியை இன்னும் மர்மமாக மாற்றுகிறது.

உயிர்மையில் நமது ராஜ் சிவா எழுதிவரும் '2012இல் உலக அழிவும், மாயா இன மக்களும்' என்ற தொடரை வெகு சமீபத்தில் தான் படிக்க நேர்ந்தது. அந்தத் தொடரைப் படிக்கையில், எனது சிறுவயதில் வானமண்டல மனிதர்கள் பற்றிய புத்தகங்களைப் படித்தது நினைவு வந்தது. அந்த நினைவுகள் உந்தித் தள்ள, இணையத்தில் ஒரு முழு நாள் இது பற்றிச் செலவிட்டேன். சிறுவயதில் படித்த புத்தகங்களைத் தேடிப்பிடித்தது மட்டுமல்லாது, இந்த 20 வருடங்களில் மேன்மேலும் வந்திருக்கக்கூடிய பல ஆராய்ச்சிக்கட்டுரைகள், புதிய புத்தகங்கள் ஆகியனவற்றையும் ஒரே மூச்சில் படித்தேன்; படித்துக்கொண்டும் இருக்கிறேன். படித்ததை நண்பர்களுடன் பகிரலாம் என்பதே நோக்கம். இது ஒரு விவாதமாகவும் இருக்கட்டும். படிக்கும் நண்பர்கள், உங்கள் கருத்துகளையும் எழுதலாம். ஒருவகையில் பார்த்தால், மறந்தே போயிருந்த பல விஷயங்கள், ராஜ் சிவாவினால் நினைவு வந்தன. ஆகவே, அவருக்கே முதல் நன்றி.

கட்டுரையை ஆரம்பிக்கும் முன்னர், இன்னொருவரைப் பற்றியும் விரிவாகச் சொல்லியே ஆக வேண்டும்.

விக்கிரவாண்டி ரவிச்சந்திரன்.

ஆவிகளைப் பற்றிப் படிக்கும் யாருக்கும் அவ்வளவு சுலபமாக மறந்துவிடாத பெயர். எனக்குத் தெரிந்து கிட்டத்தட்ட 25 ஆண்டுகளாக ஆவிகளைப் பற்றியும், occult விஷயங்களைப் பற்றியும் எழுதிவருகிறார். இவர் எழுதிய ஒரு புத்தகத்தின் பெயர் 'அறிவுக்கு அப்பாற்பட்ட அதிசய சக்திகள்'. இந்தப் புத்தகத்தை, எனது தந்தையின் மூலம், எனது பத்தாவது வயதில் படிக்க நேர்ந்தது. அக்காலத்தில் எப்போது பார்த்தாலும் புத்தகங்களைக் கட்டிக்கொண்டு மாரடித்து வந்ததால், இப்புத்தகத்தைப் படிப்பது கடினமாக இருக்கவில்லை. அப்புத்தகத்தின் மூலம் பல அதிசய மனிதர்களைப் பற்றித் தெரிந்துகொண்டேன். ரஸ்புடீன், அரிகோ, யூரி கெல்லர், மாயன்களின் அரசன் குக்குல்கன், சகுந்தலா தேவி, நெப்போலியன் எகிப்து சென்ற மர்மம் ஆகிய பல விஷயங்கள் அவற்றில் விரிவாக எழுதப்பட்டிருக்கும். துறுதுறுப்பான ஒரு சிறுவனுக்கு இந்த விஷயங்கள் எப்பேர்ப்பட்ட ஒரு உலகத்தைத் திறந்துவிட்டிருக்கும் என்பதை எண்ணிப் பாருங்கள்.

அந்தப் புத்தகத்தில் நான் படித்த மறக்க முடியாத இன்னொரு பெயர்: Erich Von Daniken. பண்டைய காலத்தில் வேற்றுக்கிரக வாசிகள் பூமிக்கு வந்தது உண்மைதான் என்று பல புத்தகங்கள் எழுதி வெளியிட்டிருக்கும் மனிதர் இவர். இவரைப் பற்றியும் விக்கிரவாண்டி ரவிச்சந்திரன் நமக்கு அறிமுகம் செய்திருக்கிறார். இரண்டு decades முன்பே. அதனைத்தொடர்ந்து, பள்ளி இறுதி ஆண்டுகளில் எரிக் வான் டேனிக்கென் எழுதிய 'Chariots of Gods' புத்தகம் கிடைத்தது. அதுவும் ஒரு மறக்கமுடியாத புத்தகம்தான்.

இந்த டேனிக்கெனை விகடனில் மதன் பேட்டி கண்டு எழுதியிருக்கிறார். பல்லாண்டுகளுக்கு முன்பு. அதைப் படித்ததும் நன்றாக நினைவிருக்கிறது. அதில், மதனை வரவேற்கும்போதே, 'உங்கள் ஊர் ராமர் கூட வேற்றுக்கிரக வாசிதான் தெரியுமா?' என்று டேனிக்கென் கேட்ட கேள்வியை மதன் எழுதியிருப்பார்.

அவர் எழுதிய பல விஷயங்கள் இப்போது ஹம்பக் என்று சொல்லப்பட்டு வருகின்றன. என்றாலும், அவற்றில் அவர் என்ன சொல்லியிருக்கிறார் என்பதை முடிந்தால் விபரமாகப் பார்ப்போம்.

அவரைப்போலவே இந்தத் துறையில் பல்லாண்டுகளாகப் பழம் தின்று கோட்டை போட்ட மனிதர்கள் எழுதிய சில புத்தகங்களையும் முடிந்தால் அலசலாம். அவற்றில் அவர்கள் எழுதியுள்ள விபரங்கள், ஆச்சரியமாகவும் மலைப்பாகவும் இருக்கும். அவைகளை உண்மை என்று எடுத்துக்கொள்ளாவிட்டாலும் கூட, சற்று நேரம் வேற்றுக்கிரக வாசிகள், UFOக்கள், அவர்களின் மொழிகள், பறக்கும் தட்டுகள் ஆகியவற்றின் நினைவில் ஆழ்ந்து இன்புறலாம் வாருங்கள்.

அப்படியே, இந்த விஷயங்கள் உண்மையா? அல்லது பொய்யா? என்ற வகையில் பல தகவல்களையும் பார்க்கப்போகிறோம். அதிலேயே மாயன்கள், சுமேரியர்கள் ஆகியவர்களைப் பற்றிய தகவல்களையும் தொட்டுச்செல்லலாம். பலவற்றை ராஜ் சிவா ஏற்கெனவே எழுதிவிட்டார். ஆகவே, அவற்றை ஒரு highlight போலப் பார்க்கலாம்.

சரி. முன்னுரை போதும். ஆரம்பிக்கலாமா?

1. சரித்திரம் சொல்லும் Alien கதைகள்

மனிதகுலத்தில் பல்வேறு இனங்களில் வழங்கி வரும் புராணங்களை எடுத்துக்கொண்டால், அவைகள் எல்லாவற்றிலும் பல ஆச்சரியங்கள் நிறைந்திருக்கின்றன. கிட்டத்தட்ட இவைகள் அனைத்துமே, வானில் இருந்து இறங்கிய 'கடவுளர்'களைப் பற்றிப்பல தகவல்களைச் சொல்கின்றன. அவைகளைப் பற்றிக் கொஞ்சம் பார்க்கலாம். மனிதகுலத்தின் ஆதிமூலம், அவர்களது புராணங்களே என்பதால், இந்த referenceகள் அவசியம். மட்டுமில்லாமல், அவைகளில் சொல்லப்பட்டிருக்கும் fantasized விஷயங்கள் படிப்பதற்கும் சுவாரஸ்யமாக இருக்கும்.

இந்தியாவிலிருந்தே ஆரம்பிப்போம்.

நாம் எடுத்துக்கொள்ளப்போகும் புராணம், மஹாபாரதம். ராமாயணத்திலும் ஆச்சரியமான UFO குறிப்புகள் உண்டு என்றாலும் (புஷ்பக விமானம்), மஹாபாரதத்தில், உலகின் எந்த UFO குறிப்புகளையும் தூக்கிச் சாப்பிட்டுவிடக்கூடிய தகவல்கள் நிறைந்துள்ளதால், அதில் உள்ள விபரங்களைக் கொஞ்சம் விரிவாகப் பார்க்கலாம். எனக்கு மஹாபாரதத்தைப் பற்றித் தெரிந்தவைகளையும் (அதிலிருக்கும் முக்காலே மூணு வீச கதைகள் எனக்கு அத்துப்படி), UFO ஆராய்ச்சியாளர்களின் கூற்றையும், மறந்துபோன சில தகவல்கள் இணையத்திலிருந்தும் கொடுக்கிறேன்.

மஹாபாரதத்தின் தொடக்கத்திலேயே, 'கடவுளர்கள்' குந்திதேவிக்குக் குழந்தைகளை அருளியது பற்றிச் சொல்லப்பட்டிருக்கிறது. துர்வாசர் சொல்லிக்கொடுத்த ஒரு மந்திரத்தைச் சொல்லி ஒரு குறிப்பிட்ட கடவுளை நினைத்தால், அந்தக் கடவுளின் குழந்தை அம்மந்திரத்தைச் சொல்லும் பெண்ணின் வயிற்றில் உருவாகிவிடும். அப்படி அதனை உபயோகித்து உருவான குழந்தைகளே கர்ணன் (சூரியன்), யுதிஷ்டிரன் என்னும் தர்மன் (எமனின் குழந்தை), பீமன் (வாயு), அர்ஜுனன் (இந்த்ரன்), நகுலன் மற்றும் சகதேவன் (அஸ்வினி தேவர்கள்). இதில் நகுலனும் சகதேவனும் பாண்டுவின் இரண்டாம் மனைவியான மாத்ரிக்குப் பிறந்தவர்கள்.

மஹாபாரதத்தில் சிவன் அழித்த மூன்று அசுரர்களைப் பற்றிய கதையும் வருகிறது. கர்ண பர்வத்தில் இக்கதை விபரமாகச் சொல்லப்பட்டிருக்கிறது. த்ரிபுரர்கள் என்று சொல்லப்பட்ட மூன்று அசுரர்களுக்கு, மூன்று பெரிய நகரங்களை தேவர்களின் சிற்பியான மயன் வானில் கட்டிக்கொடுத்த கதையும், அந்த பிரம்மாண்டமான நகரங்கள் ஒரே வட்டப்பாதையில் சுற்றிக்கொண்டிருந்ததும், அந்நகரங்களை எப்படி ஒரே ஆயுதத்தைப் பயன்படுத்தி சிவன் அழித்தார் என்பதும் விபரமாகச் சொல்லப்பட்டிருக்கிறது (இதே கதையில், தனது புன்னகையாலேயே அந்நகரங்களை சிவன் அழித்ததாக மற்றொரு பாடபேதம் உண்டு). மூன்று நகரங்கள் வானில் சுற்றிக்கொண்டிருந்தன என்று பாரதத்தில் வருவது, ஒருவேளை ஏலியன்களின் பறக்கும் தட்டுதானோ?

மஹாபாரதத்தின் துரோண பர்வத்தில், 201 வது அத்தியாயத்தில், துரோணரின் மகனான அஸ்வத்தாமா, தண்ணீரிலிருந்து எப்படி ஆக்நேயாஸ்திரம் என்ற ஒன்றைப் பாண்டவர்களின் மீது பிரயோகித்தான் என்று விபரமாகக் குறிப்பிடப்பட்டுள்ளது. அந்த அஸ்திரத்தை அஸ்வத்தாமா எய்தவுடன் - 'அந்த ஆயுதத்திலிருந்து அம்பு மழை அர்ஜுனனின் மீது பொழிந்தது; உலகமே இருண்டு போனது; வானத்திலிருந்து எரிகற்கள் விழுந்தன; வெப்பம் கடுமையாக அதிகரித்தது; சூரியன் கண்ணுக்கே தெரியவில்லை; ஆயிரமாயிரம் ரதங்கள் ஒரே நொடியில் எரிக்கப்பட்டன; யானைகள் செத்து விழுந்தன; சில யானைகள் வெறிகொண்டு பிளிறியபடி அங்குமிங்கும் ஓடின; பாண்டவப் படையில் இருந்த பல வீரர்கள் முற்றியும் எரிந்து சாம்பலாயினர்; மொத்தத்தில், நெருப்பின் கடவுளான அக்னி, பாண்டவர்களைக் கபளீகரம் செய்ததுபோல் இருந்தது' - என்று குறிப்பிடப்பட்டிருக்கிறது.

இந்த அத்தனை symptomகளும், ஹிரோஷிமா அல்லது நாகசாகியிலிருந்துகொண்டு நேரடி ஒளிபரப்பு செய்ததைப்போல் இருக்கிறதல்லவா?

மஹாபாரதத்தில் வரும் extra terrestrial விஷயங்களுக்கு இது ஒரு எடுத்துக்காட்டு என்று இந்த alien ஆராய்ச்சியாளர்கள் சொல்கின்றனர்.

இது தவிர, அமெரிக்க விஞ்ஞானி ராபர்ட் ஆப்பன்ஹீமர் - அணுகுண்டின் தந்தை என்று அழைக்கப்படுபவர் - உலகின் முதல் ந்யூக்ளியர் குண்டு வெடிக்கப்பட்டபோது, அந்த அனுபவம் எப்படி இருந்தது என்று அவரைப் பத்திரிகை நிருபர்கள் கேட்டனர். அப்போது அவர் சொன்ன quote உலகப்பிரசித்தி பெற்றது. அந்த quote, நமது பகவத்கீதையிலிருந்தே எடுக்கப்பட்டது. அர்ஜுனனுக்குத் தனது விஸ்வரூபத்தைக் கண்ணன் காண்பிக்கையில், பயத்தில் நடுநடுங்கிக்கொண்டே அர்ஜுனன் சொல்லும் ஒரு ஸ்லோகம் அது.

'ஆயிரம் சூரியன்கள் ஒரே சமயத்தில் வானில் உதித்தால் எப்படி இருக்குமோ அப்படி உனது ஒளி என் கண்களைக் கூசவைக்கிறது'

மட்டுமல்லாமல், அப்போது கண்ணன் சொல்லிய 'நானே காலன். உலகை அழிப்பவன்' என்ற ஸ்லோகத்தையும் அவர் குறிப்பிட்டார்.

அவர் இந்த ஸ்லோகத்தைப் பற்றிப் பேசும் வீடியோ இங்கே காணலாம்.

அவரிடம், இதுதான் உலகின் முதல் ந்யூக்ளியர் குண்டுவெடிப்பா என்று பத்திரிக்கையாளர்கள் வினவியபோது, 'நவீனகாலத்தில் என்றால், ஆமாம்' என்று பதிலளித்தும் இருக்கிறார்.

இப்படி, பண்டைய காலத்தில் ந்யூக்ளியர் குண்டின் சக்தியை ஒத்த ஆயுதங்கள் பிரயோகிக்கப்பட்டதே, அவைகளை பூமிக்குக் கொண்டு வந்த ஏலியன்களின் இருப்பை உறுதிப்படுத்துவதாக ஏலியன் ஆராய்ச்சியாளர்கள் சொல்கின்றனர்.

இந்துமதத்தில் மட்டுமல்ல. வேறு பல மதங்களின் புராணங்களிலும் ஏலியன்களைப் பற்றிய செய்திகள் நிறைந்துள்ளன. அவற்றைப் பற்றி அடுத்த கட்டுரையில் காணலாம். அப்படியே இந்தச் செய்திகள் உண்மையா டுபாக்கூரா என்றும் அலசலாம்.

தொடரும் . . . .

கிம் டாட்காமும் காப்புரிமை மீறலும்

2012-01-31T14:36:00.000+05:30

ஜனவரி 20 ம் தேதி, கிம் டாட்காம் என்ற கிம் ஷ்மிட்ஸ், ந்யூஸிலாண்ட் போலீசாரால் கைது செய்யப்பட்டார்.

இது வெறும் செய்திதான். ஆனால் இதன்பின்னால் இருக்கும் விஷயங்கள் அத்தனையும் மிகவும் முக்கியமானவை. குறிப்பாக, SOPA மற்றும் PIPA பற்றித் தெரிந்துவைத்திருக்கும் நபர்களுக்கு. காப்புரிமை மீறல் என்ற குற்றம் விளைவித்திருக்கும் தண்டனைதான் இது. காப்புரிமை மீறல் பற்றி அவ்வப்போது நாம் பார்த்து வந்திருப்பதால், இதைப்பற்றித் தெரிந்துகொள்வது நமக்கு முக்கியமானதாகிறது.

Megaupload என்ற தளத்தைப் பற்றிப் பலருக்கும் தெரிந்திருக்கும். இணையத்தில் மிகப்பிரபலமான ஃபைல் ஷேரிங் தளம் இது. இதில் பலவிதமான தகவல்கள் - பெரும்பாலும் திரைப்படங்கள், மென்பொருட்கள் ஆகியன - பகிரப்பட்டன. இந்தத் தளத்தின் உரிமையாளர் தான் கிம் டாட்காம். இவர்தான் ஜனவரியில் கைது செய்யப்பட்டிருக்கிறார்.

இவர் கைது செய்யப்பட்டதற்குக் காரணம், அமெரிக்க சட்டத்துறை, காப்புரிமை மீறல் சம்மந்தமாக இவர் மேல் போட்ட வழக்குதான். பொதுவாக, அமெரிக்காவில் வழக்கு போடப்பட்டால் அவ்வழக்கின் காரணமாக வெளிநாட்டில் இருக்கும் ஒரு நபர் கைது செய்யப்படுவது சற்றே அரிது. இருப்பினும், மெகா அப்லோட் தளம் விளைவித்த பல மில்லியன் டாலர் நஷ்டத்தின் காரணமாக, இவ்வழக்கு மிகத்தீவிரமாக எடுத்துக்கொள்ளப்பட்டு, அதன் விளைவாக, ந்யூஸிலாண்டில் வாழ்ந்துவந்த கிம் டாட்காம் கைதுசெய்யப்பட்டிருக்கிறார். இவரோடு சேர்ந்து மொத்தம் நான்கு பேரை அமேரிக்கா அள்ளியிருக்கிறது.

இந்தக் கைது, SOPA மற்றும் PIPA ஆகிய காப்புரிமை மீறல் தடைச்சட்டங்கள் ஒப்புக்கொள்ளப்படுவதற்கு முன்னரே நடந்திருக்கிறது என்பது குறிப்பிடத்தக்கது. நான் ஏற்கெனவே குறிப்பிட்டது போல, இந்த இரண்டு மசோதாக்களும் சட்டங்களாக மாறினால், இணையத்தில் மிகக்கடுமையான தணிக்கை முறை அமல்படுத்தப்படுவதற்கான அத்தனை சாத்தியக்கூறுகளும் உள்ளன. ஆனால், அப்படி அவை ஏற்றுக்கொள்ளப்படுவதற்கு முன்னரே இந்தக் கைது நடந்திருப்பது, அமேரிக்கா இனியும் காப்புரிமை மீறலை சும்மா விட்டுவிடாது என்பதையே உணர்த்துகிறது.

மெகா அப்லோட் தளமும், அதனைச் சார்ந்த பிற தளங்களும் உடனடியாக முடக்கப்பட்டுவிட்டன. அந்தத் தளங்களில், FBI வெளியிட்டிருக்கும் செய்தி இணைக்கப்பட்டுள்ளது.

மெகா அப்லோட் தளத்துடன் ஒப்பிடக்கூடிய வகையில் வேறு சில தளங்களும் உள்ளன. Rapidshare பற்றி இதைப்படிக்கும் நண்பர்கள் கேள்விப்பட்டிருக்கலாம். அந்தத் தளத்தில் இல்லாத திரைப்படங்களே இல்லை என்னும் அளவுக்கு அதில் காப்புரிமை மீறல் நடந்துகொண்டிருக்கிறது. கிம் டாட்காமின் கைதைத் தொடர்ந்து, இதைப்போன்ற பிற ஃபைல் ஷேரிங் தளங்கள் நடுக்கத்தில் உள்ளன. என்னதான் ரேபிட்ஷேர் நிர்வாகிகள் தங்களுக்கும் இந்தக் கைதுக்கும் சம்மந்தமோ வருத்தமோ இல்லை என்று அறிக்கை விட்டிருந்தாலும், எந்த நேரத்திலும் இவைகளும் முடக்கப்படலாம் என்றே தெரிகிறது.

இந்தத் தளங்கள் முடக்கப்பட்டதில் உள்ள பிரச்னை என்னவெனில், பல இணையதள உபயோகிப்பாளர்கள் அப்லோட் செய்திருந்த தனிப்பட்ட ஃபைல்களும் முடக்கப்பட்டுவிட்டதுதான். பல பள்ளிகள், கல்லூரிகள் ஆகியவை அப்லோட் செய்திருந்த அவர்களது ரெகார்ட்கள் மொத்தமாக முடக்கப்பட்டுவிட்டன.

என்னதான் அமேரிக்கா ஒரு முதலாளித்துவ நாடு என்றாலும், அதன் இந்தக் குறிப்பிட்ட செயல், அவசியம் தேவையான ஒன்றுதான் என்று எனக்குத் தோன்றுகிறது. ஆனால், நான் ஏற்கெனவே எழுதியிருந்ததைப்போல், SOPA மற்றும் PIPA சட்டங்களை உபயோகப்படுத்தி, தேவையில்லாத பிரச்னைகளை அமேரிக்கா செய்துவிடக்கூடாது. அந்தச் சட்டங்களே தேவையில்லை என்பதே இன்னமும் என் நிலைப்பாடு. அதனை, அந்தச் சட்டங்கள் வருமுன்னரே நடந்துவிட்ட இந்தக் கைது நமக்குத் தெரியப்படுத்துகிறது. அந்தச் சட்டங்களே இல்லாமல் இதைப்போன்ற காப்புரிமை மீறல்களைத் தடுத்துவிட முடியும். அந்த இரண்டு சட்டங்கள் வந்தால், யாரை வேண்டுமானாலும் எந்தக் கேள்வியும் இல்லாமலேயே கைது செய்துவிட முடியும் என்பது ஆபத்தான ஒன்று.

இது ஒரு ஆரம்பம் தான். இணையதளத்தில் பரவலாக இருக்கும் காப்புரிமை மீறலை ஒரு பிடி பிடித்துவிட்டு, அமேரிக்காவின் பார்வை, திருட்டுத்தனமாகக் காப்பியடிக்கப்படும் திரைப்படங்களை நோக்கித் திரும்ப அத்தனை வாய்ப்புகளும் உள்ளன என்றே அமேரிக்காவின் இந்த மூவ்கள் தெரிவிக்கின்றன. அப்படி மட்டும் ஒரே ஒரு முறை நடந்துவிட்டால், அதற்குப் பின் இந்தியாவில் -குறிப்பாக ஹிந்தியிலும் தமிழிலும் - இப்படிப்பட்ட காப்பிகள் வெளிவராமல் நின்றுவிடும். ஆரோக்கியமான திரைப்படங்கள் வெளிவர அது வழிவகுக்கும்.

எப்பொழுதெல்லாம் தமிழ்ப்பட காப்பிகளைப் பற்றி நான் எழுதியிருக்கிறேனோ, அப்பொழுதெல்லாம் காப்பிகளை ஆதரித்தே எழுதும் சில 'பிரபல' நண்பர்களைக் கவனித்து வந்திருக்கிறேன். அவர்களுக்கு இந்தக் கட்டுரையை டெடிகேட் செய்கிறேன். அவர்களை, SOPA, PIPA மற்றும் கிம் டாட்காமின் கைதைப்பற்றி மேலும் தகவல்களைப் படிக்குமாறு கேட்டுக்கொள்கிறேன்.

பி.கு 1 - கோவாவில் இருந்து நான் திரும்பி வந்ததும் சுடச்சுட இந்தச் செய்தியைப் பகிர்ந்த முரளிக்கு நன்றி.

பி.கு 2 - SOPA மற்றும் PIPA என்பவை என்ன? ஏதேனும் கால்பந்து அணிகளா என்று கேட்கும் நண்பர்களுக்கு, நான் எழுதிய இந்தக் கட்டுரையைப் பரிந்துரை செய்கிறேன்.

கருந்தேள் டைம்ஸ் 5 - SOPA & PIPA

2012-01-18T18:30:00.000+05:30

கருந்தேள் டைம்ஸ் என்ற இந்த வகையான பதிவுகளைக் கடைசியாக எழுதி ஒரு வருடத்துக்கு மேல் ஆகிறது. காரணம் மிகவும் சிம்பிள். எனக்கு எழுத வராது. திரைப்படங்களைப் பற்றி எழுதுவதே போதும் என்று நினைத்து வந்தேன். ஆனால் இப்போது இதனை மறுபடி எழுத நினைத்தது, நண்பர் பாலகிருஷ்ணன், SOPA & PIPA பற்றி ஒரு கட்டுரை எழுத முடியுமா என்று கேட்டதால்தான். எழுதத் துவங்குமுன்னர் அவற்றைப் பற்றி முதலில் நன்றாகத் தெரிந்துகொள்ளவேண்டும் அல்லவா? ஆகவே அவற்றைப் பற்றி விரிவாக இணையத்தின் உதவியால் படித்தேன். அப்படி நான் படித்தவற்றைப் பற்றி முடிந்த அளவில் எளிமையாக எழுத முயல்கிறேன். இவற்றைப் பற்றிய சில செய்திகளைப் பகிர்வதே நோக்கம். எங்காவது தவறு ஏதாவது இருப்பின், நண்பர்கள் அவற்றைச் சுட்டிக் காட்ட வேண்டுகிறேன். திருத்தி விடலாம்.

SOPA & PIPA என்றால் என்ன?

SOPA என்பது, Stop Online Piracy Act என்பதன் சுருக்கம். அதுபோலவே, PIPA என்பது, Protect IP Act என்று பொருள்படும்.

இவற்றைப் பற்றி விரிவாகப் பார்ப்பதற்கு முன்னர், இன்னொரு விஷயத்தைப் பற்றிக் கொஞ்சம் விவாதிப்போம். அதிலேயே இந்த இரண்டு விஷயங்களைப் பற்றிய தகவல்களும் எளிதில் புரிந்துவிடும்.

Piracy.

மீடியா பைரஸி என்பது தற்போது வெகு தீவிரமாகப் பரவிவிட்ட ஒரு விஷயம். ஒரு படம் வெளியானால், அன்றே அதன் டாரண்ட் ஃபைல் அப்லோட் செய்யப்பட்டுவிடுகிறது. அதேபோல, பாடல்களும். இப்படிப்பட்ட மீடியா பைரஸியை அங்கீகரித்து ஊக்குவிக்கும் பல இணையதளங்கள் உலகெங்கும் இருக்கின்றன. எல்லோருக்கும் Isohunt பற்றித் தெரிந்திருக்கும். அதுபோலவே piratebay, kickasstorrents போன்ற தளங்கள். இவற்றில், முறையாகக் காப்புரிமை பெறப்படாத திரைப்படங்கள், டாக்குமென்ட்ரிக்கள், பாடல்கள், வீடியோக்கள், மென்பொருட்கள் ஆகியவை இறைந்து கிடக்கின்றன. யார் வேண்டுமானாலும் அவற்றைத் தரவிறக்கிக்கொள்ளலாம்.

இதனால் என்ன பிரச்னை என்பதும் அத்தனைபேருக்கும் தெரிந்த ஒன்றுதான். முறையாகக் காப்புரிமை பெறப்பட்ட ஒரு பொருளை விற்பதன் மூலம் கிடைக்கும் வருவாய், இப்படிக் காப்புரிமை பெறாமல் அதே பொருளைத் திருட்டுத்தனமாக வெளியே விடுவதன் மூலம் குறைகிறது. இதுதான் மூலகாரணம். மட்டுமல்லாமல், முறையாகக் காப்புரிமை பெறப்படாமல் உருவாக்கப்படும் இதுபோன்ற விஷயங்கள், அப்பட்டமான திருட்டேயன்றி வேறில்லை என்ற காரணமும் சேர்ந்துகொள்கிறது (காப்புரிமை பெறாமல் காப்பியடிப்பதன் தீமைகள் பற்றி நண்பர்களுக்கு நன்கு தெரியும் அல்லவா? தமிழ்த்திரையுலகில் ஒவ்வொரு மாதமும் வரும் ஏதாவது ஒரு படத்தின் மூலம் அதனைக் கவனித்துக்கொண்டே இருக்கிறோமே? கமல் அடித்த காப்பிகளைப் பற்றி நான் எழுதுகையில், 'இட்லிகளை ஒரே போன்று தயாரிப்பதில்லையா? தோசை மாவு ஒன்றுதானே? ஹா ஹூ' என்று 'அவசர' அறச்சீற்றம் அடைந்து பொங்கி, காமெடியனாக மாறிய சில பிரபல பதிவர்களுக்கு இப்போதாவது இது புரிந்திருக்கும் என்று நம்பிக்கொண்டிருக்கிறேன்).

இப்படிக் காப்புரிமை பெறாமல் திருட்டுத்தனம் செய்த வலைத்தளங்களை முடக்க அமெரிக்க அரசும் நிறுவனங்களும் செய்த முயற்சிகள் பலனளிக்கவில்லை. ISPக்களிடம் சென்று, இப்படி இந்தத் திருட்டு வலைத்தளங்களைத் தொடர்பு கொண்டு தரவிறக்குபவர்களை அடையாளம் கண்டு தண்டிக்கும் வேலையை அமெரிக்க அரசு கொஞ்ச காலம் முயன்றது. ஆனால் அந்த எண்ணிக்கை மிகவும் அதிகமாக இருந்ததால், அதனால் ஒன்றும் செய்ய முடியவில்லை. சம்மந்தப்பட்ட வலைத்தளங்களை மூடுவதும் பலனளிக்கவில்லை. காரணம், இவற்றில் பல தளங்கள், வெளிநாடுகளில் இயங்கிக்கொண்டிருந்தன.

மண்டையைப் பிய்த்துக் கொண்ட அமெரிக்க அரசு, சில செனட்டர்களின் உதவியால் கொண்டுவந்திருக்கும் மசோதாக்களே இந்த இரண்டும். இவை இன்னமும் சட்டமாக்கப் படவில்லை. இவற்றின் மீதான விவாதங்கள் இனிதான் நிகழ இருக்கின்றன என்பது இங்கே குறிப்பிடத்தக்கது. அவற்றைப் பற்றி விரிவாக இனி பார்ப்போம்.

SOPA & PIPA எப்படி செயல்பட இருக்கின்றன?

இந்த இரண்டு மசோதாக்களும், இரண்டு வகையான வழிமுறைகளை, சட்டவிரோதமான மீடியா காப்புரிமை மீறலுக்கு எதிராகப் பரிந்துரைக்கின்றன. முதல் வழியில், அமெரிக்க சட்டத்துறை, சம்மந்தப்பட்ட ISPக்களுக்கு, சட்டவிரோதமான இப்படிப்பட்ட காப்புரிமை மீறக்கூடிய வலைத்தளங்களை அடியோடு block செய்யுமாறு நீதிமன்ற ஆணை பிறப்பிக்கமுடியும். அதாவது, இப்படிக் கற்பனை செய்துகொள்வோம். இந்தியாவில் ஆர்டெல் நிறுவனத்துக்கு இந்திய அரசாங்கம் பிறப்பிக்கும் ஆணை ஒன்றின்படி, குறிப்பிட்ட சில வலைத்தளங்களைத் தனது சந்தாதாரர்கள் access செய்யமுடியாமல் அந்நிறுவனம் தடை செய்ய வேண்டும். இது ஒரு வழி. இந்த வழியில் ஒரு பிரச்னை இருக்கிறது. வலைத்தளங்களின் பெயரை மட்டுமே block செய்யவேண்டும் என்பது இந்த மசோதாக்களில் உள்ள ஒரு விஷயம். ஆகவே, அந்த வலைத்தளங்களின் IP அட்ரஸ்கள் இன்னமும் இயங்கிக்கொண்டுதான் இருக்கும். ஐபி அட்ரஸையும் block செய்ய வேண்டும் என்று இந்த மசோதாக்கள் ஆரம்ப காலத்தில் குரல் கொடுத்தாலும், அவற்றால் எழக்கூடிய நடைமுறைச் சிக்கல்களை மனதில் கொண்டு, அந்த கோஷத்தைக் கைவிட்டுவிட்டன.

இரண்டாம் வழிமுறையின்படி, காப்புரிமையை முறையாகப் பெற்றிருக்கும் நிறுவனங்களோ அல்லது மனிதர்களோ, சட்டவிரோதமாக செயல்பட்டுக்கொண்டிருக்கும் வலைத்தளம் ஒன்றுக்குக் கிடைக்கக்கூடிய அத்தனை உதவிகளையும் நிறுத்த வேண்டும் என்று சம்மந்தப்பட்ட நிறுவனங்களுக்கு நீதிமன்ற உத்தரவு பிறப்பிக்கமுடியும். அதாவது, குறிப்பிட்ட வலைத்தளம் ஒன்றுக்கு வெளியேயிருந்து கிடைக்கும் பண உதவிகள், விளம்பரங்கள் ஆகியவற்றை நிர்ப்பந்தப்படுத்தி நிறுத்த முடியும். மட்டுமல்லாமல் கூகிள் போன்ற search engineகளையும் அந்தத் தளங்களைத் தனது தேடுதலில் சேர்த்துக்கொள்ளக்கூடாது என்று நிர்ப்பந்தப்படுத்தவும் முடியும். அதாவது, அந்த வலைத்தளத்தை ஊரை விட்டே ஒதுக்கிவைக்கக்கூடிய முயற்சி இது.

இந்த இரண்டு மசோதாக்களில், SOPAவே மிகவும் தீவிரமான மசோதா என்று சொல்லப்படுகிறது. SOPAவினால் எந்த வெளிநாட்டு வலைத்தளத்தையும் இப்படிக் கேள்வி கேட்க முடியும். உதாரணத்துக்குத் தமிழில் ஒரு வலைத்தளத்தில் யாராவது ஏதாவது பின்னூட்டத்தில் டாரண்ட் தளம் ஒன்றின் லிங்க் கொடுத்திருக்கிறார்கள் என்று வைத்துக்கொள்ளலாம். இது அமெரிக்காவில் இருக்கும் ஏதாவது ஒரு சம்மந்தப்பட்ட நிறுவனத்துக்குத் தெரிய வந்தால், அமெரிக்க அரசின் நீதிமன்ற உத்தரவு, இந்தத் தமிழ் வலைத்தளத்தின் மீது பாயும். அப்படிப்பட்டதொரு தீவிரமான, கடுமையான மசோதா இந்த SOPA. இதனுடன் ஒப்பிடும்போது PIPA என்பது தீவிரத்தன்மை குறைந்ததொரு மசோதா என்றுதான் சொல்லவேண்டும். PIPA கேள்விகேட்பது, காப்புரிமை மீறலுக்கேன்றே செயல்படும் தளங்களை மட்டுமே.

SOPA & PIPAவின் தீமைகள்

இப்போது இதனைப் படித்துவந்த நண்பர்களுக்கு எளிதாக இவற்றின் தீமைகள் புரிந்திருக்கும். ஏதாவது ஒரு நிறுவனம் நினைத்தால், போட்டி நிறுவனத்தின் செயல்பாடுகளை எளிதில் முடக்கிவிடமுடியும். போட்டி நிறுவனம் காப்புரிமை விதிகளை மீறுகிறது என்று ஏதாவது ஒரு லின்க்கையோ அல்லது வேறு ஏதாவதையோ சுட்டிக்காட்டி, அதன் வலைத்தளத்துக்கு வந்துகொண்டிருக்கும் விளம்பரங்களையும் பணத்தையும் எளிதில் முடக்கி, அந்தத் தளத்தைத் தனிமைப்படுத்திவிட முடியும். ஒருவேளை அப்படிச் சொல்லப்படும் குற்றச்சாட்டு பொய் என்றால், சம்மந்தப்பட்ட நிறுவனம் இதனை நிரூபிப்பதற்குள் உயிரே போய்விடும்.

அதேபோல், தனது தளங்களை மக்களே உபயோகிப்பதுபோல் இதுவரை இருந்துவந்த Wikipedia , Youtube போன்ற தளங்கள் இதனால் கொடும் பாதிப்புக்கு உள்ளாகவும் நேரிடும். ஒவ்வொரு சந்தாதாரரும் எதனை அப்லோட் செய்கிறார்கள் என்பதனைக் கண்கொத்திப் பாம்பு போல கவனிக்கவேண்டிய நிர்ப்பந்தத்துக்கு இவை தள்ளப்பட்டுவிடும்.

SOPA & PIPA வுக்கு ஆதரவும் எதிர்ப்பும்

இப்போது இந்த இரண்டு மசோதாக்களை எவர் எவர் ஆதரிப்பார்கள் என்பதும், எதிர்ப்பாளர்கள் யாராக இருக்கமுடியும் என்பதும் எளிதாகப் புரிந்துவிடுகிறது அல்லவா? திரைப்பட தயாரிப்பாளர்கள், ஆடியோ நிறுவன முதலாளிகள், டிவி நிறுவனங்கள், புத்தகப் பதிப்பாளர்கள், காப்புரிமை சம்மந்தமாக அடிக்கடி வழக்கு போடக்கூடிய நிலையில் இருக்கும் சில நிறுவனங்கள் (மேக்கப் பொருட்களை உற்பத்தி செய்யும் நிறுவனங்கள்) ஆகியவை இந்த மசோதாக்களை பலமாக ஆதரிக்கின்றன.

பிரபல வலைத்தளங்களான EBay, Craigslist, Google, Mozilla, Twitter போன்ற தளங்கள் இந்த மசோதாக்களை முற்றிலும் எதிர்ப்பதற்கான அறிக்கையில் கையெழுத்தைப் பதித்திருக்கின்றன. இவற்றில் விக்கிபீடியா வெளிப்படையாகவே இந்த மசோதாக்களுக்கு எதிர்ப்புத் தெரிவித்து இன்று முழுதும் இயங்காமல் இருப்பது நண்பர்களுக்குத் தெரிந்திருக்கும்.

SOPA & PIPA வின் தற்போதைய நிலைமை

இவற்றுக்கான வலுவான எதிர்ப்பில் சுதாரித்துக்கொண்ட இந்த மசோதாக்களில் இருந்து தற்போது வலைத்தளங்களின் பெயர்களை block செய்யும் சங்கதி தூக்கப்பட்டுவிட்டது என்பது சற்றே ஆறுதல் தரக்கூடிய விஷயம். SOPA, மேலும் அதில் திருத்தம் செய்யும் பொருட்டு, தற்போது நிறுத்தியே வைக்கப்பட்டு விட்டது. PIPA வைப் பற்றிய ஒட்டு மட்டும் வரும் 24 ம் தேதி அமெரிக்க செனட்டில் துவங்க இருக்கிறது.

இதுவே இவற்றைப் பற்றிய தற்போதைய செய்தி. இனிமேலும் இவற்றைப் பற்றிய புதுத் தகவல்களைத் திரட்டித் தர முயல்கிறேன்.

குறிப்பு - இந்தக் கட்டுரை, http://goo.gl/BhdWW இந்தத் தளத்தின் ஆங்கில மொழிபெயர்ப்பு என்றே சொல்லும் அளவுக்கு, அதில்தான் அத்தனை தகவல்களையும் எடுத்தேன்.

திரைக்கதை எழுதுவது 'இப்படி' - 13

2012-01-09T22:58:00.000+05:30

சென்ற அத்தியாயத்தில், ஒரு திரைக்கதையை எப்படி அமைப்பது - கதையை எப்படி ஆரம்பிப்பது ஆகிய விஷயங்களைப் பற்றி சிட் ஃபீல்ட் என்ன சொல்லியிருக்கிறார் என்று கவனித்தோம். இப்போது, திரைக்கதையை அமைக்கத் தேவையான இரண்டு பிரதான சம்பவங்களைப் பற்றி இனி அலசலாம்.

Chapter 8 - The Two Incidents

Incident (சம்பவம்): ஏதாவது ஒரு குறிப்பிட்ட விஷயத்தோடு தொடர்புடைய நிகழ்ச்சி அல்லது நிகழ்வு.

ஜோ எஸ்டெர்ஹாஸ் (Joe Eszterhas) என்று ஒரு புகழ்பெற்ற திரைக்கதையாசிரியர் ஹாலிவுட்டில் உண்டு. இவரது சிறந்த திரைக்கதைகள்: Basic Instinct, Sliver, Showgirls, Flashdance, Jade முதலியன. இவரைப் பற்றிய ஒரு சம்பவத்தோடு இந்த அத்தியாயத்தைத் துவக்குகிறார் சிட் பீஃல்ட்.

ஜோ எஸ்டெர்ஹாஸின் திரைக்கதைகள் சம்மந்தப்பட்ட ஒரு வழக்கில், ஜோவின் திரைக்கதைகளின் பாணியைக் கண்டறியும் பொறுப்பு, சிட் ஃபீல்டுக்கு ஒருமுறை வழங்கப்பட்டது. அதாவது, ஜோவின் திரைக்கதைகளில் உள்ள அந்த பிரத்யேகத்தன்மை என்ன? எதனால் அவை தனிப்பட்டுத் தெரிகின்றன? எப்படி அவற்றைப் பிற திரைக்கதைகளில் இருந்து தனியே அடையாளம் காணமுடியும்?

ஜோவின் திரைக்கதைகளை ஒவ்வொன்றாக இவ்விதம் படிக்க ஆரம்பித்தார் சிட் ஃபீல்ட். அப்படிப் படிக்கப்படிக்க, ஜோவின் தனித்தன்மையைப் புரிந்துகொள்ள ஆரம்பித்தார். அதாவது, ஜோவின் திரைக்கதைகள், நிஜவாழ்வில் நிஜமான மனிதர்கள் அனுபவிக்கும் பிரச்னைகளைப் பற்றியே அமைந்திருந்தன. சாதாரண மனிதர்கள், அவர்கள் சந்திக்கும் பிரச்னைகளிலிருந்து எப்படி விடுபடுகிறார்கள் என்பதை மிகச் சுவாரஸ்யமாகச் சொல்லியிருந்தார் ஜோ என்பது சிட் ஃபீல்டின் கணிப்பு.

ஜோவின் பெரும்பான்மையான திரைக்கதைகளின் பாணி என்னவெனில், தொடங்கும்போதே ஒரு action சீக்வென்ஸ்; அந்த சம்பவத்தில், படம் பார்க்கும் ஆடியன்ஸை நேரடியாக ஈடுபடுத்துவது; அதனால் திரைக்கதையின் சுவாரஸ்யம் அதிகரிப்பது என்றவாறே அவை இருந்தன. அதாவது, இதுதான் ஜோவின் டெம்ப்ளேட்.

உதாரணமாக, Basic Instinct திரைப்படத்தின் திரைக்கதை எப்படி ஆரம்பிக்கிறது என்று எழுதியுள்ளார் சிட் ஃபீல்ட். அதனை இப்போது பார்க்கலாம்.

'இருட்டு... எதனையும் தெளிவாகப் பார்க்க முடியாத சூழல்' என்று தொடங்குகிறது அந்தத் திரைக்கதை. 'ஒரு ஆணும் பெண்ணும் படுக்கையின் மேல் உறவு கொள்கிறார்கள். சுவர்களிலும் படுக்கைக்கு மேலே உள்ள கூரையிலும், கண்ணாடிகள் பதிக்கப்பட்டிருக்கின்றன. படுக்கைக்குப் பக்கத்தில் இருக்கும் மேஜையின் மீது ஒரு கண்ணாடி. அதில் கொக்கேய்னின் சிதறல்கள். ரொமாண்டிக்கான பாடல் ஒன்று டேப்பில் இழைந்துகொண்டிருக்கிறது'.

இப்படித் தொடங்குகிறது திரைக்கதை.

இறுக்கமான, வேகமான, காமம் ததும்பும் காட்சி அது. காட்சி விளக்கப்படப்பட, வார்த்தைகள் குறைகின்றன. 'அவன் அவளுக்குள் இருக்கிறான். கைகள் மேலே கட்டப்பட்டிருக்கின்றன. மல்லாந்து, கண்களை மூடிக்கொண்டு படுத்திருக்கிறான்...அவன்மேல் அவள்...தீவிரமாக அசைந்துகொண்டிருக்கிறாள்..அவளுக்காக அவன் தாபத்தில் துடிக்கிறான்...அவளை நோக்கி எழ முயல்கிறான்...அவனது தலை பின்னே சாய்கிறது...தலையைப் பின்னால் இழுப்பதால் அவனது தொண்டை வெளுக்கிறது...அவளும் துடிப்பில் பின்னால் வளைகிறாள்...அவளது இடுப்பு அவன்மேல் தீவிரமாக இயங்குகிறது...அவளது மார்புகள் விம்முகின்றன...'

காமத்தின் உச்சத்தில் இதன் பின் நடப்பது என்ன?

'அவளது முதுகு, பின்னால் வளைந்துகொண்.....டே இருக்கிறது... கைகளை விரிக்கிறாள்... அவளது வலதுகை, திடீரென்று அவன்மேல் இறங்குகிறது....கத்தியின் மின்னும் வெளிச்சம்...அவனது தொண்டை வெளுத்திருக்கிறது...அவன் துடிக்கிறான்... அவளைநோக்கி வேகமாக எழ முயல்கிறான்...துடிக்கிறான்....எழ முயல்கிறான்...அவளது கையில் இருக்கும் கத்தி மேலும் கீழும் இயங்குகிறது...மேலும்... கீழும்...மேலும்... கீழும்...

இந்தக் காட்சியைக் கற்பனை செய்து பாருங்கள். இரு உடல்கள்... காமம்... ரத்தம்.. இசை...

இந்தக் காட்சியைப் படித்தவுடன், மேலும் மேலும் என்ன நடக்கிறது என்று தெரிந்துகொள்ளும் வெறி சிட் ஃபீல்டுக்கு ஏற்பட்டதாக அவர் சொல்கிறார். படிக்கப்படிக்க, திரைக்கதையின்பால் மேலும் மேலும் தூண்டப்பட்டிருக்கிறார். திரைக்கதையின் இந்த முதல் பக்கம் நமக்குத் தெரிவிக்கும் விஷுவல் action அவரை அந்தத் திரைக்கதையின் ரசிகராக மாற்றிவிட்டது.

சிட் ஃபீல்டைப் பொறுத்தவரையில், படிக்கும் நபரின் கழுத்தை இறுக்கிப் பிடித்து, திரைக்கதையின் மேல் ஈடுபாடு கொள்ளச் செய்வது இப்படிப்பட்ட திரைக்கதைகள்தான் என்று சொல்கிறார். பொங்கும் உணர்ச்சி, தீவிரமான காமம், கோரமான ஒரு கொலை.. மொத்தத்தில், பேரழிவு ஒன்று. இத்தகைய தொடக்கம் இருந்தால், எந்தத் திரைக்கதையும், ஆடியன்ஸை வெகுவாகத் தன்பால் ஈர்த்துவிடும் அல்லவா?

இங்கே ஒரு வார்த்தை. இது, சிட் ஃபீல்ட் கொடுக்கும் ஏராளமான உதாரணங்களில் ஒன்று மட்டுமே. இதுதவிர, லார்ட் ஆஃப் த ரிங்ஸ், மேட்ரிக்ஸ், டெர்மினேட்டர் ஆகிய பல படங்களின் திரைக்கதைகளையும் அவர் சிலாகித்து எழுதியிருக்கிறார். ஆகவே, சிட் ஃபீல்ட் பாராட்டிய ஒரே காரணத்துக்காக, பேஸிக் இன்ஸ்டிங்ட் போன்ற திரைக்கதைகளை மட்டுமே எழுதவேண்டும் என்று நாம் முடிவுகட்டிவிடக்கூடாது. பேஸிக் இன்ஸ்டிங்ட்டில் இருப்பது போன்ற வேகம், நமது திரைக்கதைகளில் இருக்கவேண்டும் என்பதே இதிலிருந்து நாம் கற்றுக்கொள்ளும் பாடம்.

பேஸிக் இன்ஸ்டிங்ட்டில், மேலே சொன்ன சம்பவம் நிகழ்ந்தபின்னர் என்ன ஆகிறது?

போலீஸ் துறையில் இருக்கும் கதாநாயகன் மைக்கேல் டக்ளஸ் இந்தக் கொலையைத் துப்பறிய வருகிறார் . அதன்பின் டக்ளஸுக்கும் கதாநாயகி ஷரோன் ஸ்டோனுக்கும் உறவு ஏற்படுகிறது. கதாநாயகியின் மேல் பைத்தியமாகவே ஆகிப்போகிறான் கதாநாயகன். அதன்பின் என்ன நடக்கிறது என்பதே படம்.

ஆகவே, இந்தத் திரைக்கதையின் பிரதான சம்பவமாக, தொடக்கத்தில் வரும் கொலை இருக்கிறது என்பதை சிட் ஃபீல்ட் புரிந்துகொண்டார். இந்தத் துவக்கக் காட்சியும் படத்தின் கதையும் இப்படியாக, நேரடியான தொடர்பில் இருக்கின்றன. ஒப்பனிங் காட்சி இல்லையெனில் படமே இல்லை.

படத்தின் துவக்கக் காட்சியான இந்தக் கொலையும், கதாநாயகன் தனது இச்சைகளுக்குப் பணிந்து நடப்பதுமான படத்தின் மீதிக் கதையும், கதாபாத்திரத்தின் குணாதிசயம் மற்றும் சம்பவம் ஆகிய இரண்டு விஷயங்களை நன்றாகவே புரிய வைக்கின்றன என்கிறார் சிட் ஃபீல்ட். இந்தத் தொடரின் ஆரம்பத்தில் நாம் பார்த்த ஒரு மேற்கோள் நினைவு இருக்கிறதா?

What is character but the determination of incident? And what is incident but the illumination of character?

கதாபாத்திரத்தின் குணாதிசயம் என்பது, ஒரு சம்பவத்தினால் உறுதிப்படுத்தப்படுவது அல்லவா? அதேபோல், சம்பவம் என்பது, கதாபாத்திரத்தின் குணாதிசயத்தால் விளக்கப்படுவது அல்லவா?

ஒரு சம்பவத்துக்கு ஒரு குறிப்பிட்ட கதாபாத்திரம் எப்படி எதிர்வினை புரிகிறது என்பதை விளக்காமல், அந்தக் கதாபாத்திரத்தைப் பற்றிப் படம் பார்க்கும் மக்களுக்குப் புரியவைக்க முடியாது.

உதாரணத்துக்கு, தெருவில் ஒரு முதியவரை ஒரு ஆள், மாட்டை அடிப்பது போல் அடித்துக்கொண்டிருக்கிறான். அப்போது அவனைத் தாண்டிச் செல்லும் ஒரு கதாபாத்திரம்,

1. அவனுடன் சேர்ந்துகொண்டு அந்த முதியவரை அடிக்கிறது
2.தலையைக் குனிந்துகொண்டு அந்த இடத்தை விட்டு வேகமாக அகன்றுவிடுகிறது
3. 'அவரை விட்றா' என்று ஆவேசமாக அலறிக்கொண்டே அவனை அடி புரட்டி எடுக்கிறது

இந்த மூன்று கதாபாத்திர விளக்கங்களில், கதாநாயகன், வில்லனின் அடியாள் மற்றும் குணச்சித்திர கதாபாத்திரங்கள் யார் யார் என்பது தெளிவாகப் புரிந்துவிடுகிறதல்லவா?

இதுதான் - 'கதாபாத்திரத்தின் குணாதிசயம் என்பது, ஒரு சம்பவத்தினால் உறுதிப்படுத்தப்படுவது அல்லவா?' என்பதன் விளக்கம்.

அதேபோல், இன்னொரு சம்பவம்.

இங்கே, படத்தின் கதாநாயகன், ஒரு குறிப்பிட்ட இடத்தில், அவனுடைய நன்னடத்தைக்கு சோதனை வரும் நேரத்தில், பாசிடிவாகவேதான் நடந்துகொள்வான். அதுவே வில்லனாக இருந்தால், கட்டாயம் தீய செயல்களை மட்டுமே புரிவான். இதுதான் 'சம்பவம் என்பது, கதாபாத்திரத்தின் குணாதிசயத்தால் விளக்கப்படுவது அல்லவா?' என்பதற்கு உதாரணம். அதாவது, கதாபாத்திரத்தின் குணம் என்னவோ, அதைப்பொறுத்து, அக்கதாபாத்திரத்தின் எதிர்வினைகள் அமைகின்றன.

இதையே பேஸிக் இன்ஸ்டிங்ட்டுக்குப் பொருத்திப் பார்த்தால், படத்தின் துவக்கத்தில் நடக்கும் கொலையால், கதாநாயகியை விசாரிக்க வரும் போலீஸ் அதிகாரிக்கு, அவள்மேல் பைத்தியம் ஏற்படுகிறது (கதாநாயகனின் குணம்). அதனாலேயே படத்தின் இரண்டாம் பாதியில் வரும் சம்பவங்கள் அமைகின்றன. இந்த இரண்டு நிகழ்ச்சிகளுக்கும் தொடர்பு இருக்கிறது என்கிறார் சிட் ஃபீல்ட்.

படத்தின் துவக்கத்தில் நிகழும் கொலை - அந்தச் சம்பவம் - Inciting incident என்று அழைக்கப்படுகிறது. Incite என்ற ஆங்கில வார்த்தைக்கு, 'தூண்டுதல்' என்பது பொருள். அதாவது, படத்தின் கதையைத் தூண்டும் ஒரு சம்பவமே inciting incident என்று அழைக்கப்படுகிறது. அதேபோல், கொலைக்குப்பின்னர் என்ன ஆகிறது? படத்தின் கதை துவங்குகிறது. அதாவது, கதையின் முக்கியமான பகுதி. ஆகவே, இந்த முக்கியமான பகுதி, Key incident என்று அழைக்கப்படுகிறது.

எனவே, திரைக்கதைக்கு பலமான ஒரு ஓப்பனிங் கொடுப்பதே inciting incident என்பது சிட் ஃபீல்டின் விளக்கம். இந்த inciting incident மூலம், படம் பார்க்கும் ஆடியன்ஸுக்கு, படத்தின் மீது ஒரு எதிர்பார்ப்பு - ஈர்ப்பு - ஏற்படுகிறது. ஒரு திரைப்படத்தின் ஒப்பனிங் காட்சி இப்படி அமைந்துவிட்டால், அதுவே அப்படம் சுவாரஸ்யமாகச் செல்வதற்கு ஒரு காரணம்.

Inciting incident மற்றும் Key incident ஆகிய இரண்டு சம்பவங்களே, ஒரு திரைக்கதையின் பிரதான சம்பவங்கள்.

இந்த அடிப்படையில், ஒருசில தமிழ்ப்படங்களைப் பார்ப்போமா?

காக்க காக்க - இந்தப் படத்தின் inciting incident, சூர்யா தூக்கி எறியப்படும் முதல் காட்சி. சூர்யா ஏன் தூக்கி எறியப்பட்டார்? என்ற கேள்வியின் பின்னர்தான் படத்தின் கதையே இருக்கிறது. Key incident என்பது, படத்தில் அதன்பின் என்ன நடக்கிறது என்பதே.

விக்ரம் - Inciting incident எது? அக்னிபுத்திரன் என்ற ராக்கெட் கடத்தப்படுவதே. அதன்பின் என்ன ஆகிறது என்பது Key incident.

ஒரு சிறந்த action படத்துக்கோ அல்லது த்ரில்லர் படத்துக்கோ அல்லது ஒரு மர்மப் படத்துக்கோ, இந்த inciting incident என்பது அவசியம் தேவை என்கிறார் சிட் ஃபீல்ட்.

இந்த இரு சம்பவங்களைப் பற்றி மேலும் பல சுவையான தகவல்கள் - அடுத்த கட்டுரையில் பார்ப்போம்.

தொடரும்...

LOTR: The Series - 19 - Edoras & Rohirrim

2012-01-07T00:47:00.000+05:30

முன்குறிப்பு- இந்தக் கட்டுரைகள், தொடர்ச்சியாக இல்லாமல், நான்-லீனியராக இருப்பதை நண்பர்கள் அவதானித்திருக்கலாம். அப்படி எழுதுவதுதான் எனக்குப் பிடித்திருக்கிறது. நோக்கம் என்னவென்றால், ஆரம்ப சில கட்டுரைகள் தவிர்த்து, எந்தக் கட்டுரையைப் படித்தாலும் அது புரியவேண்டும் என்பதே. அதாவது, சென்ற கட்டுரையான ஜான் ஹோவ் மற்றும் அலன் லீ பற்றிய கட்டுரையை, இந்தக் கட்டுரைத்தொடரிலேயே முதன்முறையாகப் படித்தாலும், அது புரியவேண்டும். அதன்பின் அங்கொன்று இங்கொன்று எனப் படித்தாலும், சொல்ல வரும் விஷயத்தைப் புரிந்துகொள்வதில் எந்தச் சிரமமும் ஏற்படக்கூடாது என்பதால்தான் இப்படி எழுதப்படுகின்றன. ஆனால், ஈ-புக் வெளிவரும் நேரத்தில், மேலும் விடுபட்டவைகளையெல்லாம் சேர்த்து, கலர்ஃபுல்லாகக் கொண்டுவரவேண்டும் என நினைத்துக்கொண்டிருக்கிறேன். பார்க்கலாம்.

எடோராஸ் என்பது, ரோஹான் என்று அழைக்கப்படும் நாட்டின் தலைநகரம். White Mountains என்றழைக்கப்படும் மலைகளின் பள்ளத்தாக்கு ஒன்றில், ஒரு மலையின் மீது கட்டப்பட்ட நகரம் இது. இந்நகரை உருவாக்கியவரின் பெயர், ப்ரெகோ (Brego). ரோஹான் நாட்டின் இரண்டாவது மன்னர். காண்டோர் (Gondor) நாட்டின் வடக்கே அமைந்துள்ள பிராந்தியம் இது. ஏற்கெனவே ரோஹான் பற்றி மிகச்சுருக்கமாகப் பார்த்திருந்தாலும், இந்தக் கட்டுரையில் ரோஹான் பற்றிய அனைத்துத் தகவல்களையும் விரிவாகப் பார்த்துவிடலாம். அது, இப்படங்களைப் புரிந்துகொள்ள உதவும்.

மிஸ்டி மலைகளுக்கும் வெள்ளை மலைகளுக்கும் (White Mountains) இடையில் உள்ள மிகப்பெரிய பள்ளத்தாக்கில் அமைந்த இடமே ரோஹான். ஐஸன் ஆறு இதன் மேற்கு எல்லையாகவும், மிடில் எர்த்தையே கிழக்கு மேற்காக இரண்டாகப் பிரிக்கும் ஆண்டூய்ன் ஆறு இதன் கிழக்கு எல்லையாகவும் அமைந்திருக்கின்றன. இந்த இடத்தில் வாழும் மனிதர்கள், ரோஹிர்ரிம் என்று அழைக்கப்பட்டனர். இதற்கு அர்த்தம் - குதிரை வீரர்கள் எனப் பொருள்படும் 'Horse Lords' என்பதாகும். ஆயினும், ரோஹானின் குடிமக்கள், தங்களை 'இயோர்லிங்காஸ்' (Eorlingas) என்றே அழைத்துக்கொண்டனர். இதற்குப் பொருள் - ரோஹானின் முதல் மன்னனான இயோர்லின் மக்கள் என்பது.

ரோஹான் எப்படி உருவானது?

லார்ட் ஆஃப் த ரிங்ஸ் கதை நடப்பதற்குப் பல ஆண்டுகள் முன்னர், ஸிரியன் (Cirion) என்ற பெயருடைய காண்டோரின் அமைச்சர் - இவர்தான் அப்போது காண்டோரை ஆண்டுகொண்டிருந்தவர் - ஒரு போரை சந்திக்கவேண்டி வந்தது. இந்தப் போரில், அவர் தோல்வியடையும் நிலையில், அவரது உதவிக்கு வந்துசேர்ந்தது, இயோர்லின் கீழ் அமைந்த படை ஒன்று. இதன் காரணமாகப் போரில் வென்ற ஸிரியன், இயோர்லின் வீரத்தை மெச்சி, அவருக்கு அளித்ததே இந்த ரோஹான் நிலப்பரப்பு. இந்தப் போருக்காக கான்டோர் நோக்கிச் சென்றுகொண்டிருந்த ஸிரியனின் பெரும்படை, லாத்லாரியனைக் கடக்கும் வேளையில், லாத்லாரியனிலிருந்து பெரும் மேகம் ஒன்று, இப்படைகளுக்கு மேலாகவே காண்டார் வரை துணைவந்தது. இந்த மேகத்தால் தங்களுக்குத் தேவையான தண்ணீர் மற்றும் புத்துணர்ச்சி ஆகியவற்றை ஸிரியனின் படை பெற்றது. ஆகவே, போரில் இக்கூட்டணி வென்றதற்கு இதுவும் ஒரு காரணம் (லாத்லாரியனில் வாழ்ந்து வந்த எல்ஃப்கள் இவ்விதமாக மறைமுக உதவி புரிந்தனர்) . இப்படியாக, ரோஹான் நாடு உருவானது. ஸிரியனின் சந்ததியினர், அந்நாட்டை ஆண்டுவந்தனர்.

இதற்குப் பலநூறு ஆண்டுகள் கழித்து, தெங்கெல் (Thengel) என்ற மன்னன் ரோஹானை ஆண்டுவந்ததிலிருந்து, நமக்குத் தேவையான கதை ஆரம்பிக்கிறது.

தெங்கெல் மன்னன் ரோஹானை ஆண்டபோதுதான், அவரது பிராந்தியத்திற்குள் இருக்கும் ஐஸங்கார்டை, ஸாருமான் என்ற மந்திரவாதி ஆக்கிரமித்தார். ரோஹானின் படையான ரோஹிர்ரிமை அவ்வப்போது தாக்கி, இடைஞ்சல் கொடுக்க ஆரம்பித்திருந்தார் இந்த ஸாருமான். அந்த நேரத்தில்தான் தெங்கெல் மன்னர் மரணமடைந்து, அவரது மகன் ரோஹானை ஆளும் பொறுப்பை ஏற்றார்.

ரோஹானின் இந்தப் புதிய மன்னனின் பெயர் - தியோடன்.

தியோடன் ஆட்சிப் பொறுப்பை ஏற்றுப் பல வருடங்கள் கழிந்தபின், ஸாருமான் சாரோனின் பிடியில் விழுந்த நேரம். தியோடனின் மந்திரியான க்ரிமாவை தனது பிடியில் போட்டுக்கொண்டு, க்ரிமாவின் மூலமாகத் தியோடனை மெல்ல மெல்லத் தன்வசப்படுத்தினார் ஸாருமான். இதனால் ரோஹானின் படைகள் பலம்பெறுவதை ஸாருமானால் தடுக்க முடிந்தது. ரோஹானின் படைகள் வளராமல் போனால், பிற்காலத்தில் சாரோன் காண்டார் மீது போர் தொடுக்கையில், உதவிக்கு ஒருக்கால் ரோஹான் சென்றால், அதனை எளிதில் வீழ்த்திவிடலாம் என்பது ஸாருமானின் கணக்கு. ஆகவே, தனது ஆட்களான ஆர்க்கள் (Orcs) என்றழைக்கப்பட்ட பூதங்களை வைத்து, உருக் - க்ஹாய்களை உருவாக்கத் துவங்கினார் ஸாருமான். இந்த உருக்-க்ஹாய்களை வைத்து, ரோஹானின் எல்லைப்புறங்களில் காவல் காத்துவந்த படைகளை அழித்தார். உருக்-க்ஹாய்களைக் கொல்ல நினைத்த தியோடனின் மகனான தியோட்ரெட், ஸாருமானால் பீடிக்கப்பட்ட தியோடனால் தடுக்கப்பட்டான்.

இதன்பின்னர் நடந்ததெல்லாம் LOTR விசிறிகளுக்குத் தெரிந்திருக்கும்.

ரோஹான் நிர்மாணிக்கப்பட்ட விதம்

Mount Sunday என்று ஒரு மலை உண்டு. கேண்டர்பரியில். எடோராஸ் நகரத்தை நிர்மாணிக்க ஜாக்ஸன் முடிவுசெய்த இடம். முன்னதாக, அலன் லீயும் ஜான் ஹோவும் எடோராஸ் பற்றி வரைந்துகொடுத்த ஸ்கெட்ச்கள் ஜாக்ஸனிடம் இருந்தன. தனது ஆர்ட் டிபார்ட்மெண்ட்டின் உதவியை நாடிய ஜாக்ஸன், ஆர்ட் டிபார்ட்மெண்ட்டின் தலைவரான Dan Hannah விடம் லொகேஷன் பார்க்கச் சொல்லி உத்தரவிட்டார். குறிப்புகளின்படி, பெரிய மலையில், எடோராஸ் அமைந்திருக்க வேண்டும். அங்கேயே அதன் அரண்மனையும் கட்டப்பட்டிருக்க வேண்டும். இது, நிறைவேற்றுவதற்கு மிகச் சிக்கலான விஷயம்.

மௌண்ட் சண்டேயில் முகாமிட்ட குழுவினர், முதலில் ஒன்றரை கிலோமீட்டர் நீளத்துக்கு ஒரு சாலையை அதன் அடிவாரத்தில் அமைத்தனர். அதன்பின், மலையுச்சியில் கட்டிடங்களை அமைக்கும் பணி துவங்கியது. இந்த இடத்தின் பிரச்னை என்னவென்றால், இருபுறமும் பெரிய மலைகள் இருந்ததனால், நடுவில் அகப்பட்டுக்கொண்ட இப்பிரதேசத்தில், மிகப்பலமான காற்று வீசியதுதான். சில தருணங்களில், அங்கு நிற்பதே முடியாத காரியமாக இருந்தது.

அத்தனை சிக்கல்களையும் மீறி, மௌண்ட் சண்டேயின் மீது எடோராஸின் செட் அமைக்கப்பட்டபோது, எட்டு மாதங்கள் கழிந்துவிட்டிருந்தன.

இவ்வளவு நாட்கள் ஆனதற்கு இன்னொரு காரணம், டோல்கீன், தனது புத்தகங்களில்,எடோராஸின் ஒவ்வொரு அடியையும் வர்ணித்து எழுதியிருந்ததே. அத்தனை தத்ரூபமாக இந்த இடத்தை உருவாக்க, மிக நீண்ட காலம் தேவைப்பட்டது.படத்தில் எடோராஸ் அரண்மனையைக் காட்டும்போது கவனித்தால், அரண்மனையின் உட்புறத்தில் அத்தனை அழகாக வேலைப்பாடுகளால் அலங்கரிக்கப்படிருப்பதைக் காணலாம்.

எட்டு மாதங்கள் கஷ்டப்பட்டு உருவாக்கிய செட்டில், எத்தனை நாட்கள் படப்பிடிப்பு நடந்தது? ஜஸ்ட் மூன்றே வாரங்களில், மூன்று பாகங்களுக்குமான படப்பிடிப்பு எடுத்து முடிக்கப்பட்டது. அதன்பின், பிரம்மாண்டமான அந்த செட், முற்றிலுமாகக் கலைக்கப்பட்டது.

இந்த வீடியோவைக் கவனியுங்கள். எடோராஸ் நிர்மாணிக்கப்பட்ட அதிசயத்தைக் காணலாம்.

தொடரும் . . .

Sherlock Holmes 2:A Game of Shadows (2011) - Part 2

2012-01-04T16:27:00.000+05:30

பாகம் இரண்டு

பாகம் ஒன்று - Sherlock Holmes 2: A Game of Shadows (2011)

சென்ற கட்டுரையில், பொதுவான ஷெர்லக் ஹோம்ஸின் குணாதிசயங்களையும், இத்திரைப்படத்தில் அவரை சரியான அளவில் சித்தரிக்கவில்லை என்பதையும், இன்னும் சில விஷயங்களையும் பார்த்தோம். இப்போது, இந்தத் திரைப்படத்தில் என்னென்ன தகவல்கள் ஹோம்ஸைப் பற்றி நமக்குச் சொல்லப்படுகின்றன என்பதையும், அவைகள் எந்தெந்தக் கதைகளில் வருகின்றன என்பதையும், திரைப்படத்தில் வரும் இதர கதாபாத்திரங்களைப் பற்றிய விரிவான தகவல்களையும், மேலும் சில விபரங்களையும் முடிந்தவரை சுவாரஸ்யமாகப் பார்க்க முயலலாம்.

ஷெர்லக் ஹோம்ஸ்: குணாதிசயங்கள்

ஷெர்லக் ஹோம்ஸ், பலவித உணர்வுகளின் கலவை. பொதுவாக, ஏதாவது கேஸ் ஒன்றைத் துப்பறிகையில், நாட்கணக்கில் உணவே அருந்தாமல், மிகத்தீவிரமாக விபரங்கள் சேகரிக்கும் பழக்கம் அவருக்கு உண்டு. அதேபோல், எதையாவது யோசிக்கையில், புகையிலையைப் புகைத்துக்கொண்டு, மணிக்கணக்கில் பேசாமல் இருக்கும் மனிதர் அவர். இதனாலேயே, தாழிடப்பட்டிருக்கும் அவரது அறையைத் திறந்துகொண்டுவரும் வாட்ஸன், அங்கே நிலவும் புகைமண்டலத்தைப் பார்த்து, ஹோம்ஸைப் பலமுறை திட்டிய நிகழ்ச்சிகள் உண்டு.

இதுதவிர, துப்பாக்கி சுடுவதிலும், குத்துச்சண்டையிலும், வயலின் வாசிப்பிலும் வித்தகரான ஹோம்ஸுக்குப் பெரிதும் உவகை தரக்கூடிய விஷயம் என்னவெனில், தனது கேஸ்களில், எந்தத் தடயமும் கிடைக்காமல் திண்டாடிக்கொண்டிருக்கும் ஸ்காட்லான்ட் யார்ட் போலீசாரின் முன் நின்றுகொண்டு, தான் கண்டுபிடித்திருக்கும் விஷயங்கள் பற்றிப் பேசுவதே. போலீஸ் துறையினரின் இயலாமையை இப்படித் தீர்த்துவைப்பது ஹோம்ஸின் பிடித்தமான விளையாட்டு. அடிக்கடி இப்படி ஹோம்ஸுக்கு முன் அவமானம் அடைவது, லெஸ்ட்ரேட் என்ற இன்ஸ்பெக்டர்.

ஹோம்ஸின் மூளை எப்படி வேலை செய்கிறது என்பதை, Sherlock தொலைக் காட்சி சீரீஸிலும் சரி, இந்தத் திரைப்படங்களிலும் சரி, சிறப்பாகவே காட்டியுள்ளனர். ஹோம்ஸின் மூளைக்குள் நடக்கும் படுவேகமான - துல்லியமான அனாலிசிஸ், படம் பார்க்கும் ஆடியன்ஸுக்கு எப்படிப் புரியும்? Sherlock தொலைகாட்சி சிரீஸில், சம்பவம் நடந்த இடத்துக்கு ஹோம்ஸ் சென்றதுமே, அவரது மூளையில் பளிச்சிடும் விஷயங்களை, ஸ்க்ரீனிலும் காட்டுவார்கள். இதனால், பார்க்கும் ஆடியன்ஸ், ஹோம்ஸின் சிந்தனையைத் தொடர முடியும்.

அதேபோல், இந்தத் திரைப்படங்களில், ஒரு விஷயத்தை ஹோம்ஸ் யோசிப்பதை, மிகச்சிறப்பாகக் காட்டியிருப்பார்கள். எந்த விஷயமானாலும், அவற்றின் பல்வேறு பாதைகளில் ஹோம்ஸ் வேகமாகப் பயணித்து, ஒவ்வொரு பாதையின் முடிவையும் உடனடியாக அனலைஸ் செய்து, அவற்றில் சிறந்த முடிவைத் தேர்ந்தெடுத்து, அதனை செயல்படுத்துவார். இத்தனையும் ஒருசில வினாடிகளில் முடிந்துவிடும்.

உதாரணமாக, இந்த வீடியோவைப் பாருங்கள். இதில், மேலே சொன்ன ஹோம்ஸின் சிந்தனையோட்டம் தெளிவாகக் கொடுக்கப்பட்டுள்ளது.

தான் செய்யும் அசைவுகளுக்கு எதிராளியின் எதிர்வினை எப்படியிருக்கும் என்று கணித்து, ஒவ்வொரு ஸ்டெப்பாக மூளையிலேயே ஓட்டிப்பார்த்து, அதனை இம்மி பிசகாமல் செயல்படுத்தும் ஹோம்ஸின் ஜீனியஸ் இப்படிப்பட்டது.

இந்தக் காட்சியை விட அட்டகாசமான ஒரு காட்சி, இரண்டாம் பாகத்தில் உண்டு. ஒரு சண்டையில், ஹோம்ஸ் தனது மூவ்மெண்டுகளை இவ்வாறாக யோசிக்கிறார்.

First, pillage the nest. Clip wings. Then, blunt his beak. Crack eggs, a pinch of salt, a touch of pepper...additional seasoning required. Breakfast is served.

இதில் உள்ள ஒவ்வொரு விஷயத்தையும் ஒரே நொடியில் எப்படி நிறைவேற்றுகிறார் ஹோம்ஸ் என்பதைப் படத்தில் கண்டு களிக்கலாம். படத்தில் எனக்குப் பிடித்த காட்சிகளில் இதுவும் ஒன்று.

சுருக்கமாக - தான் எடுக்கும் முடிவுகள் சர்வநிச்சயமாக சரிதான் என்பது ஹோம்ஸின் அசைக்கமுடியாத நம்பிக்கை. கர்வம் என்றுகூடச் சொல்லலாம்.

Mycroft Holmes - இரண்டாவது ஹோம்ஸ்

ஷெர்லக் ஹோம்ஸுக்கு ஒரு அண்ணன் உண்டு. அவரது பெயர், மைக்ராஃப்ட் ஹோம்ஸ். இங்க்லாந்தின் அரசில் முக்கியப் பங்கு வகிப்பவர். ஹோம்ஸுக்கும் மைக்ராஃப்ட்டுக்கும் உள்ள பிரதான ஒற்றுமை - மைக்ராஃப்ட்டும் சிறந்த மூளை உடையவர். ஹோம்ஸை விட புத்திசாலி. ஜீனியஸுக்கும் ஜீனியஸ். இருவருக்கும் உள்ள பிரதான வேற்றுமை - உட்கார்ந்த இடத்தை விட்டு எழுந்து, தகவல்கள் சேகரிப்பது மைக்ராஃப்ட்டுக்குப் பிடிக்காத விஷயம். ஆகவே, ஒரு தகவல் கிட்டங்கியாக - ஒரு கம்ப்யூட்டராக செயல்படுவதே மைக்ராஃப்ட்டின் வேலை.

சில கேஸ்களில் ஹோம்ஸ், மைக்ராஃப்ட்டை கன்ஸல்ட் செய்ததுண்டு. இருக்கும் இடத்தை விட்டு அகலாத மைக்ராஃப்ட் கொடுக்கும் தகவல்கள், அந்த இடத்துக்கே சென்று புலனாய்வு செய்யும் அளவு துல்லியமாக இருக்கும். சரியாகவும் இருக்கும்.

மைக்ராஃப்டின் பழைய ஓவியம் ஒன்றை இணையத்தில் காண நேர்ந்தது. அதன்பின்புதான், ஷெர்லக் ஹோம்ஸ் பாகம் இரண்டில் ஸ்டீஃபன் ஃப்ரை (Stephen Fry) என்ற நடிகரை ஒப்பந்தம் செய்த மாயம் விளங்கியது. அச்சு அசலாக அந்த ஓவியத்தைப் போலவே இவர் இருப்பதை இங்கே காணலாம்.

இந்தப் படத்திலும் மைக்ராஃப்ட் ஷெர்லக்குக்கு உதவுகிறார். மறைமுகமாக. எப்படி? படத்தில் பாருங்கள். குறிப்பாக, க்ளைமேக்ஸ்.

Sebastian Moran - உலகின் துல்லியமான துப்பாக்கி வீரர்

ஷெர்லக் ஹோம்ஸ் கதைகளில் பிறவி வில்லனான ப்ரொபஸர் மோரியார்ட்டியின் நம்பகமான வலது கை, இந்த செபாஸ்டியன் மோரான். இங்க்லான்ட் ராணுவத்தில் சேர்ந்து, இந்தியாவிலும் ஆஃப்கானிஸ்தானிலும் பணிபுரிந்துவிட்டு, காயம் காரணமாக ராணுவத்தை விட்டு விலகி, மோரியார்ட்டியிடம் சேர்ந்து, அவரது தலையாய கொலையாளியாக மாறிப்போனவரே இந்த செபாஸ்டியன் மோரான். எவ்வளவு தொலைவில் இருந்தாலும் துல்லியமாகச் சுட்டு எதிரியை வீழ்த்தும் திறமை கொண்டவர்.

இந்தப் படத்தை 'The Final Problem' சிறுகதையை வைத்து எடுத்திருப்பதை இக்கட்டுரையின் முதல் பாகத்தில் கண்டோம் அல்லவா? அக்கதையில், இப்படத்தின் நிகழ்வுகள் அத்தனையும் நடந்துமுடிந்தபின்பு, தப்பித்துப்போய், அதன்பின் ஷெர்லக்கைக் கொல்வதே வாழ்க்கை லட்சியமாக வாழும் மனிதர் இவர். மிக ஆபத்தான மனிதர்.

இந்தத் திரைப்படத்தில், செபாஸ்டியன் மோரான் பல காட்சிகளிலும் வருகிறார். இறுதியில் தப்பிக்கவும் செய்கிறார். ஆகவே, அடுத்த ஷெர்லக் ஹோம்ஸ் படத்தில் இவர் பிரதான பங்கு வகிப்பார் என நம்புகிறேன்.

Professor James Moriarty - ஹோம்ஸின் 'Other'

மோரியார்ட்டியைப் பற்றிய முதல் விவரணை, ஆர்தர் கானன் டாயலின் 'The Final Problem' கதையில் வருகிறது. அக்கதையில், மோரியார்ட்டி, இங்க்லாந்தின் கிரிமினல்களுக்கெல்லாம் தலைவராக சித்தரிக்கப்படுகிறார். அவரது சாம்ராஜ்யத்தை ஹோம்ஸ் எப்படி அழிக்கிறார்; அதனால் ஹோம்ஸுக்கு நிகழும் ஆபத்து என்ன? என்பதைப் பற்றிய சிறுகதை அது. இக்கதையை கானன் டாயல் எழுதியது, ஹோம்ஸ் கதைகளை வரிசையாக எழுதிக்கொண்டிருந்த அலுப்பில் இருந்து விடுபடவே. ஆகவே, ஹோம்ஸுக்கு ஒரு எதிரியை சிருஷ்டித்த கானன் டாயல், அந்த இருவருக்கும் ஏற்ற முடிவினை இக்கதையில் அளித்தார். அது எப்படிப்பட்ட எதிர்வினையைக் கிளப்பியது என்றெல்லாம் ஹோம்ஸ் ரசிகர்கள் அறிவார்கள். அதனைப் பற்றிச் சொன்னால் இப்படத்தின் க்ளைமேக்ஸ் பற்றிச் சொல்லவேண்டியிருக்கும் என்பதால், இப்போது எதுவும் சொல்ல முடியாது.

மோரியார்ட்டியின் மீது ஹோம்ஸுக்கு இருந்தது, மரியாதை கலந்த எச்சரிக்கை உணர்வு. இந்தப் படத்தில் அது சரியாகக் காட்டப்பட்டிருக்கிறது. இந்தத் திரைப்படத்தில் மோரியார்ட்டியை மூன்று முறை சந்திக்கிறார் ஹோம்ஸ். முதன்முறை சந்திக்கும்போது, வாட்ஸனைக் கொல்லப்போவதை ஹோம்ஸிடம் சொல்கிறார் மோரியார்ட்டி. இரண்டாம் முறை சந்திப்பதோ, மோரியார்ட்டியின் கைதியாக. அப்போதுதான் மோரியார்ட்டியின் திட்டமான உலகப்போரை உருவாக்குதல் ஹோம்ஸுக்குச் சொல்லப்படுகிறது. மூன்றாம் முறை இருவரும் சந்திப்பதுதான், மறக்கவே முடியாத இப்படத்தின் இறுதி நிமிடங்கள்.

இரண்டு ஜீனியஸ்கள் பொருதிக்கொள்வது எப்படி இருக்கவேண்டும் என்பதற்குச் சரியான உதாரணம் இப்படத்தின் க்ளைமேக்ஸ். இருவருக்குமே ஒவ்வொருவர்களின் அடுத்த 'மூவ்' அத்துப்படி. ஆகவே, இருவரும் ஒருவரையொருவர் வெல்ல முயற்சிப்பது அட்டகாசம். குறிப்பாக, இருவரும் ஆடும் செஸ்.

மோரியார்ட்டியின் கதாபாத்திரம், ஷெர்லக் ஹோம்ஸின் முதல் பாகத்தில் ஜஸ்ட் இரண்டு நிமிடங்கள் (படத்தின் நடுப்பகுதி மற்றும் க்ளைமேக்ஸின் இறுதி நிமிடம்), முகம் தெரியாமல் வருவதை நண்பர்கள் கவனித்திருக்கலாம்.

Game of Shadows திரைக்கதை

பொதுவாகவே, ஹாலிவுட் படங்களில் ஒரு திரைக்கதை டெம்ப்ளேட் உண்டு. அதாவது, திரைப்படத்தின் பின்பாதியில் ஏதாவது நடக்க இருக்கிறது என்றால், அச்சம்பவத்தோடு தொடர்புடைய ஒரு விஷயத்தைப் படத்தின் முன்பாதியில் காட்டுவது. ஏனெனில், திடீரென்று ஒரு விஷயம் தொடர்பேயில்லாமல் நடக்கிறது என்பது அங்கே நடவாத காரியம். ஆகவே, முதலிலேயே ஒரு மிகச்சிறிய, முக்கியத்துவமே இல்லாத காட்சி ஒன்றில், பின்னால் நடக்க இருக்கும் பிரதான நிகழ்ச்சி ஒன்றோடு தொடர்புடைய சிறிய விஷயம் ஒன்று நடப்பதாகக் காண்பிப்பார்கள். அத்தனை ஹாலிவுட் படங்களிலும் இது தவறாமல் நடக்கும். அதேதான் இப்படத்திலும். இரண்டாவது பாதியில் நடக்கும் நிகழ்ச்சிகளுக்குத் தொடர்புடைய சிறிய நிகழ்ச்சிகள், படத்தின் முதல் பாதியில் வருகின்றன. அதேபோல், க்ளைமேக்ஸுக்குச் சற்று முன்பு, க்ளைமேக்ஸுக்குப் பெரிதும் தொடர்புடைய மிகச்சிறிய நிகழ்வு ஒன்றும் உண்டு. படம் பார்க்கும் நண்பர்கள் கவனிக்கலாம்.

படத்தின் திரைக்கதை, அலுக்காமல் நகர்கிறது. இருப்பினும், நான் கவனித்த ஒரே குறை, ஹோம்ஸை, பத்தொன்பதாம் நூற்றாண்டின் ஜேம்ஸ்பான்ட் போலவே காட்டியிருக்கிறார் கை ரிட்சி. அது எனக்குப் பிடிக்கவில்லை. ஹோம்ஸ் துப்பறியும் விதம்தான் அவரது கதைகளுக்கு அழகு சேர்க்கும். முதல் படத்திலாவது சற்றுத் துப்பறிவார் ஹோம்ஸ். ஆனால், இந்த இரண்டாம் பாகத்தில் ஹோம்ஸின் துப்பறியும் ஆற்றலைக் காட்டுவது மிகவும் குறைவே. இருந்தாலும், கதை நகரும் வேகம் அதனை மறக்கடிக்கச் செய்துவிடுகிறது.

திரைப்படம் பார்க்கச் செல்லும் நண்பர்கள், அட்லீஸ்ட் நான்கைந்து ஷெர்லக் ஹோம்ஸ் சிறுகதைகளாவது படித்துவிட்டுச் சென்றால், கட்டாயம் திரைப்படத்தோடு ஒன்ற முடியும். அவசியம் பாருங்கள்.

இந்தப் படத்தின் க்ளைமேக்ஸ் பற்றி எழுத வேண்டும். படத்தை முதலில் பாருங்கள். அதன்பின் க்ளைமேக்ஸ் அனாலிசிஸ் வைத்துக்கொள்ளலாம். ஆகவே, விரைவில் மறுபடியும் ஷெர்லக் பற்றிப் பேசுவோம்.

Sherlock Holmes 2: A Game of Shadows (2011) - English

2012-01-03T00:03:00.000+05:30

Let's begin the new year with Sherlock Holmes.

முதலில், நண்பர்கள் இந்தக் கட்டுரைகளைப் படித்துவிடுதல் நலம்.

1.ஷெர்லாக் ஹோம்ஸ் (எச்சரிக்கை - இது திரைப்பட விமரிசனம் அல்ல !)

2.Sherlock Holmes (2009) - English

3.Sherlock (2010)–The TV Series

ரைட். இப்போது, கட்டுரைக்குள் நுழையலாம்.

பாகம் ஒன்று - இரண்டு ஜீனியஸ்கள்

ஷெர்லக் ஹோம்ஸின் அதி தீவிர ரசிகர்கள்,கை ரிட்சியால் எடுக்கப்பட்டிருக்கும் இந்தத் திரைப்படத்தின் இரண்டு பாகங்களையும் பார்த்தால், சற்றே மூட் அவட் ஆக வாய்ப்புகள் உண்டு என நினைக்கிறேன். இதற்குக் காரணம், ஷெர்லாக் ஹோம்ஸ் கதாபாத்திரத்தை ஆர்தர் கானன் டாயல் சித்தரித்துள்ள விதமும், கை ரிட்சி அதனை முற்றிலும் எதிராகக் காண்பித்துள்ள விதமுமே. அப்படியென்ன வித்தியாசங்கள் இருக்கின்றன இவற்றில்?

முதலாவதாக, ஷெர்லாக் ஹோம்ஸ் கதைகளில் கானன் டாயலால் சித்தரிக்கப்பட்டுள்ள ஹோம்ஸ் கதாபாத்திரம், 'majestic' என்று விளக்கப்படும் அளவு கம்பீரமான பாத்திரம். ஒரு குறிப்பிட்ட நிகழ்வின்போது, அங்கே இருக்கும் அத்தனைபேருக்கும் என்ன நடந்துகொண்டிருக்கிறது என்றே தெரியாத குழப்பம் நிலவுகையில்,ஹோம்ஸ் மட்டும் தெளிவாக சிந்தித்துக்கொண்டிருப்பார். மிகப்பெரும்பாலும், முதல் தடயத்தைக் கண்ட அந்த நிமிடத்திலேயே குற்றவாளியை ஊகித்துவிடும் திறமை உடையவர் ஹோம்ஸ். அந்தக் கணிப்பு, 99 சதவிகிதம் சரியாகவே இருக்கும் (தனது கேஸ்களில் மிகச்சில முறைகள் மட்டுமே தோல்வியைத் தழுவிய ரெகார்ட் உடையவர் ஹோம்ஸ்). அதே சமயம், தனக்குத் தெரிந்ததை வெளியே சொல்லாமல், தன கூட வேலை செய்பவர்களை பயங்கரக் குழப்பத்தில் ஆழ்த்துவது ஹோம்ஸின் வழக்கம். தனது தொழிலின் மீதும் மூளையின் மீதும் ஹோம்ஸ் கொண்டிருக்கும் கர்வத்துடன் கூடிய அசைக்கமுடியாத நம்பிக்கையே காரணம். அதே சமயம், தன்னைச் சுற்றியிருப்பவர்களின் மத்தியில் படுகம்பீரமாகத் திகழும் நபர் அவர்.அவரை யாரும் குறைந்து மதிப்பிட்டு,கேள்விகள் கேட்டுவிட முடியாது.அவரை நெருங்கும்போதே தயக்கத்துடன் -ஒருவித தாழ்வு மனப்பான்மையுடனே மற்றவர்கள் அணுகுவது வழக்கம். காரணம், பயம் அல்ல. ஒரு ஜீனியஸை மிகச்சாதாரணமாக யாரும் அணுகிப் பேசிவிட முடியாதல்லவா? அதுதான் காரணம். Holmes demands an air of respect and authority where-ever he goes.

ஆனால், கை ரிட்சியின் இத்திரைப்படங்களிலோ, ஹோம்ஸ் கதாபாத்திரம், ஒரு காமெடியனைப் போல் சித்தரிக்கப்பட்டுள்ளது. அதுதான் படங்களின் வெற்றிக்குக் காரணம் என்று கை ரிட்சி வாதிடலாம். ஆனால், எப்படி அருள்மொழிவர்மர் காமெடியன் ஆக முடியாதோ, அப்படி ஹோம்ஸும் காமெடியன் ஆக வாய்ப்பே இல்லை என்பதே ஆர்தர் கானன் டாயலின் விசிறிகளின் கூற்று (அடியேனின் கூற்றும் தான்). அகவே, கானன் டாயலின் தீவிர விசிறிகளுக்கு, 2010ல் வெளிவந்த Sherlock என்ற தொலைக்காட்சி சீரீஸைப் பரிந்துரைக்கிறேன். அதில் வரும் ஹோம்ஸ் கதாபாத்திரமே நான் பார்த்த வரையில் முழுமையான கதாபாத்திரம்.

'The Final Problem' என்று ஒரு ஹோம்ஸ் சிறுகதை உண்டு. கதையின்மேல் க்ளிக் செய்து படிக்கலாம். இந்தக் கதையின் ஒருசில நிகழ்வுகளை மட்டும் எடுத்துக்கொண்டு (குறிப்பாக, இதன் க்ளைமேக்ஸ்), அதை மசாலா தடவி நமக்குக் கொடுத்திருக்கிறார் கை ரிட்சி. அதுதான் இந்தப்படம்.

படத்தைப் பார்க்குமுன்னர், ஷெர்லாக்கின் பிரத்யேகத் திறமை என்ன என்று கொஞ்சம் அலசலாம். அது, படத்தைப் பார்ப்பவர்களுடைய சுவாரஸ்யத்தை மேலும் கூட்டக்கூடும்.

ஒருசிலருக்குப் பிறக்கும்போதோ அல்லது குழந்தைப்பருவத்தின் ஒரு குறிப்பிட்ட காலத்திலிருந்தோ, விசேடத் திறமைகள் பளிச்சிடத் துவங்கும். அந்தத் திறமையாலேயே அவர்கள் அதன்பின் எப்போதும் அறியப்படுவார்கள். அப்படிப்பட்ட விசேடத் திறமை கொண்டவர் ஹோம்ஸ். அந்தத் திறமையானது, வேட்டை நாய் போல அவரை எப்பொழுதும் பின்தொடர்ந்தே வந்திருக்கிறது. அந்தத் திறமையால் ஷெர்லக் தனிப்பட்டுத் தெரிந்தாலும், அதனால் அவர் அடைந்த இன்னல்கள்தான் அதிகம்.

அதுதான் அவரது கவனிப்புத் திறன்.

பொதுவாக, நாம் உட்பட உலக மாந்தர்கள் செய்வது - looking. எதையுமே பார்ப்பதோடு சரி. ஆனால், ஹோம்ஸோ, எதையும் observe செய்பவர். ஒருமுறை எதையாவது கவனித்தாலே அது அவரது மூளையில் பதிந்துவிடும். அதுமட்டுமல்லாது, அந்தப் பொருளையோ நிகழ்ச்சியையோ தொடர்புபடுத்தி, சுற்றுப்புறங்களில் நடப்பவைகளை வரிசையாக ஒரு சங்கிலி போலக் கோர்த்து, அவரது மூளை செய்திகளை அனுப்பிக்கொண்டே இருக்கும். அந்த முடிவுகளை மின்னல்வேகத்தில் அலசி, சரியானவற்றை எடுத்துக்கொள்வது ஹோம்ஸின் வழக்கம். அவரது பாஷையில் சொல்வதென்றால்:

when you have eliminated the impossible, whatever remains, however improbable, must be the truth.

இந்த அலசும் திறனை வைத்தே ஹோம்ஸின் அத்தனை கதைகளும் அமைந்திருக்கும். இப்படமும்.

இதற்கு முன்னரே நாம் பார்த்திருக்கும் ப்ரொஃபஸர் மோரியார்ட்டி - ஹோம்ஸின் ஆஸ்தான வில்லன் - ஹோம்ஸின் ஜீனியஸுக்கு சளைக்காத மேதமையுடையவர் - இதில் வருகிறார். அதேபோல் இக்கதையின் இன்னொரு அறிமுகம், ஹோம்ஸின் வாசகர்களுக்கு நன்கு பரிச்சயமான செபாஸ்டியன் மோரான் - உலகின் சிறந்த துப்பாக்கி சுடும் வீரர்களில் ஒருவன். இன்னொரு குறிப்பிடத்தக்க அறிமுகம், ஹோம்ஸின் அண்ணன் மைக்ராஃப்ட். இவர்களைப் பற்றிய விபரங்கள், கட்டுரையின் இரண்டாம் பாகத்தில்.

ஆண்டு - 1891. ஹோம்ஸின் நண்பரான டாக்டர் வாட்ஸன், தனது குறிப்புகளைத் தட்டச்சு செய்வதில் கதை தொடங்குகிறது. அது ஒரு மரண அஞ்சலி. Flashback.

ஹோம்ஸ் அறிமுகம். குறிப்பிட்டதொரு கேஸைத் துப்பறிந்து வருவதாகச் சொல்கிறார் ஹோம்ஸ். சில கொலைகள், சில பெரிய வியாபார ஒப்பந்தங்கள், தீவிரவாதத் தாக்குதல்கள் ஆகியன இக்கேஸில் அடக்கம். கேஸின் ஒரு நூலைப் பிடித்து, மோரியார்ட்டி அனுப்பிய ஒரு கடிதத்தைப் படித்து, அதன்மூலம் சிம்ஸா என்ற பெண்ணைச் சந்திக்கிறார் ஹோம்ஸ். அந்தக் கடிதத்தைக் கொண்டுவருவது, முந்தைய பாகத்தில் நமக்கு அறிமுகமான பெண் - ஐரீன் அட்லர் (ஹோம்ஸை இதுவரை ஜெயித்திருக்கும் ஒரே எதிரி).ஹோம்ஸிடம் கடிதம் மாட்டிக்கொண்டதை அறிந்த மோரியார்ட்டி, ஐரீனைக் கொன்றுவிடுகிறார்.

ஸிம்ஸாவின் அண்ணன் ஒரு தீவிரவாத கும்பலில் பிரதான அங்கம் வகிப்பதை ஹோம்ஸ் கண்டுபிடிக்கிறார். அவன் இருப்பது ஃப்ரான்ஸ். இதற்கிடையில், வாட்ஸனின் திருமணம். அப்போது ஹோம்ஸை முதன்முதலில் சந்திக்கும் மோரியார்ட்டி, வாட்ஸனைக் கொல்ல இருப்பதாக ஹோம்ஸிடம் சொல்கிறார். வாட்ஸன் திருமணமாகிப் போய்விட்டதாகவும், தங்கள் இருவருக்கும் இனி சம்மந்தம் இல்லை என்றும் ஹோம்ஸ் சொல்வதை மோரியார்ட்டி பொருட்படுத்துவதில்லை.அதனால் வாட்ஸனுடன் மாறுவேடத்தில் பயணிக்கும் ஹோம்ஸ், வாட்ஸனைக் காக்கிறார்.

ஹோம்ஸும் மோரியார்ட்டியும் மறுபடி சந்திக்கிறார்கள்.இம்முறை, ஹோம்ஸ்,மோரியார்ட்டியின் கைதி (எப்படி என்று படத்தில் பார்த்துக்கொள்ளுங்கள்). உலகப்போர் ஒன்றைத் தொடங்க இருப்பதே மோரியார்ட்டியின் நோக்கம் என்பது ஹோம்ஸுக்குப் புரிகிறது.

ஸ்விட்ஸர்லாந்தில் நடக்க இருக்கும் உலக நாடுகளின் அமைதிப் பேச்சுவார்த்தையில், மோரியார்ட்டி, அவரது நோக்கத்தை நிறைவேற்ற இருப்பது ஹோம்ஸுக்குத் தெரிகிறது. ஆஜராகிறார் ஸ்விஸ்ஸில் ஹோம்ஸ்.

மோரியார்ட்டியும் ஹோம்ஸும், இறுதி முறையாக, நேருக்கு நேர் சந்திக்கிறார்கள். என்ன நடக்கிறது என்பது அனல் பறக்கும் க்ளைமேக்ஸ்.

எனக்கு அடிதடி,வெடிகுண்டு,ரத்தம் ஆகியன தெறிக்கும் க்ளைமேக்ஸ்களைவிட, இந்தப் படத்தில் வரும் க்ளைமேக்ஸ் போன்றவையே பிடிக்கும். அலட்டலில்லாத காட்சிகளில், அதிர வைக்கும் ஷாட்கள் நம்மைக் கடந்து செல்கின்றன. ஸீட் நுனி என்பதையும் மீறி, அத்தனை சுவாரஸ்யமாக இப்படத்தின் க்ளைமேக்ஸைக் கவனித்தேன். காரணம், ஹோம்ஸும் மோரியார்ட்டியும் இரண்டு மாபெரும் ஜீனியஸ்கள். அவர்கள் மோதிக்கொள்வது, இப்படித்தான் இருக்கவேண்டும். சும்மா துப்பாக்கியை எடுத்து சுட்டுக்கொள்ளாமல், இருவருக்கும் பெரும் சொத்தாக இருக்கும் அபாரமான அறிவின் துணை கொண்டு இருவரும் மோதுவது அட்டகாசம்! இப்படத்தைப் பார்க்கும் நண்பர்கள், க்ளைமேக்ஸை கவனியுங்கள். கிட்டத்தட்ட இதே போன்றதொரு க்ளைமேக்ஸ், ‘Sherlock' தொலைக்காட்சி சீரீஸின் இறுதியில் காணலாம். ஆனால், அதனைவிட இதுவே சிறந்தது.

இப்படத்தின் கதையில் ஒரு deep dive, திரைக்கதை, ஹோம்ஸ் துப்பறியும் விதம், மோரியார்ட்டி, மைக்ராஃப்ட், செபாஸ்டியன் மோரான் ஆகியவர்களின் character Bio போன்ற பல சுவாரஸ்யமான விஷயங்கள், இக்கட்டுரையின் இரண்டாம் பாகத்தில் வர இருக்கின்றன. Brace yourselves !

'Sherlock Holmes 2: A Game of Shadows' திரைப்படத்தின் ட்ரெய்லர் இங்கே.

தொடரும்.....

2011ன் சிறந்த பாடல்

2012-01-01T00:39:00.000+05:30

2011 வருடத்தின் சிறந்த பாடல் எது?

இந்த வலைப்பூ (ஒக்க சந்தேகமண்டி... அதென்ன வலைப்பூ? ஏன் வலைப்பழம், வலைக்காய்ன்னு பேர் வெச்சா என்ன கொறைஞ்சா போயிருவ?) படித்துவரும் நாற்பத்திரெண்டு லட்சத்து முப்பத்து ரெண்டு பேர், கடந்த 2011 ஜனவரி ஒன்றிலிருந்து நேற்று வரை அனுப்பிய எண்பத்தி நாலு லட்சத்து அறுபத்தி ரெண்டு மின்னஞ்சல்களை ஒன்று விடாமல் எண்ணி, படித்து, ஸ்பேம் க்ளிக்கிய அனுபவத்தில், மேலே சொன்ன கேள்வியைக் கடந்த நாலு நாள்களாக ஒரு கணம் விடாமல் யோசித்து வருகின்றேன். காரணம், இத்தனை லட்சம் வாசகர்கள் (எப்போது வாசகன் என்று ஒருவன் எழுத ஆரம்பிக்கிறானோ, அப்போதே அவன் நாசமாய்ப் போய் விடுகிறான் என்றார் பழைய சந்நியாஸி அலைஸ் ஓல்ட் மாங்க்) என்னை வினவிய அன்பின் பிரதிபலிப்பே. இதன் காரணமாக, கடந்த பதினோரு மாதங்களாக, இந்த ஆண்டு டிசம்பர் வரை வெளிவந்த நூற்றி சொச்சம் தமிழ்ப்படங்கள் (இதில் ஆங்கில சினிமாக்களை அட்டைக்காப்பி அடித்து வெளிவந்த ‘தெய்வத்திருமகள்’ இத்யாதி படங்களும் சேர்க்கப்படுகின்றன) அத்தனையும் ஒன்றுவிடாமல் பார்த்து, அனலைஸ் செய்து, பிரித்து மேய்ந்து, கிழித்துத் தோரணம் கட்டி, கோலம் போட்டு, மாவிளக்கு வைத்து, இருப்பதிலேயே பெஸ்ட் என்று முடிவு கட்டிய பாடல்களின் வரிசை இதோ. இந்த லிஸ்டை ஆஸ்கருக்கும் அனுப்பி வைத்திருக்கிறேன். இதன் காரணமாக, சிறந்த ஆஸ்கர் பரிசான நோபல் ப்ரைஸ் என்னைத் தேடி வரும் என்று எதிர்பார்க்கின்றேன். இதற்குக் காரணமான, சரக்கும் பிரியாணியும் வாங்கிக்கொடுத்து என்னை வாழ வைக்கும் தெய்வங்களான தமிழ் வாசகர்கள் அத்தனை பேரையும் நன்றியுடன் நினைத்துப்பார்க்கின்றேன்.

பின்குறிப்பு - 2011 ஜனவரியிலேயே நான் பார்த்த படங்களில், நரிதாஸ், பானை பிடிக்காதவள் துர்ப்பாக்கியசாலி, ஆயிரம் கதை வாங்கிய அபூர்வ குந்தாணி ஆகிய 2013ல் வந்த படங்களும் அடக்கம். இதற்குக் காரணம், திருட்டு டீவீடீக்களை எனக்கு அள்ளி வழங்கிய சுண்டல் கடை சுந்தரமே.

பாடல் நிர் ஒன்று - அடிடா அவள: மயக்கம் என்ன

பாடல் நிர் இரண்டு - ஓட ஓட ஓட : மயக்கம் என்ன

பாடல் நிர் மூன்று - கன்னித்தீவு பொண்ணா : யுத்தம் செய்

பாடல் நிர் நான்கு - ஜிந்தாத்தா ஜிந்தா ஜிந்தா : சிறுத்தை

பாடல் நிர் ஐந்து- பெத்தவங்க பார்த்துவெச்ச பொண்ணை எனக்கு புடிக்கல - வேங்கை

பாடல் நிர் ஆறு - இச்சு இச்சு இச்சு இச்சு கொடு - வெடி

பாடல் நிர் ஏழு - கலாஸலா கலஸலா - ஒஸ்தி

இது தவிர, க்ரிடிக்ஸ் சாய்ஸாக, கீழ் வரும் பாடல்கள்.

பாடல் நிர் ஒன்று - மழை வரும் அறிகுறி (female) : வெப்பம் (the best song of 2011 - according to me)

பாடல் நிர் இரண்டு - நோ மணி நோ மணிடா : வானம்

பாடல் நிர் மூன்று - பிறை தேடும் : மயக்கம் என்ன

அம்புட்டுதேன். இந்த 2011ம் வருடத்தில், என்னைக் கவர்ந்த பாடல்களைக் கண்டு களியுங்கள். 2012 பட்டையைக் கிளப்ப, எனது மனமார்ந்த வாழ்த்துகள். Juz njoooooooooooooooooooooooooy n hv fun friends !!!!!

திரைக்கதை எழுதுவது 'இப்படி' - 12

2011-12-20T17:29:00.000+05:30

Chapter 7 - Setting up the Story (contd..)

சென்ற கட்டுரையில், 'Chinatown' திரைப்படத்தின் திரைக்கதையின் முதல் பத்து பக்கங்கள் படித்தோம் அல்லவா? இப்போது, நாம் படித்தவற்றைப் பற்றி அலசிப் பார்க்கலாம். சிட் ஃபீல்ட் எப்படி அலசியிருக்கிறார் என்பதை விரிவாகப் பார்க்கலாம் வாருங்கள்.

முதல் பக்கத்தின் இரண்டாம் பத்தியிலேயே, பிரதான கதாபாத்திரமான Jack Gittes அறிமுகப்படுத்தப்படுகிறது. அப்படியே, அந்தக் கதாபாத்திரத்தைப் பற்றிய பல விஷயங்களையும் நாம் அறிந்துகொள்கிறோம்.

எப்படி?

'வெளியே நிலவும் சூட்டில்கூட, லினன் ஸூட் அணிந்திருக்கும் அந்தப் பாத்திரம், கேஷுவலாகவும் சுறுசுறுப்பாகவும் இருக்கிறது'. இது முதல் செய்தி. அதேபோல், 'தனது கைக்குட்டையால், மேஜையில் படிந்திருக்கும் அழுக்கினைத் துடைக்கிறது'. இந்தச் செய்தியானது, அந்தக் கதாபாத்திரம் மிகவும் கூர்த்த கவனிப்பு உடையது என்பதை நமக்குத் தெரியப்படுத்துகிறது. இந்தத் தகவல் முக்கியமான ஒன்று. ஏனெனில், அந்தக் கதாபாத்திரம் செய்யும் தொழிலில் கூர்மையான கவனிப்பு மிக அவசியம்.

சிறிதுநேரம் கழித்து வெளியே செல்லும் அந்தப் பாத்திரம், மிக நேர்த்தியாக உடையணிந்திருக்கிறது. இதுபோன்ற விஷுவல் தகவல்களால், அந்தக் கதாபாத்திரத்தின் குணாதிசயங்களைப் பற்றி நாம் அறிந்துகொள்ள முடிகிறது. இதில் எங்குமே அக்கதாபாத்திரம் எப்படி இருக்கிறது என்பது சொல்லப்படவில்லை என்பது சிட் ஃபீல்ட் சொல்லும் இன்னொரு விஷயம். அதாவது, அக்கதாபாத்திரம் உயரமாக இருக்கிறதா, குள்ளமா, குண்டாக உள்ளதா ஆகிய எந்த விஷயங்களும் இல்லை. அதற்குப் பதில், அது எப்படி நடந்துகொள்கிறது என்பதைச் சொல்லியே அக்கதாபாத்திரத்தைப் பற்றிய புரிதலை நமக்குள் கொண்டுவந்துவிடும் வகையில் இந்தத் திரைக்கதை எழுதப்பட்டிருக்கிறது என்கிறார் சிட் ஃபீல்ட். அதேபோல், Jack Gittes பாத்திரம், தன்னைப் பார்க்க வந்திருக்கும் மனிதனுக்கு, தன்னிடம் இருப்பதில் மலிவான விஸ்கி ஒன்றை ஊற்றிக் கொடுக்கிறது. இதனால் நாம் புரிந்துகொள்ளும் செய்தி? என்னதான் சிறிதளவு சூது இருப்பினும், பிறரைக் கவரும் வகையிலும், ஓரளவு பிறர் மேல் அன்புடனும் இருக்கிறது அந்தக் கதாபாத்திரம்.

திரைக்கதையின் நான்காவது பக்கத்தில், Jack Gittes யார் என்ற செய்தி, விஷுவலாகக் காட்டப்படுகிறது - 'கண்ணாடியின் மேல், J.J. GITTES and Associates—DISCREET INVESTIGATION என்ற வார்த்தை எழுதப்பட்டிருக்கிறது' - என்ற வாக்கியத்தின் மூலம்.

திரைக்கதையின் முக்கியமான சம்பவம், பக்கம் ஐந்தில் சொல்லப்படுகிறது. அங்கேதான் மிஸஸ் மல்ரே என்ற பெண்மணி, ஜாக்கிடம் வந்து, தனது கணவருக்கு ஒரு கள்ளத்தொடர்பு இருப்பதாகச் சந்தேகப்படுவதாகவும், அதனை ஜாக் துப்பறியவேண்டும் என்றும் வேண்டுகோள் விடுக்கிறாள். அதிலிருந்துதான் கதை ஆரம்பிக்கிறது. அந்த நிகழ்ச்சியால்தான் திரைக்கதையின் முதல் plot point நிகழ்கிறது (திரைக்கதையின் முப்பது நிமிடங்களில் நிகழும் இந்த முதலாவது ப்ளாட் பாயின்ட் என்னவெனில், நிஜமான மிஸஸ் மல்ரேவை ஜாக் சந்திப்பதே. அப்போதுதான், ஒரு மிகப்பெரிய சதிச்சுழலில் சிக்கிக்கொண்டிருப்பதை ஜாக் உணர்கிறான். அதிலிருந்து மீள்வதற்காக ஜாக் செய்யும் விஷயங்களே மீதிக்கதை).

"என் கணவருக்கு வேறொரு பெண்ணுடன் தொடர்பு இருப்பதாகச் சந்தேகப்படுகிறேன்" என்ற வார்த்தைகளே சைனாடௌன் திரைக்கதை செல்லும் போக்கினைத் தீர்மானிக்கின்றன. அதனால்தான் அப்பெண்ணின் கணவரை ஜாக் பின்தொடர்கிறான். அப்படித் தொடர்வதால்தான் அந்த நகரில் நடைபெறும் மாபெரும் தண்ணீர் சம்மந்தப்பட்ட ஊழலைக் கண்டுபிடிக்கிறான். அதனால்தான் அப்பெண்ணின் கணவர் கொலை செய்யப்படுவதையும் கண்டுபிடிக்கிறான். இத்தனைக்குப் பிறகு, நிஜமான பெண்மணியை ஜாக் சந்திக்க நேர்கிறது. அப்போது, தன் கணவரைத் தொடர்ந்த குற்றத்துக்காக ஜாக்கின்மேல் போலீஸில் புகார் கொடுக்கப்போவதாகக் கூற, சிக்கலில் மாட்டிக்கொண்ட ஜாக், யாரோ ஒரு பெண்ணினால் அவன் ஏமாற்றப்பட்டதைப் புரிந்துகொள்கிறான். இயல்பிலேயே கர்வியான அவனால் அதனைத் தாங்கிக்கொள்ள முடிவதில்லை. அதனால்தான் உண்மையைக் கண்டுபிடிப்பதில் மிகத் தீவிரமாக இறங்குகிறான்.

இப்படி ஒரு சரடில் கோர்க்கப்பட்ட சம்பவங்களாக இவை ஒன்றின் பின் ஒன்றாகத் தொடர்வதும், ஒவ்வொரு சம்பவத்துக்குமே முன்னர் நடந்த இன்னொரு சம்பவத்துடன் தொடர்பு இருப்பதுமே இத்திரைக்கதையை மிகச் சுவாரஸ்யமுடையதாகக் காட்டுகின்றன என்கிறார் சிட் ஃபீல்ட்.

இந்தத் திரைப்படத்தின் மைய இழையாக வரும் ஊழல், உண்மையில் 1900ல் லாஸ் ஏஞ்சலீஸில் நடந்த உண்மைச் சம்பவம். அந்தச் சம்பவத்தை மட்டும் எடுத்துக்கொண்டு, 1937ல் கலிஃபோர்னியாவில் நிகழ்வதாக எழுதப்பட்டிருக்கிறது இத்திரைக்கதை.

ஆக, இந்தத் திரைக்கதையின் முதல் பத்து பக்கங்களுக்குள்ளேயே பிரதான கதாபாத்திர அறிமுகம், திரைக்கதை செல்லப்போகும் பாதை, திரைக்கதையின் கரு ஆகிய அத்தனையுமே தெளிவாக எழுதப்பட்டிருப்பதைப்போல்தான் நாமும் நமது திரைக்கதைகளை எழுத முயல வேண்டும் என்று சொல்கிறார் சிட் ஃபீல்ட்.

இத்துடன் சிட் ஃபீல்டின் புத்தகத்தின் ஏழாவது அத்தியாயமான 'Setting up the story' முடிவடைகிறது.

அடுத்த அத்தியாயத்தில், திரைக்கதைக்கு அவசியமான இரண்டு சம்பவங்களைப் பற்றிப் பார்க்கப்போகிறோம். அவை.....?

தொடரும் . . .

டாக்குமெண்ட்ரிகள் மற்றும் குறும்படங்களுக்கான தேசிய திரைப்பட விழா - பாண்டிச்சேரி

2011-12-16T12:24:00.002+05:30

நண்பர்கள் கவனத்துக்கு. டாக்குமெண்ட்ரிகள் மற்றும் குறும்படங்களுக்கான தேசிய திரைப்பட விழா (The National Documentary Short Film Festival), பாண்டிச்சேரியில் டிசம்பர் பதினைந்திலிருந்து டிசம்பர் பதினெட்டு வரை, பாண்டிச்சேரி பல்கலைக்கழகத்தில் (உப்பளம் பள்ளியில் அல்ல) நடைபெறுகிறது. இதைப்பற்றிய எந்த செய்தியும் இன்டர்நெட்டில் இல்லை. இதுகுறித்துத் தகவல் அனுப்பிய நண்பர் ரதியழகனுக்கு நன்றிகள்.

பாண்டிச்சேரியில் இருக்கும் நண்பர்கள், இந்த விழாவுக்குச் சென்று பயனுறும்படி கேட்டுக்கொள்கிறேன்.

updated on 17th Dec 2011 - இதோ - இன்றும் நாளையும் திரையிடப்படும் படங்களுக்கான நிகழ்ச்சி நிரல்.

சென்னை 9th சர்வதேச திரைப்பட விழா - சில குறிப்புகள்

2011-12-13T17:12:00.000+05:30

நாளை முதல் ஒன்பது நாட்கள் (14- 22nd Dec 2011) நடக்கவிருக்கும் சென்னை சர்வதேச திரைப்பட விழாவில், 133 வெளிநாட்டுப் படங்கள் கலந்துகொள்ளவிருக்கின்றன. இவற்றோடு சேர்த்து, ஒன்பது படங்கள் இந்தியாவின் பிறமொழிகளில் இருந்தும், பனிரண்டு படங்கள் தமிழிலிருந்தும் கலந்துகொள்கின்றன. அவற்றின் அட்டவணை இதோ. நல்ல சினிமா பார்க்கவேண்டும் என்று விரும்பும் நண்பர்கள் அனைவரும் தவறாமல் கலந்துகொள்ள வேண்டுகிறேன். என்னால் இயலாது. இருந்தாலும், நானும் ஒரு திரைப்பட விழாவை என்னளவில் கொண்டாட இருக்கிறேன். ஆகவே, என்னால் முடிந்தவரை இவற்றில் சில நல்ல திரைப்படங்களைப் பற்றி அவசியம் எழுத முயல்கிறேன்.

திரைப்பட அட்டவணை - (க்ளிக் செய்து பெரிதுபடுத்திப் பார்க்கலாம் )

கொரியாவில் இருந்து ஒரே ஒரு படம் தான் இடம்பெறுகிறது (The Front Line). அது என்னைப்பொறுத்தவரை ஒரு பெரிய குறை.

ஃப்ரான்ஸிலிருந்து பதினெட்டு படங்கள் கலந்துகொள்கின்றன.

இவ்விழாவில் திரையிடப்படப்போகும் இரானியப் படங்கள் அனைத்துமே (ஒன்றிரண்டைத் தவிர்த்து) அருமையான படங்கள். தவற விடாதீர்கள்.

678 என்ற எகிப்தியத் திரைப்படம், இந்தியாவில் பெண்கள் தினந்தோறும் சந்திக்கும் பெரும் பிரச்னையான பாலியல் வன்கொடுமையைப் பற்றியது (பேருந்துகளில் கசக்கப்படும் பெண்கள் மற்றும் வன்கலவியால் பாதிக்கப்பட்டவர்கள்). கட்டாயம் இப்படத்தைப் பார்க்கும் நண்பர்கள், நமது இந்தியாவுடன் இப்படத்தைப் பொருத்திப் பார்க்கலாம்.

திரைப்பட விழாவில் கலந்துகொள்ளும் அதிருஷ்டசாலி நண்பர்களுக்கு வயிற்றெரிச்சலுடன் கூடிய வாழ்த்துகள் :-)

பி.கு 1 - திரைப்பட விழாவைப் பற்றிய விபரங்களுக்கு, திரைப்பட விழாவின் வலைத்தளத்தைப் பார்க்கலாம் - இங்கே.

பி.கு 2 - தமிழில் கலந்துகொள்ளும் படங்களில் எனது சாய்ஸ், ஆடுகளமும் அழகர்சாமியின் குதிரையும்.

பி.கு 3 - இத்திரைப்பட விழாவில் இடம்பெறாத இரண்டு பிரதான இந்தியப் படங்கள்: ஆரண்ய காண்டம் மற்றும் Gandu. கூடவே, லீனா மணிமேகலையின் செங்கடல் திரைப்படமும் இடம்பெறவில்லை. அதைப்பற்றி இப்பதிவை வெளியிட்ட பின், நண்பர் மாமல்லன் கார்த்தி போட்ட பின்னூட்டத்தினால் விரிவாகப் படித்தேன். இறையாண்மைக்கு எதிராக இருந்தது என்று சொல்லி நிராகரிக்கப்பட்ட படம் இது. நமது சென்சார் போர்டின் அயோக்கியத்தனத்தைப் பற்றிச் சொல்லவே வேண்டியதில்லை. டண்டணக்கா படங்களுக்கெல்லாம் எந்த வெட்டையும் தராமல், நல்ல படங்களை அமுக்குவதே இவர்களது வேலை. அப்படி அமுக்கப்பட்ட படம்தான் செங்கடல். அதன் கதையையும் விரிவாக வாசித்தேன். உண்மையில் நடப்பதைத்தான் அப்படம் சொல்கிறது. அது மக்களைச் சென்றடையவேண்டியதுதான் முறை. அப்படியிருக்க, இப்படத்தை ஒதுக்குவது மாபெரும் தவறே இன்றி வேறில்லை. அவரது பின்னூட்டத்தில் சொல்லியுள்ளபடி, இது கயமைத்தனமேதான். இது வன்மையாக எதிர்க்கப்படவேண்டியது.

வெகு சீக்கிரம் செங்கடலைப் பற்றி இன்னமும் எழுத முயற்சிக்கிறேன்.

Exile - A Charu Nivedita Novel

2011-12-06T14:28:00.001+05:30

'எக்ஸைல்' நாவலின் முதல் விமர்சனமாக என்னுடைய விமர்சனத்தைத் தன்னுடைய ப்ளாக்கில் வெளியிட்ட நமது சாருவுக்கு நன்றிகள். இன்று வெளியிடப்படும் இந்நாவல் விழா, கட்டாயம் பெருவெற்றியாக அமையும் என்பதில் சந்தேகம் இல்லை.

சாருவின் ப்ளாக்கில் உள்ள விமர்சன சுட்டி இங்கே.

எக்ஸைலுக்கு முதல் விமர்சனம்: கருந்தேள்

இந்த விமர்சனத்தை இனி இங்கேயும் படிக்கலாம். நன்றி.

Autobiography? No, that is a privilege reserved for the important people of this world, at the end of their lives, in a refined style. Fiction, of events and facts strictly real; autofiction, if you will, to have entrusted the language of an adventure to the adventure of language, outside of the wisdom and the syntax of the novel, traditional or new. Interactions, threads of words, alliterations, assonances, dissonances, writing before or after literature, concrete, as we say, music.

‘சுயசரிதை என்பது, உலகின் முக்கியமான நபர்களுக்கு, அவர்களது வாழ்க்கையின் முடிவில், நாகரிகமான நடையில் எழுதப்படும் ஒரு விஷயமாக இருக்கிறது. உண்மையான சம்பவங்களையும் தகவல்களையும் வைத்து எழுதப்படும் நாவலை, Autofiction என்றே சொல்லலாம். அது, சுயசரிதை அல்ல. சாகஸத்தின் மொழியை, மொழியின் சாகஸத்தைக் கொண்டு, மரபு சார்ந்ததாகவோ அல்லது புதியதாகவோ உள்ள அந்த நாவலின் வடிவத்துக்கும் நுட்பத்துக்கும் வெளியே வைத்து எழுதுவது. சம்பாஷணைகள், வார்த்தைகளின் கோர்ப்புகள், வார்த்தை விளையாட்டுகள், முரண்பாடுகள் ஆகியவற்றை உறுதியான வகையில், இசையைப்போல், இலக்கியத்துக்கு முன்பும் பின்பும் எழுதுவது‘

- Serge Doubrovsky

சாரு நிவேதிதாவின் ’எக்ஸைல்’ நாவலை, வெளிவரும் முன்னரே படிக்கக் கிடைத்த ஒருசில நபர்களில் ஒருவனாக இருப்பது பற்றி, சந்தோஷம் அடைகிறேன். இரவு ஒன்பது மணிக்குப் படிக்க ஆரம்பித்து, அதிகாலை இரண்டு மணிக்குப் படித்து முடித்து விட்டேன். மொத்தம் ஐந்து மணி நேரம். எங்கும் செல்லவில்லை. படிப்பதைத் தவிர வேறு எதையும் செய்யவில்லை. சாருவின் நண்பன் – அவரது எழுத்தின் தீவிர ரசிகன் என்ற நோக்கில் பார்த்தால், நாவல் அற்புதம் என்று தாராளமாகச் சொல்லிவிடலாம். ஆனால் – சாரு யாரென்றே தெரியாத ஒரு இலக்கிய ரசிகன், இந்த நாவலைப் படிக்கத் துவங்கினால், அந்த அனுபவம் அவனுக்கு எப்படி இருக்கும்?

பொதுவாக, நமக்குத் தனிப்பட்ட முறையில் பல நாவலாசிரியர்களைத் தெரிய வாய்ப்பு இல்லை. ஒரு புதிய நாவல் வந்துள்ளது என்றால், அதனை வாங்கிப் படிக்கும் தருணங்களிலும் கூட, அந்த நாவலாசிரியரைப் பற்றிப் பொதுவில் புழங்கும் செய்திகளின் வாயிலாகவே அவரை அறிய நேர்கிறது. ஆகவே, நாவலாசிரியரைப் பற்றிய எண்ணங்கள், அந்த நாவலைப் படிக்கத் தடையாக இருப்பதில்லை. தடை என்று சொல்வதை விட, அந்த எண்ணங்கள், நம்மை biased ஆகச் செய்வதில்லை. ஆகவே, அந்த நாவலில் முழுமையாக மூழ்கிவிட முடிகிறது. அப்படி ஒரு பொதுவான இலக்கிய ரசிகன் – சாரு என்றால் யாரென்றே தெரியாத மனிதன் – நாம் எப்படி ஒரு ஓரான் பாமுக்கையோ அல்லது லோசாவையோ அல்லது ஆதவனையோ படிக்க நேர்கிறதோ, அப்படிச் சாருவின் இந்த நாவலைப் படிக்கும் ஒரு இலக்கிய ரசிகனின் பார்வையில் இந்த நாவலை அலசலாம். கட்டுரையின் முடிவில், அல்லது தனிப்பட்ட கட்டுரை ஒன்றில், சாருவின் நண்பனாக இந்த நாவலைப் பற்றிய கருத்தை எழுத முயல்கிறேன்.

சேர்ஜ் துப்ரோவ்ஸ்கியின் ‘Fils’ என்ற ஃப்ரெஞ்ச் நாவலில் இருந்து கொடுக்கப்பட்டிருக்கும் மேற்கோளை கவனித்தீர்களா? அதுதான் ‘எக்ஸைல்’ நாவலின் அடிநாதம். Autofiction என்றால் என்ன? இதனைப் புரிந்துகொண்டால், எக்ஸைல் நாவல் ஒரு குறிப்பிட்ட விதமான அனுபவத்தைக் கொடுக்கும். Autofiction என்றால் என்ன என்றே தெரியாமல் இந்நாவலைப் படித்தால், அது இன்னொரு விதமான அனுபவத்தைக் கொடுக்கும்.

தமிழ்நாட்டில் கொள்கைப் பிடிப்புள்ள இலக்கியவாதியாக வாழ்வது ஒரு அவலம். எந்தக் கொள்கையும் இல்லாமல், காக்காய் பிடித்து, ஜால்ரா தட்டி சுகமான வாழ்வை வாழ்ந்து விடலாம். ஆனால், உறுதியானதொரு கொள்கையுடன், சமரசம் செய்யாத வாழ்க்கையை வாழ முனையும் ஒரு இலக்கியவாதியின் கதறலே எக்ஸைல். உதயா என்று ஒரு எழுத்தாளன். அவனுக்கு, இங்கே தன்னுடைய உயிரைத் தக்க வைத்துக் கொண்டு வாழ்வதே ஒரு பிரச்னையாக உள்ளது. இதற்கும் மேல் அவனுக்கு, அவனது சமூகத்தின் மீதும், சுற்றுப்புறத்தின் மீதும் சில விமர்சனங்கள் உள்ளன. ஆனாலும், அவனால் வேறு எங்கும் போய் வாழ்ந்து விடவும் இயலாது. ஆகவே, நாடு கடத்தப்பட்டு, புகலிட வாழ்வு வாழ்ந்து கொண்டிருக்கும் ஒரு மனிதனைப் போல் தமிழகத்தில் வாழ்ந்து கொண்டிருக்கிறான் உதயா. அப்படிப்பட்ட வாழ்வை வாழ்வதற்கான காரணங்களை, நாவலைப் படிக்கும் வாசகனின் முன் எடுத்து வைக்கிறான். அவனைப் பல்வேறு திசைகளிளிருந்தும் போட்டு அழுத்திக் கொண்டிருக்கும் சுமைகளைத் தாங்கிக் கொண்டு அவன் எப்படி வாழ்கிறான் என்பது, நாவலின் முன்பாதியின் ஆரம்பப் பக்கங்களில் விரிவாக எழுதப்பட்டுள்ளது. எக்ஸைலின் ஒரு பகுதி அது.

எழுத்தாளனின் வாக்குமூலம் என்றதும், நாவல் ஒரேயடியாக இருண்ட தன்மை உடையதாக இருந்துவிடப் போகிறது என்ற முன்முடிவை அவசரமாக எடுப்பவர்களுக்கு – நாவலில் இந்த gloominess அறவே இல்லை என்று சொல்லி விடலாம். பொதுவாகவே, இலக்கியம் என்ற வார்த்தை உச்சரிக்கப்பட்டவுடன், gloominess என்ற வார்த்தையும் சேர்த்தே உச்சரிக்கப்படுவதுபோலவே ஒரு கருத்து நிலவிக் கொண்டிருக்கிறது. சாருவின் ‘ராஸலீலா’ நாவலை உதாரணத்துக்கு எடுத்துக் கொண்டால், அந்நாவலின் முதல் பகுதியான ‘கண்ணாயிரம் பெருமாளும் நாற்பது கதைகளும்’ என்ற பகுதியில், கண்ணாயிரம் பெருமாள் என்ற கதாபாத்திரம் அனுபவித்த கொடும் வாழ்க்கை மிகத் தீவிரமாகவும், விரிவாகவும் விளக்கப்பட்டிருக்கும். ஆனால், அது எந்த வகையிலும் gloomyயாக இருக்கவே இருக்காது. ‘Pleasure of the text’ என்ற பதத்துக்கு மிகச் சரியான உதாரணம் ராஸலீலா. அதேபோல, சாருவின் அடுத்த நாவலான ‘காமரூபக் கதைகள்’, இன்னொரு சந்தோஷமான அனுபவம். இதேபோல்தான் எக்ஸைல் நாவலும். நாவலின் முதல் பாதியில், உதயா என்ற எழுத்தாளனின் அவலம் விரிவாகவே எழுதப்பட்டிருந்தாலும், அதில் gloominess அறவே இல்லை.

உதயாவுக்கு, குஷால்தாஸ் என்ற கார்ப்பரேட் சாமியாரால் ஏற்பட்ட துன்பியல் சம்பவங்களும் – குஷால்தாஸின் தியான வகுப்புகளில் ஏற்பட்ட சில விரும்பத்தகாத நிகழ்ச்சிகள் அடுத்து வருகின்றன. இவையுமே அவனது சமூகம், அவனுக்கு அளித்த ‘பரிசுகள்’ தான்.

இதன்பின் – இல்லையில்லை – மேலே சொன்ன சம்பவங்களுடனே சேர்த்து ஆரம்பிக்கிறது அஞ்சலி என்ற பெண்ணை உதயா சந்தித்த கதையும், இருவரும் ஒருவர்மேல் ஒருவர் கொண்ட மூர்க்கமான காதல் பற்றிய விவரணைகளும். இதன்பின் அஞ்சலியின் கதை வருகிறது. மிக மிக விரிவாக – ஒரு துயரமான கவிதையைப் போலவே, அஞ்சலியின் கதை நம்மைத் தாக்குகிறது. ஸீரோ டிகிரியில் அவந்திகாவின் கதை நினைவிருக்கிறதா? அதை விடவும் இந்தக் கதை தீவிரமான ஒன்றாக எனக்குத் தோன்றியது.

இந்த இடத்தில்தான் ஆரம்பிக்கிறது கொக்கரக்கோவின் தலையீடு.

உண்மையில் நாவலின் தொடக்கத்தில் இருந்தே கொக்கரக்கோ என்ற கதாபாத்திரம் தனது கருத்துக்களை ஆங்காங்கே பதிந்து வந்தாலும், அஞ்சலியின் கதையில் அந்தத் தலையீடு, மிகவும் அர்த்தமுள்ளதாகத் தோன்றுகிறது. ஏனெனில், அஞ்சலியின் கதையைப் படிக்கும் வாசகர்களுக்கு, உலகின் அத்தனை பெண்களின் கதையுமே இதைப் போலவேதான் துயரமாக இருக்குமா? அது ஏன் உதயா சந்திக்கும் அத்தனை பெண்களுக்கும் இப்படிப்பட்ட பின்னணிக் கதை இருக்கிறது? போன்ற கேள்விகள் எழக்கூடும். இந்தக் கேள்விகளை, அந்தந்த இடங்களில் கனகச்சிதமாக எழுப்புகிறான் கொக்கரக்கோ. கதையின் ஓட்டத்தைத் தடுத்து நிறுத்தி, இந்தக் கேள்விகளைக் கேட்டு விட்டே கதையைத் தொடரச் செய்கிறான் அவன். இந்தக் கேள்விகளில் என்ன விசேஷம் என்றால், இந்நாவலை எழுதிய சாரு என்ற எழுத்தாளர், ஒரு குறிப்பிட்ட கதாபாத்திரம், கதையை ஒரு குறிப்பிட்ட விதமான போக்கில் எடுத்துச் செல்ல வைக்கிறார் என்று வைத்துக்கொள்வோம். அந்தக் கதாபாத்திரத்துக்கு ஒரு Point of view உள்ளது. கதையும் அந்த வகையிலேயே பயணிக்கிறது. ஆனால், அதே சமயம், அந்தப் பாயின்ட் ஆஃப் வ்யூவுக்கு நேர் எதிர்த்திசையில் இன்னொரு கதாபாத்திரம் பயணிக்கிறது. முந்தைய கதாபாத்திரத்தைப் பற்றிய கேள்விகளையும் எழுப்புகிறது. இந்தச் சூழ்நிலையில், இரண்டு கதாபாத்திரங்களுமே நியாயமானவையாக நமக்குத் தோன்றும் அளவு, ஒவ்வொரு கதாபாத்திரத்திலும் கூடு விட்டுக் கூடு பாய்ந்திருக்கிறார் சாரு என்கிற நாவலாசிரியர். அது, நான் படித்த வரையில், கொஞ்சம் அரிதான விஷயம். எப்போதுமே நாவலை எழுதும் நபருக்கு இருக்கும் முன்முடிவையும் அவரது சமுதாயக் கருத்துக்களையும் வைத்தே அதில் உள்ள கதாபாத்திரங்கள் பேசும். ஆகவே, ஆசிரியரின் கருத்துக்கு ஒவ்வாத கதாபாத்திரம் இறுதியில் ‘நல்ல’ கதாபாத்திரம் ஒன்றினால் தோற்கடிக்கப்படும். ஆனால், எக்ஸைல் நாவலில், அஞ்சலியும் கொக்கரக்கொவும் முற்றிலும் எதிரான கதாபாத்திரங்களாக இருந்தாலும், ஒவ்வொருவரும் எடுத்து வைக்கும் வாதங்கள் யாராலும் முறியடிக்கப்படுவதில்லை. இந்த இரண்டு கதாபாத்திரங்களின் அவதானமுமே சரியானதாக இருக்கிறது – அவரவர்களின் கோணத்தில்.

இது, இந்நாவலின் மற்றொரு ப்ளஸ் பாயின்ட்.

நாவலின் இறுதிப் பக்கம் வரையிலும் இந்த யுத்தம் – அஞ்சலிக்கும் கொக்கரக்கோவுக்கும் உள்ள கருத்துகள் சார்ந்த யுத்தம் – தொடர்கிறது.

இதைத் தவிர, நாவலின் ஆரம்பத்தில் இருந்து இறுதி வரையிலும் பல கதாபாத்திரங்களைக் காண்கிறோம். அந்தக் கதாபாத்திரங்கள் ஏன் நாவலில் நுழைந்தனர் என்பதற்கும் தக்க பதில், அவர்களின் பின்புலம் வாயிலாக நமக்குப் படிக்கக் கிடைக்கிறது. கூடவே, நாவலில், இந்திய மரபின் பாரம்பரியத்தை விளக்கும் பல விஷயங்கள் உள்ளன. சித்தர் கதைகள், அவர்களது பாடல்கள், அவர்கள் அருளிய எந்திரங்கள், ஐயப்பன், குருவாயூர் கேசவன் என்ற யானை, கருவூரார், உதயாவின் நண்பன் சிவாவின் பித்தநிலை போன்ற பல சுவாரஸ்யமான உபகதைகள் இதில் உண்டு.

இந்தக் கதாபாத்திரங்களைக் கவனிக்கையில், மனித வாழ்வின் அபத்தங்கள் பற்றிய எண்ணம் எழுவதைத் தவிர்க்க முடியாது. ப்ரான்ஸில் குணரத்னம் என்ற மனிதரைப் பார்க்கிறான் உதயா. அவர் எப்படிப்பட்டவர் என்றால், இருபது வருடங்களாக அங்கே இருந்துகொண்டு, வேலையில் இருந்தபோது உடல்நலம் குன்றியதால் தற்போது அரசாங்க உதவித் தொகையால் வாழ்பவர். எப்போது பார்த்தாலும் குடித்துக் கொண்டே இருப்பவர். குடிப்பது ஏனெனில், தான் வாழ்ந்த மண்ணை மறப்பதற்காக. அந்த மண்ணின் துயர எண்ணங்கள் மனதில் எழும்போதெல்லாம் குடிப்பார். அதேபோல் எப்போதுபார்த்தாலும் பழைய நினைவுகளைப் பற்றிப் பேசிக் கொண்டே இருப்பார். ஒரு புகைப்படத்தைப் பார்த்தால், அதிலுள்ளவர்களைப் பற்றி ஒரு மணி நேரம் பேசக்கூடிய அவருடன் மூன்று நாட்கள் வாழ்ந்ததைப் பற்றி எழுதுகிறான் உதயா. குணரத்னத்தின் வாழ்வின் வெறுமையை நம் கண்முன் நிறுத்தும் அந்த விவரிப்பைப் படித்தால் மட்டுமே புரிந்துகொள்ளமுடியும்.

செல்லப் பிராணிகளைக் கவனித்துக் கொள்ளும் மருத்துவரின் உதவியாளர் ஒருவரைப் பற்றிய மிகச் சிறிய விவரிப்பு இந்நாவலில் வருகிறது. அரைப்பக்கம்- மிஞ்சினால் ஒரு பக்கம் இருக்கும். ஆனால், அந்த மனிதனின் வாழ்வை அதில் சாரமாக்கி உதயா எழுதியிருக்கிறான். அதன் தீவிரத்தை எழுதுவது அரிது. படித்தால் மட்டுமே அது விளங்கும்.

இதைப் போல இந்நாவலில் பல மிகச் சிறிய விவரிப்புகள் உள்ளன. அந்த விவரிப்புகளை ஒருமுறை படித்தாலும், எப்போதும் மறக்கமுடியாத தாக்கம் உடையவை. அவைகளைப் படித்தாலே, வாழ்வின் அபத்த நிலைகளைப் பற்றிய உதயாவின் கேள்விகளை நாம் அறிய முடியும்.

கூடவே, இந்நாவலில் ஆன்மீகவாதிகளைப் பற்றிய அவதானிப்பும் உள்ளது. அன்பையும் அஹிம்ஸையையும் மக்களுக்கு எடுத்தியம்ப வேண்டிய இந்த ஆன்மீகவாதிகள், தங்களளவில் எப்படி வன்முறையாளர்களாகவும், அடுத்தவர்களது வாழ்வினைக் கெடுக்கக் கூடியவர்களாகவும் உள்ளார்கள் என்று உதயா எழுதுகிறான். இந்த மாதிரி ஆசாமிகளிடம் எங்கேயிருக்கிறது அன்பும் அஹிம்ஸையும்? மாறாக, லௌகீக வாழ்வில் எவருக்கும் எந்தத் தீங்கும் விளைவிக்கக்கூடாது என்பதை வாழ்வு நெறியாகவே கொண்ட உதயா, இந்த சாமியார்களை விடவும் எத்தனையோ நல்லவன் என்பதை நாவலில் வரும் சம்பவங்களிலிருந்து அறிகிறோம். இது எவ்வளவு பெரிய நகைமுரண்?

சபரிமலையில், ஒரு சமயம் விபத்து ஒன்று நேர்ந்து, அதில் பலபேர் பலியானபோது, தொலைந்துபோன தனது பேரனைத் தேடிய குருசாமி ஒருவர் இந்நாவலில் உண்டு. நூற்றுக்கணக்கான மனிதர்களின் பிணங்களை இழுத்துப்போட்டுக்கொண்டே தனது பேரனைத் தேடியதாக அவர் சொல்கிறார். சபரிமலையில் ஏன் அப்படி நடக்கவேண்டும்? உதயாவின் மனதில் இருக்கும் இந்தக் கேள்வியைப் பற்றிக் கொஞ்சம் யோசித்துப்பாருங்கள்.

எனக்கு இந்நாவலிலேயே மிகப்பிடித்த இடம் – என் பெயர் பக்கிரிசாமி என்று தொடங்கும் ஒரு கதை. அதைப்பற்றி நான் இங்கே சொல்லப்போவதில்லை. படித்துத் தெரிந்துகொள்ளுங்கள்.

நான் மேலே சொன்ன விஷயங்களைத் தவிர, நாவலில் முதல் சில பக்கங்களிலேயே ஒரு க்ளைமேக்ஸ் வருகிறது. இதுதவிர, நாவலின் இறுதியில் ஐந்து க்ளைமேக்ஸ்கள். உதயா முதன்முதலில் எழுதிய ஃப்ரெஞ்ச் கவிதை ஒன்றும் இதில் உண்டு. Afrodisiac செய்வது எப்படி? உடலை இளமையாக வைத்துக்கொள்வது எப்படி? சாரு ஏற்கெனவே சொல்லிய ‘பணம் சம்பாதிப்பது எப்படி?’ போன்ற பல விஷயங்களும் இந்நாவலில் விவாதிக்கப்பட்டிருக்கின்றன.

இது ஒரு பிந்நவீனத்துவ நாவலும் கூட. எப்படி?

பிந்நவீனத்துவம் என்பது ஒரு படைப்பில் எப்படி வெளிப்படுகிறது என்று சுருக்கமாகப் பார்ப்போம். அதன்பின், தானாகவே இந்நாவல் பற்றியும் புரிந்துவிடும்.

Irony என்ற முரண்நகை, பின்நவீனத்துவத்தின் பிரதான அம்சம். அதேபோல் black humor. கூடவே, பிந்நவீனத்துவத்தின் இன்னொரு முக்கியமான அம்சம், Metafiction. அதாவது, எழுத்தைப் பற்றிய எழுத்து. கூடவே, Fabulation. அதாவது, fantasyயைப் புனைவில் கொண்டு வருதல். அதேபோல், புனைவை உருவாக்க முயலும் விஷயத்தைப் பற்றியே எழுதுதல் – இதற்கு Poioumena என்று பெயர். இதனுடனே, fragmentation என்ற, எழுத்தைத் துண்டுகளாக உருவாக்குதல் என்பதும், பிந்நவீனத்துவமே. அதேபோல், படிக்கும் வாசகன், கதையில் நேரடியாகப் பங்கெடுத்துக்கொள்ளுதல். இவையெல்லாமே பிந்நவீனத்துவத்தின் கூறுகள்.

எக்ஸைலில், முரண்நகைக்குக் குறைவே இல்லை. உதயா தன்னைப் பற்றியும் தனது வாழ்வைப்பற்றியும் விவரித்துக்கொண்டு செல்கையில், முரண்நகை தாராளமாக வெளிப்படுகிறது. முரண்நகையினூடாகவே, black humorம் உண்டு. சித்தர்கள், ஐயப்பன், உதயாவின் நண்பன் சிவாவின் கதை ஆகியவற்றில், fantasy உண்டு. மனித வாழ்வின் அவலங்களும், கடவுளின் இருப்பைக் கேள்விகேட்கும் பல தருணங்களும், மனிதர்களின் மனதில் படர்ந்திருக்கும் கொடூரமும், இன்னும் பல விஷயங்களும் இவற்றில் உண்டு. கூடவே, எக்ஸைல் என்ற இந்நாவலை உதயா எப்படி எழுத முயல்கிறான் என்கிற விஷயமும் நாவல் நெடுகவே வருகிறது. இது – Poioumena. அதேபோல், நாவல் முழுதுமே, fragmentகளாகவே இருக்கிறது. கதை நெடுக, வாசகன் நாவலில் நேரடியாகப் பங்குபெறும் விஷயமும் நடக்கிறது.

சரி. இதெல்லாம் நாவலின் ப்ளஸ்கள் என்று வைத்துக்கொண்டால், மைனஸ்கள் என்ன?

மைனஸ்கள் என்று எனக்குத் தோன்றுவது – நாவலில் உள்ள க்ளைமேக்ஸ்களை வாசகனுக்கு விளக்கும் வாசகங்கள். அவை, கதையின் flowவை சற்றே மட்டுப்படுத்துகின்றன என்று தோன்றியது. அந்த வாசகங்கள் இல்லாமல் இருந்தாலுமே அவை க்ளைமேக்ஸ்கள் என்று புரிகிறது.

இந்த விஷயத்தைத் தவிர, நாவலின் போக்கிலோ, மொழியிலோ, சுவாரஸ்யத்திலோ, கதாபாத்திர விளக்கங்களிலோ, எழுதப்பட்டிருக்கும் விஷயங்களின் தீவிரத்திலோ எந்தத் தங்கு தடையும் இன்றி, pleasure of the text என்பதற்கு மற்றுமொரு எடுத்துக்காட்டாகத் திகழ்கிறது இந்நாவல்.

முடிந்தவரை ஒரு வாசகனாக இந்த விமர்சனத்தை எழுதியிருக்கிறேன். நாவலைப் படித்துப்பாருங்கள். கட்டாயம் மிக வித்தியாசமான அனுபவமாக அது இருப்பதை உணர்வீர்கள்.